ស្រ្តីខ្មែរ បង្កើតស្នាដៃច្នៃគ្រឿងតុបតែងក្នុងផ្ទះ ល្បីខ្លាំងនៅខេត្តសៀមរាប

2018-08-02 06:57:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្រ្តីមួយរូបបានបង្កើតការច្នៃប្រឌិតដោយច្នៃចង្កៀងអគ្គិសនីបែបខ្មែរ និងគ្រឿងសម្ភារតុបតែងក្នុងផ្ទះ កំពុងទទួលការចាប់អារម្មណ៍ខ្លាំងនៅក្នុងខេត្តសៀមរាប។ ចង់ដឹងថា ស្រ្តីរូបនោះជានរណា និង មានទេពកោសល្យដូចម្ដេច សូមទស្សនារូបភាព និងការរៀបរាប់ខាងក្រោមនេះ៖

១. អ្នកស្រី រី ថានី វ័យ ២៧ឆ្នាំ ជាស្ថាបនិក និងជានាយកប្រតិបត្តិនៃក្រុមហ៊ុន Norea Angkor Handicraft Co. LTD ដែលមានទីតាំងនៅក្នុងក្រុងសៀមរាប។ ដោយមើលឃើញពីសក្តានុពល នៃការលក់ចង្កៀងអគ្គិសនីបែបខ្មែរ និងគ្រឿងសម្ភារតុបតែងក្នុងផ្ទះ និងដើម្បីរួមចំណែកផ្ដល់ការងារដល់ពលរដ្ឋក្នុងស្រុក អ្នកស្រី ថានី បានបង្កើតក្រុមហ៊ុននេះនៅឆ្នាំ ២០១១ បន្ទាប់ពីអ្នកស្រីត្រឡប់មកពីបំពេញការងារនៅប្រទេសសិង្ហបុរីវិញ។

២. បច្ចុប្បន្នក្រុមហ៊ុន Norea Angkor Handicraft Co. LTD ឬ ហៅ ដោយខ្លីថា Norea Decor មានបុគ្គលិក៣០នាក់ ហើយដែល៨០% គឺជាបុគ្គលិកស្ត្រី។ បុគ្គលិកទាំងនោះ មានតាំងពីជាងដែក ជាងឈើ ជាងកាត់ដេរ និង អ្នកដំឡើងចង្កៀងជាដើម។ នៅក្នុងរូបនេះ អ្នកស្រី រី ថានី កំពុងធ្វើការជាមួយជាងឈើ ដើម្បីរៀបចំដំឡើងថតទូមួយ។

៣. ការផលិតចង្កៀងអគ្គិសនីដែលមានរចនាបែបខ្មែរ គឺជាការងារដែលមមាញឹកជាងគេរបស់ Norea Decor។ ការងារនេះត្រូវចាប់ផ្តើមពីការដំឡើងស៊ុមចង្កៀង ដោយវាស់ដែក កាត់ដែក ពុតដែក និងផ្សារដែកឱ្យចេញទៅជារូបរាងស្អាត ដែលមើលទៅទាក់ភ្នែកអតិថិជន។ នៅក្នុងរូបនេះ ជាងដែកកំពុងផ្សារដែកដំឡើងស៊ុមចង្កៀង ដែលមានរាងជាផ្ការំដួល។

៤. ក្រោយពីផ្សារដំឡើងជាគ្រោងស៊ុមចង្កៀងរួចហើយ គ្រោងដែកទាំងនោះនឹងត្រូវគេយកទៅបាញ់ថ្នាំ ដើម្បីការពារច្រែះចាប់។ បន្ទាប់មក កម្មករផ្សេងទៀតនឹងយកផ្ទាំងក្រណាត់ដែលជាងកាត់តាមទំហំរួចហើយ ទៅបិទនឹងគ្រោងដែកនោះ។ភាគច្រើននៃការងារបែបនេះ ត្រូវធ្វើដោយបុគ្គលិកនារីៗ ព្រោះជាការងារស្រាល ហើយទាមទារការផ្ចិតផ្ចង់ខ្លាំង។ នៅក្នុងរូបនេះ បុគ្គលិករបស់អ្នកស្រី រី ថានី កំពុងបិតក្រណាត់លើគ្រោងស៊ុមចង្កៀងរូបផ្ការំដួល។

៥. នេះរូបភាព នៃការដាក់តាំងចង្កៀងផ្សេងៗ នៅក្នុងបន្ទប់ទទួលភ្ញៀវរបស់ ក្រុមហ៊ុន Norea Angkor Handicraft Co. LTD។ ក្រៅពីការផលិតចង្កៀង អគ្គិសនីដើម្បីបំពេញតម្រូវការក្នុងស្រុក ក្រុមហ៊ុននេះ ក៏មានផលិត សម្ភារមួយចំនួនទៀតដែរដូចជា វាំងនន ទូដាក់សម្ភារ ខ្នើយ ក្របម៉ឺនុយធ្វើពីក្រណាត់ គ្រឿងសង្ហារិមផ្សេងៗទៀត៕

អត្ថបទ៖ ក្រុមការងារផ្លូវទៅស្រុក