អភិបាលខេត្តកោះកុងធ្វើបែបណា ក្រោយក្រុមហ៊ុន១ធ្វើឲ្យសណ្ឋាគារដ៏ល្បី 4 Rivers ដាច់ដោចខ្ទេច

  • 2018-07-25 04:04:56
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ឆ្លើយ​តប​ជាមួយ Sabay នៅ​ព្រឹក​ថ្ងៃ​ទី​២៥ ខែ​កក្កដា ឆ្នាំ​២០១៨​នេះ លោក​ជំទាវ​មិថុនា ភូថង គណៈ​អភិបាល​ អភិបាល​ខេត្ត​កោះកុង បាន​ឲ្យ​ដឹង​ថា ពេល​នេះ​កំពុង​ត្រៀម​កោះ​ហៅ​ក្រុមហ៊ុន​វារី​អគ្គិសនី​ស្ទឹង​តាតៃ​ និង​ភាគី​រងគ្រោះ​សណ្ឋាគារ​បណ្ដែត​​ទឹក​ 4 Rivers ដើម្បី​បើក​អង្គប្រជុំ​រក​ដំណោះ​ស្រាយ និង​ចាត់​វិធានការ​ក្រោយ​ក្រុមហ៊ុន​វារី​អគ្គិសនី​មួយ​នេះ​បាន​បើក​ទ្វារ​ទឹក​របស់​ខ្លួន ដែល​បណ្ដាល​សណ្ឋាគារ 4 Rivers ក៏​ដូចជា​​ផ្ទះ​សម្បែង​បងប្អូន​ប្រជាពលរដ្ឋ​នៅ​ផ្នែក​ខាង​ក្រោម​មួយ​ចំនួន​បាន​រង​ការ​ខូចខាត​ជា​ទម្ងន់។

សណ្ឋាគារ 4 Rivers កាលមិនទាន់បំផ្លាញដោយទឹក

អភិបាល​ខេត្ត​កោះកុង​បន្ត​ថា មិន​ទាន់​បាន​ដឹង​ព័ត៌មាន​លម្អិត​អំពី​ការ​បើក​ទ្វារ​ទឹក​របស់​ក្រុមហ៊ុន​វារីអគ្គិសនី​ស្ទឹង​តាតៃ​យ៉ាង​ណា​នោះ​ទេ។ ប៉ុន្តែ​លោក​ជំទាវ​បាន​ទទួល​បាន​ព័ត៌មាន​ថា សណ្ឋាគារ​បណ្ដែត​ទឹក4 Rivers បាន​រង​ការ​ខូច​ខាត​ជា​ខ្លាំង ក្រោយ​រលក​ធំៗ​បាន​បុក​ក្រោយ​ក្រុមហ៊ុន​វារី​អគ្គិសនី​ខាង​លើ​បាន​ទ្វារ​ទឹក។ ដូច្នេះ​ហើយ​ពាក់ព័ន្ធ​នឹង​ករណី​នេះ ត្រូវ​តែ​បើក​អង្គប្រជុំ​ដើម្បី​ស្វែង​រក​ដំណោះ​ស្រាយ និងចាត់​វិធានការ​ជា​បន្តបន្ទាប់។ ដោយ​ឡែក​ចំពោះ​ផល​ប៉ះពាល់​ដល់​ផ្ទះ​សម្បែង​ប្រជាពលរដ្ឋ​មាន​តែ​២​គ្រួសារ​ប៉ុណ្ណោះ​ ដែល​លោក​ជំទាវ មិថុនា ភូផង បាន​ទទួល​ការ​ជូន​ដំណឹង​ពី​មេឃុំ។

ដោយ​ឡែក​បើ​តាម​ការ​ឲ្យ​ដឹង​ពី​លោក VALENTIN PAWLIK បាន​ឲ្យ​ដឹង​ថា នៅព្រឹក​ថ្ងៃទី១៧ ខែកក្កដា ឆ្នាំ២០១៨ សណ្ឋាគារអណ្តែតទឹក 4 Rivers ត្រូវបានបំផ្លាញដោយសារ​ទឹកឡើងខ្លាំងភ្លាមៗព្រោះក្រុមហ៊ុនវារី​អគ្គិសនីស្ទឹងតាតៃ បើក​ទ្វារទឹកនៃអាងស្តុកទឹករបស់ខ្លួន។ ក្រុមហ៊ុន​គ្រប់គ្រងវារី​អគ្គិសនីស្ទឹងតាតៃ​បាននិយាយថា​ពួកគេមិនបានប្រាប់ប្រជាពលរដ្ឋឲ្យដឹងជាមុននោះទេព្រោះបរិមាណទឹកភ្លៀងឡើងលឿនពេក។

