Travis លែងអង្គុយជិត Nicki Minaj ក្រោយនាងចោទលោកថាខ្ចីខ្លួន Kylie ដើម្បីផ្សព្វផ្សាយអាល់ប៊ុម

2018-08-21 03:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារារ៉េប Travis Scott មិនត្រូវបានអង្គុយជិត Nicki Minaj ទៀតនោះទេក្នុងកម្មវិធីពានរង្វាន់ MTV VMAs ក្រោយតារាចម្រៀងស្រីរូបនេះ ចោទប្រកាន់លោក ថាបានខ្ចីខ្លួនមិត្តស្រីគឺ Kylie Jenner ដើម្បីផ្សព្វផ្សាយអាល់ប៊ុមថ្មីរបស់លោក។

បើតាមវិបសាយ TMZ បានឲ្យដឹងថា ក្នុងកម្មវិធីប្រគល់ពានរង្វាន់របស់ MTV VMAs លើកនេះ តារារ៉េប Travis បានរៀបចំឲ្យទៅអង្គុយនៅកៅអីក្រោយតារាចម្រៀង Nicki Minaj វិញ ដោយសារតែតារាទាំង២រូបនេះ ទើបតែមានជម្លោះពាក្យសម្ដីនឹងគ្នាកាលពីពេលថ្មីៗនេះដែរ។

គួររម្លឹកឡើងវិញថា កាលពីម្សិលមិញនេះ តារាចម្រៀង Nicki Minaj ខឹងសម្បានឹងតារារ៉េប Travis Scott ក្រោយអាល់ប៊ុមថ្មីរបស់នាង មិនបានស្ថិតលើកំពូលតារាង Billboard 200 Chart តែបែរជាបានទៅលើអាល់ប៊ុមថ្មីរបស់មិត្តប្រុស Kylie Jenner ទៅវិញ។ ជាមួយនឹងការបរាជ័យនេះដែរ តារាស្រីរូបនេះ បានសរសេរសារចោទប្រកាន់ Travis Scott ថា អាល់ប៊ុមរបស់លោកបានឡើងលើកំពូលតារាងបែបនេះ គឺដោយសារតែ Kylie Jenner ជួយផ្សព្វផ្សាយតែប៉ុណ្ណោះ៕

ប្រភព៖ Mirror ប្រែសម្រួល៖ អន សុភក្ត្រា