សម្តេចតេជោ ហ៊ុន សែន ស្នើសុំក្រុមកីឡាតែ២ចំណុចទៅ Asian Games
- 2018-08-06 03:23:16
- ចំនួនមតិ 0 | ចំនួនចែករំលែក 0
សម្តេចតេជោ ហ៊ុន សែន ស្នើសុំក្រុមកីឡាតែ២ចំណុចទៅ Asian Games
ចន្លោះមិនឃើញ
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានជួបសំណេះសំណាលជាមួយអត្តពលិក និងគណៈប្រតិភូកីឡាកម្ពុជា នាព្រឹកថ្ងៃចន្ទ ទី៦ ខែសីហានេះមុនពេលក្រុមកីឡាកម្ពុជាចេញទៅប្រកួតកីឡាទ្វីបអាស៊ី Asian Games នៅប្រទេសឥណ្ឌូណេស៊ី។
ក្នុងពិធីសំណេះសំណាលចំពោះមុខក្រុមកីឡាករ កីឡាការិនី គ្រូបង្វឹក និងថ្នាក់ដឹកនាំ សម្តេចតេជោ ហ៊ុន សែន បានស្នើសុំចំណុចសំខាន់២យ៉ាងជាចាំបាច់ដែលសម្តេចចង់បានបំផុតពេលកម្ពុជាចូលរួមប្រកួតកីឡាទ្វីបអាស៊ី Asian Games 2018 នាពេលខាងមុខនេះ។
ទី១៖ កីឡាករ កីឡាការិនី និងគ្រូបង្វឹកកម្ពុជាត្រូវប្រកាន់ភ្ជាប់ឲ្យបានម៉ត់ចត់ចំពោះបទបញ្ជា និងគោលការណ៍នៃការប្រកួត។ ទោះបីជាឈ្នះក្តី ចាញ់ក្តី ប៉ុន្តែតែគោរពបទបញ្ជា និងគោលការណ៍ប្រកួតឲ្យបានត្រឹមត្រូវ។
ទី២៖ កីឡាករ កីឡាការិនីកម្ពុជាដាច់ខាតត្រូវជៀសវាងឲ្យបាន១០០%ពីការប្រើប្រាស់សារធាតុហាមឃាត ពីព្រោះនេះជាចំណុចដ៏សំខាន់បំផុតសម្រាប់មុខមាត់ប្រទេសជាតិ។
ក្នុងពិធីសំណេះសំណាលនេះដែរ សម្តេចតេជោ ហ៊ុន សែន បានឧបត្ថម្ភថវិកាដល់ក្រុមកីឡា និងថ្នាក់ដឹកនាំទាំងអស់ចំនួន៧១នាក់ដែលម្នាក់ៗទទួលបាន៥០០ដុល្លារអាមេរិក (សរុបទាំងអស់ចំនួន ៣៥ ៥០០ ដុល្លារ)។ កីឡាទ្វីបអាស៊ីឆ្នាំ២០១៨នេះកម្ពុជានឹងបញ្ជូនកីឡា១៣ប្រភេទដែលមានកីឡាករ កីឡាការិនី៤៣នាក់ គ្រូបង្វឹក១៦នាក់ និងថ្នាក់ដឹកនាំ១២នាក់៕