មន្ត្រីជាន់ខ្ពស់ក្រសួងអប់រំ និយាយអ្វីខ្លះពីវិញ្ញាសាប្រលងបាក់ឌុបឆ្នាំនេះ?

2018-08-09 08:20:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងអប់រំ យុវជន និងកីឡា បានត្រៀមខ្លួនរួចជាស្រេច ក្នុងការរៀបចំការប្រលងសញ្ញាបត្រមធ្យមសិក្សាទុតិយភូមិបាក់ឌុបឆ្នាំ ២០១៨ នេះ ខណៈការប្រលងនៅតែមានការរឹតបន្តឹង និងធ្វើឱ្យកាន់តែល្អជាងឆ្នាំមុនៗ។

ដោយនិយាយផ្ដោតតែលើវិញ្ញាសាប្រលងក្នុងឆ្នាំនេះ លោក អ៊ឹង ង៉ោហុក ប្រធាននាយកដ្ឋានកិច្ចការប្រឡង នៃក្រសួងអប់រំយុវជន និងកីឡាបានថ្លែងថា វិញ្ញាសាប្រលង គឺក្រសួងអប់រំនៅតែខិតខំរក្សាស្តង់ដាឱ្យនៅដដែលដូចគ្នានឹងឆ្នាំមុនដែរ ពោលគឺក្រសួងអប់រំមិនរឹតបន្តឹងឱ្យខ្ពស់ជាងមុន ឬ ទាបជាងនោះទេ។ លោកថា ក្រសួងបានវាស់ស្ទង់សមត្ថភាពបេក្ខជនរួចជាស្រេចមុននឹងចេញវិញ្ញាសា ខណៈសិស្សជាច្រើនបានខិតខំរៀនបំប៉នសម្រាប់ការប្រលងថ្នាក់ជាតិមួយនេះ។ បន្ថែមលើនេះក្រសួងអប់រំក៏បានសង្ខេបមេរៀនទាំងផ្នែកវិទ្យាសាស្ត្រ និងសង្គមដល់បេក្ខជនផងដែរ។

ការប្រលងបាក់ឌុប នឹងប្រព្រឹត្តិទៅនៅថ្ងៃទី ២០-២១ ខែសីហានេះ មានមណ្ឌលប្រលងចំនួន ១៩៦មណ្ឌល និងមានបេក្ខជនទាំងអស់ចំនួន ១សែន១ម៉ឺន៧ពាន់០៦១នាក់។

លោកបានបន្ថែមថា តាមរយៈកំណែទម្រង់ការប្រលង ដែលបានចាប់ផ្ដើមតាំងពីឆ្នាំ ២០១៤ មកនោះ គឺពុំមានករណីស៊ីសំណូកសូកប៉ាន់ ការបើកសំណៅឯកសារមើលពេលប្រលង និងការបែកធ្លាយវិញ្ញាសាប្រលងនោះទេ។ “អញ្ចឹងជាគោលការណ៍អ្នកចេះ គឺជាប់ហ្នឹង គឺក្រសួងអប់រំធ្វើបានពិតប្រាកដ ក្នុងរយៈពេលតាំងពីឆ្នាំ២០១៤ ហើយឆ្នាំនេះ គឺជាឆ្នាំទី៥ នឹងខិតខំទប់ស្កាត់ និងលុបបំបាត់បញ្ហាទាំងអស់នេះមិនឱ្យកើតមានជាដាច់ខាត”។

សម្រាប់ការប្រលងបាក់ឌុបឆ្នាំនេះ គឺក្រសួងអប់រំមានចំណុចកំណែទម្រង់មួយសំខាន់គឺ ការត្រួតពិនិត្យមណ្ឌលប្រលងយ៉ាងហ្មត់ចត់ ដែលដឹកនាំផ្ទាល់ពីរដ្ឋលេខាធិការ អនុរដ្ឋលេខាធិការ អគ្គនាយក និងប្រធាននាយកដ្ឋាន ក្រសួងអប់រំយុវជន និងកីឡា មានភារកិច្ចចុះទៅមើលមណ្ឌលផ្ទាល់។ ដូច្នេះសុវត្ថិភាពមណ្ឌលត្រូវបានធានា។ “អញ្ចឹងលើសពីនេះក្រៅពីមានការចុះត្រួតពិនិត្យមណ្ឌលសំណេរទាំង ១៩៦ ទូទាំងប្រទេសពីក្រសួងអប់រំ ក៏មានការចុះបន្ថែមពីអង្គភាពប្រឆាំងអំពើពុករលួយផងដែរ ព្រោះអង្គភាពប្រឆាំងអំពើពុករលួយគាត់មានភារកិច្ចចូលរួមសង្កេតការណ៍ដូច្នេះគាត់ត្រូវចុះមើលមុនដែរ ហើយមណ្ឌលនិមួយៗមិនមានបញ្ហារបង ជញ្ជាំង និងដំបូលធ្លុះធ្លាយនោះទេ”។

ជាជំនួយស្មារតីដល់បេក្ខជនប្រលង ក្រសួងអប់រំយុវជន និងកីឡាបានបង្ហាញពីមេរៀនសង្ខេប និងលំហាត់គំរូសម្រាប់ត្រៀមប្រលងសញ្ញាបត្របាក់ឌុប លើមុខវិជ្ជាសំខាន់ៗមួយចំនួន។ ប៉ុន្តែយ៉ាងណាក្តីនេះគ្រាន់តែជាឯកសារជំនួយប៉ុណ្ណោះ តែមិនមែនជាឯកសារពេញលេញសម្រាប់កម្មវិធីសិក្សាថ្នាក់ទី ១២នោះទេ។

ឆ្នាំនេះ គឺជាឆ្នាំចុងក្រោយនៃអាណត្តិទី៥ របស់រាជរដ្ឋាភិបាល ដែលបានកែទម្រង់ការប្រលងសញ្ញាបត្រមធ្យមសិក្សាទុតិយភូមិ (បាក់ឌុប) ក្រោមពាក្យស្លោក “អ្នកចេះគឺជាប់”៕