តាមការលើកឡើងរបស់បុគ្គលិកសារព័ត៌មាន Cnet លោក Scott Stein បានឲ្យដឹងថា ក្រុមហ៊ុនផលិតទូរសព្ទធំលេខមួយរបស់ប្រទេសកូរ៉េខាងត្បូង Samsung បានធ្វើឲ្យបែកធ្លាយរូបភាពនាឡិកាដៃឆ្លាតវៃ (Smart watch) ជំនាន់ថ្មីរបស់ខ្លួន ហើយអ្វីដែលរឹតតែច្បាស់ទៀតនោះ ប្រភពដែលរូបភាពនេះលេចធ្លាយ គឺនៅលើគេហទំព័ររបស់ Samsung នៅសហរដ្ឋអាមេរិកតែម្ដង។

Did Samsung just leak its own Samsung Galaxy Watch? Because it seems to be on Samsung's US site. https://t.co/9xKpt8jkzN via @CNET

— Scott Stein (@jetscott) July 23, 2018

បើមើលតាមរូបភាពបែកធ្លាយនោះ នាឡិកាឆ្លាតវៃជំនាន់ថ្មីនេះ មានទំហំ ៤២ ម.ម ពណ៌មាសស៊ីជម្ពូ (rose gold) ដែលមើលទៅស្រដៀងនឹងនាឡិកាឆ្លាតវៃ Gear S3 Classic មិនមានអ្វីផ្លាស់ប្ដូរច្រើនឡើយ។ ប៉ុន្តែ បើមើលតាមឈ្មោះនាឡិកាដែលចេញមកនេះ មើលទៅSamsung នឹងបោះបង់ការប្រើប្រាស់លេខ ដើម្បីមកសម្គាល់ជំនាន់របស់នាឡិកាឆ្លាតវៃរបស់ខ្លួនទៀតហើយ ដោយដាក់ឈ្មោះថា Galaxy Watch តែម្ដង។

គេនៅមិនទាន់ដឹងពីតម្លៃនៃនាឡិកាឆ្លាតវៃស៊េរីថ្មីនេះនៅឡើយទេ ប៉ុន្តែបើនិយាយពីបច្ចេកវិទ្យានៅខាងក្នុងវិញ Galaxy Watch អាចនឹងដំណើរការដោយប្រព័ន្ធប្រតិបត្តិការចុងក្រោយរបស់ Samsung ដែលមានឈ្មោះថា Tizen ហើយជំនួយការឆ្លាតវៃ Bixby ដែលគេឃើញមាននៅលើទូរសព្ទត្រកូល Galaxy S និង Note នោះក៏ប្រហែលជាមកជាមួយគ្នាដែរ។

យ៉ាងណាមិញ ក្រុមហ៊ុន Samsung បានដករូបភាព Galaxy Watch នោះចេញពីគេហទំព័ររបស់ខ្លួនហើយ ក្រោយពេលឃើញព័ត៌មានលេចធ្លាយនេះ។

ចុចអាន៖

• ស៊យធំ បើគ្រឿង​អេឡិចត្រូនិកចូលទឹក​ កុំ​ឲ្យ​ធ្ងន់ទាន់ ​ត្រូវ​ធ្វើ​ ៤ រឿង​នេះភ្លាម

• ចេញ​​តម្លៃ Galaxy Note9 ទំហំ​ ៥១២ GB ឃើញ​អាច​ស្លុត

ប្រភព៖ theverge   ប្រែ​សម្រួល៖ ផាត សុវត្ថិ