ប្រជាជនខ្មែរទូទាំងប្រទេសបន់ស្រន់ ឲ្យពលរដ្ឋតាមបណ្ដាខេត្តទាំងនេះចាកផុតគ្រោះទាំងពួង

2018-07-19 03:26:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ទឹកជំនន់នៅក្នុងប្រទេសកម្ពុជាកំពុងហក់ឡើងកាន់តែខ្លាំងនៅតាមបណ្ដាខេត្តមួយចំនួនដូចជា៖ ខេត្តកំពត ព្រះសីហនុ កោះកុង កំពង់ស្ពឺ បាត់ដំបង ដែលរងគ្រោះខ្លាំងជាងគេ។ តាមអ្នកនាំពាក្យក្រសួងធនធានទឹក និងឧតុនិយម ឯកឧត្ដម ចាន់ យុត្ថា ឲ្យដឹងថា ខេត្តបាត់ដំបង ទឹកហូរខ្លាំងចេញពីដងស្ទឹងសង្កែ បានជន់លិចស្រុកមួយចំនួន ក្នុងស្រុកបាណន់បានជន់លិចរយៈពេល ២សប្ដាហ៍មកហើយ ព្រោះតែជាតំបន់ទំនាបផង ប៉ុន្តែក្រសួងថាទឹកត្រូវបានហូរទៅប្រឡាយ និងព្រែក ដែលមិនធ្វើឲ្យលិចប៉ះពាល់ដល់ស្រុកផ្សេងនោះទេ។

រូបភាព៖ (Royal du Cambodge)

ចំណែកឯខេត្តកោះកុងមកដល់ព្រឹកថ្ងៃទី ១៩ ខែកក្កដា ឆ្នាំ ២០១៨ នេះ ទឹកជំនន់ព្រែកស្រែអំបិល នៅផ្នែកខាងក្រោម (ម្តុំស្ពានស្រែអំបិល) បានបន្តកើនឡើងបន្តិចបន្ថែមទៀត ខណៈនៅផ្នែកខាងលើ (តំបន់ជំនន់ដែលលិចចូលភូមិឋានប្រជាពលរដ្ឋ ភូមិបាក់អង្រុត ឃុំដងពែង) ទឹកមានសភាពនឹងថ្កល់។ ដោយឡែក ទឹកជំនន់នៅតាមបណ្តាព្រែកនានានៅក្នុងស្រុកមណ្ឌលសីមា កោះកុង និងស្រុកថ្មបាំង បានបន្តស្រកចុះមករកភាពប្រក្រតីវិញហើយ ។

ទឹកជំនន់ខេត្តកោះកុង (រូបភាព៖ ក្រសួងធនធានទឹក)

ដោយឡែកខេត្តកំពតវិញមកដល់ព្រឹកថ្ងៃទី ១៩ ខែកក្កដា ឆ្នាំ ២០១៨ ទឹកព្រែកកំពង់បាយ បានបន្តកើនឡើងមួយកម្រិតបន្ថែមទៀត។ គិតត្រឹមម៉ោង ៦:៣០ នាទីព្រឹកនេះ ទឹកព្រែកបានជន់ឡើងលិចចូលតំបន់ទំនាបជាច្រើននៅក្នុងស្រុកទឹកឈូ ស្រុកឈូក ស្រុកជុំគិរី និងសង្កាត់មួយចំនួនដែលនៅជាយក្រុងកំពត ។ ភ្លៀងបន្តធ្លាក់ ទឹកពីតំបន់ខាងលើនៅតែបន្តហូរចាក់ចូល ដូចនេះទឹកព្រែកនឹងបន្តកើនឡើង ។

ទឹកជំនន់ខេត្តកំពត(រូបភាព៖ ក្រសួងធនធានទឹក)

ចំពោះខេត្តកំពង់ស្ពឺ ទឹកជំនន់ដោយទឹកភ្លៀង បានបណ្ដាលឲ្យស្រុកមួយចំនួននៅតាមបណ្ដោយផ្លូវជាតិលេខ៤។ គិតត្រឹមម៉ោង ៤:៣០ នាទី ទៀបភ្លឺ ថ្ងៃទី ១៩ ខែកក្កដា ឆ្នាំ ២០១៨ នេះ ទឹកជំនន់ដែលហូរកាត់ផ្លូវជាតិលេខ ៤ ត្រង់ចំណុចស្ពានសំរោង (គម ១១៦) ភូមិស្ទឹងសំរោង ឃុំអូរបាក់ទេះ ស្រុកកំពង់សីលា ខេត្តព្រះសីហនុ បានស្រកផុតស្ពានទាំងស្រុងហើយ។ ដោយឡែកនៅខាងកើតស្ពាន ទឹកមិនទាន់ស្រកផុតផ្លូវជាតិនៅឡើយទេ ដោយនៅបន្តហូរកាត់ផ្លូវប្រវែងប្រមាណ ១៥០ ម ក្នុងកម្ពស់ ០,៥ ម ។ ភ្លៀងនៅបន្តធ្លាក់ ប៉ុន្តែក្នុងកម្រិតខ្សោយ ដូចនេះទឹកអាចនឹងបន្តស្រកចុះមួយកម្រិតបន្ថែមទៀត។ ការធ្វើចរាចរឆ្លងកាត់ គឺនៅតែបន្តផ្អាកជាបណ្តោះអាសន្នដដែល ។

ទឹកជំនន់ខេត្តកំពង់ស្ពឺ(រូបភាព៖ រដ្ឋបាលខេត្តកំពង់ស្ពឺ)

ជាមួយគ្នានេះ ក្រសួងបានអំពាវនាវឲ្យប្រជាពលរដ្ឋដែលស្ថិតក្នុងតំបន់លិចលង់សូមប្រុងប្រយ័ត្នឲ្យបានខ្ពស់ ចំពោះកុមារតូចៗ ការរក្សាសុខភាព និងប្រកាសចាំបាច់ផ្សេងៗទៀត។ ជាពិសេសប្រជាពលរដ្ឋដែលជាប្រជានេសាទ និងអ្នកធ្វើដំណើរតាមសមុទ្រ បង្កើនការប្រុងប្រយ័ត្នខ្ពស់ ដើម្បីជៀសគ្រោះថ្នាក់ផ្សេងដែលអាចកើតមានជាយថាហេតុ ក្រោយបានជូនដំណឹងការព្យាករណ៍អាកាសធាតុនៅយប់ថ្ងៃទី ១៧ កក្កដា ថា ខ្យល់មូសុងនិរតីខ្លាំង នៅតែបន្តមានឥទ្ធិពលមកលើកម្ពុជា ខណៈសម្ពាធទាបសកម្មមួយនៃប្រព័ន្ធសម្ពាធទាប បាននិងកំពុងបង្កើនឥទ្ធិពលលើតំបន់ផ្ទៃរងទឹកភ្លៀងទន្លេមេគង្គក្នុងប្រទេសថៃ និងប្រទេសឡាវ។ តំបន់ដែលរងឥទ្ធិលពលមាននៅខេត្តជាប់សមុទ្រ ជាពិសេស កោះកុង និងខេត្តព្រះសីហនុ និងបណ្ដាខេត្ត-រាជធានីផ្សេងៗនឹងមានភ្លៀងធ្លាក់រាយប៉ាយក្នុងកម្រិតពីតិចទៅបង្គួរ។