ទឹកទន្លេសេកុងស្រកបានបន្តិច តែប្រជាជនស្ទឹងត្រែងត្រូវការពាររឿង៣យ៉ាង

2018-07-27 09:04:42
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតមកដល់ម៉ោង៣រសៀលថ្ងៃទី ២៧ កក្កដា ឆ្នាំ ២០១៨ នេះ ទឹកទន្លេសេកុង នៅចំណុចព្រំប្រទល់ កម្ពុជា-ឡាវ បានស្រកចុះ ០,៦០ម៉ែត្រ ហើយ។ ក្រសួងធនធានទឹក បញ្ជាក់ថា ទឹកទន្លេសេកុងនៅផ្នែកខាងក្រោម នឹងចាប់ស្រកចុះជាបន្តបន្ទាប់។

កាលពីថ្ងៃ ២៦ កក្កដា ម្សិលមិញ ទឹកទន្លេសេកុង បានហក់ឡើងកម្ពស់ ១២,០០ម៉ែត្រ លើសពីកម្រិតប្រកាសអាសន្ន ដោយអាជ្ញាធរខេត្តស្ទឹងត្រែង បានជម្លៀសប្រជាពលរដ្ឋប្រមាណជាង ១២០០គ្រួសារ ទៅរកទីទួលដោយសុវត្ថិភាព។

រូបកាលពីថ្ងៃទី ២៥ កក្កដា

ជាមួយគ្នានេះ រដ្ឋមន្ត្រីក្រសួងសុខាភិបាល ឯកឧត្ដមសាស្ត្រាចារ្យ ម៉ម ប៊ុនហេង បានអំពាវនាវឲ្យពលរដ្ឋ ដែលកំពុងនៅតាមតំបន់មានទឹកជំនន់ សូមប្រុងប្រយ័ត្ន៣ ចំណុចខាងក្រោម ដើម្បីចៀសវាងផលប៉ះពាល់សុខភាព របួស ឬហេតុការគ្រោះថ្នាក់អាយុជីវិត ពីទឹកជំនន់។

១. មុនទឹកជំនន់

ត្រូវតាមដានស្ថានភាពទឹកជំនន់ ត្រៀមទីទួលសុវត្ថិភាព និងស្បៀងអាហារ ធ្វើរបងព័ទ្ធស្រះ ឬកន្លែងដែលមានទឹកជ្រៅ ជាដើម។

២. អំលុងពេលមានទឹកជំនន់

មិនត្រូវនៅក្នុងផ្ទះចាស់ៗ ឬទ្រុឌទ្រោម ព្រោះអាចនឹងបាក់បង្កគ្រោះថ្នាក់
មិនត្រូវប៉ះពាល់គ្រឿងប្រើប្រាស់អគ្គិសនី ដោយដៃសើម ឬពេលឈរក្នុងទឹក
នៅពេលធ្វើដំណើរតាមទូក ឬកាណូតនៅពេលយប់ត្រូវមានភ្លើងបំភ្លឺ។ល។
ត្រូវសម្រាន្តក្នុងមុងគ្រប់ពេល ដើម្បីបង្ការជំងឺគ្រុនចាញ់ គ្រុនឈាម និងជំងឺផ្សេងៗ
ត្រូវប្រុងប្រយ័ត្នចំពោះកុមារី និងក្មេងស្រី នៅទីទួលសុវត្ថិភាព ក្រែងមានអំពើហិង្សាផ្លូវភេទ។

៣. ក្រោយពេលទឹកជំនន់

បន្តបរិភោគចំណីអាហារស្អាត ទឹកស្អាតមានអនាម័យ និងអនាម័យខ្លួនប្រាណ ដើម្បីចៀសវាងនូវជំងឺផ្សេងៗ៕