​​

​លោក​បន្ត​ថា ទឹកភ្លៀងរដូវវស្សាមិនដែលបង្កជាក្តីបារម្ភនោះទេ​នា​ពេលកន្លងមក។ គ្រោងសណ្ឋាគារ​ទាំងមូល​ត្រូវបាន​រចនាដោយយកចិត្តទុកដាក់ដើម្បីអាចប្រែប្រួលតាមភាព​ឡើងចុះនៃ​កម្រិតទឹក​នៅរដូវវស្សារហូត​ដល់​កម្ពស់ ២ម៉ែត្រ ដូចនេះអាចធានានូវសុវត្ថិភាពទាំងស្រុងគ្រប់ពេល។ ជារៀងរាល់ឆ្នាំ ក្រុមបច្ចេកទេស​របស់​សណ្ឋាគារ​អណ្តែតទឹក 4 Rivers តែងចុះពិនិត្យលម្អិតរាល់គ្រោង​​បណ្តែតទឹកក្នុងខែឧសភា និងមិថុនា និងបានរឹតបន្តឹងប្រព័ន្ធខ្សែលួសចងភ្ជាប់នឹងច្រាំង។

ម្ចាស់​សណ្ឋាគារ​ខាង​លើ​នេះ​មាន​ការ​ការ​ភ្ញាក់ផ្អើល​ជា​ខ្លាំង​ នៅ​ម៉ោង ៦ព្រឹកនៃថ្ងៃទី១៧ ខែកក្កដា រលកទឹក​ដ៏ខ្លាំងហូរចេញ​ពីវារីអគ្គិសនីស្ទឹងតាតៃនាំយកមកជាមួយនូវដើមឈើងាប់ធំៗ និងបានបុកទង្គិចនឹង​គ្រោង​សណ្ឋាគារ​អណ្តែត​ទឹក 4 Rivers តែម្តង។ ដោយសារសម្ពាធរួមគ្នានៃរលកទឹកយ៉ាងលឿន និង​កម្លាំង​ទង្គិច​នៃ​ដើម​ឈើ ប្រព័ន្ធខ្សែលួសដែលចងភ្ជាប់សណ្ឋាគារអណ្តែតទឹក 4 Rivers ទៅនឹងច្រាំងបានដាច់ គ្រោង​ត្រូវ​រមួល​ត្រកួញ និងខូចខាតជា៦បំណែកដាច់ពីគ្នា។

ផ្នែកខ្លះនៃសណ្ឋាគារ​មានវត្តមានបុគ្គលិក មនុស្សពេញវ័យ  និងកុមារ ៤០នាក់​រួមទាំងភរិយា និង​កូន​ប្រុសរបស់ម្ចាស់សណ្ឋាគារផង ត្រូវបានចរន្តទឹកបញ្ជូនរហូតដល់ចម្ងាយជាង​៨គីឡូម៉ែត្រពីទីតាំងដើម ធ្វើឲ្យ​គ្រោង​សណ្ឋាគារ​រហែកពីគ្នា និងរសាត់តាមព្រែករហូតដល់កោះស្មាច់។ យ៉ាង​ណា​ក្ដី​ពួក​គេត្រូវ​បាន​សង្គ្រោះ​ទាន់​ពេល​វេលា​មិន​មាន​នរណាម្នាក់​រងគរបួស ឬ​បាត់បង់​អាយុ​ជីវិត​ឡើយ។ នេះ​​បើ​តាម​ការ​ឲ្យ​បន្ថែម​ពី​លោក VALENTIN PAWLIK។

ម្ចាស់​សណ្ឋាគារ​ 4 River បាន​ទាមទារ​ឲ្យ​ក្រុមហ៊ុនវារី​អគ្គិសនីស្ទឹងតាតៃ​ដែលជាក្រុមហ៊ុនចិន​គ្រប់គ្រងដំណើរការ​ទំនប់វារីអគ្គិសនីគួរតែបង់ថ្លៃជួស​ជុលការខូចខាតនេះ។ ការខូចខាតនេះមិនរាប់បញ្ចូលផល​ប៉ះពាល់​ផ្លូវចិត្ត​ដ៏រន្ធត់​កើត​ឡើង​ចំពោះ​គ្រួសារ និងបុគ្គលិករបស់​លោក​ទាំងអស់គ្នា​ ដែល​រងការភ័យខ្លាចបាត់​បង់ជីវិត​ខណៈពួក​គេ​ស្ថិតលើ​គ្រោងទម្រដាច់រសាត់អណ្តែត​ដោយល្បឿនទឹកលឿនឆ្ពោះទៅសមុទ្រ៕

អត្ថបទ៖ ថោ ច័ន្ទឬទ្ធិ

រូបភាព៖ ផ្ដល់ឲ្យ