យុវជនថ្នាលទ្រីយ៉ាថ្លុង ទទួលបានកង់កម្រិតស្តង់ដារតម្លៃខ្ទង់ម៉ឺនដុល្លារសម្រាប់ហាត់

2018-08-27 07:26:24
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនថ្នាលកីឡាទ្រីយ៉ាថ្លុងកម្ពុជា ទទួលបានកង់ចំនួន១៤គ្រឿង និងសម្ភារជិះកង់១៤ឈុត ពីក្រុមហ៊ុនឯកជនមួយសម្រាប់យកទៅហ្វឹកហាត់ ក៏ដូចជាយកទៅប្រកួតក្នុងព្រឹត្តិការណ៍ផ្សេងៗនៅពេលខាងមុខ។

ទិដ្ឋភាពព្រឹកមិញ

លោក ងិន សុបញ្ញា អគ្គលេខាធិការសហព័ន្ធទ្រីយ៉ាថ្លុងកម្ពុជា បានឲ្យដឹងថា ក្រុមហ៊ុនលក់កង់ Giant បានឧបត្ថម្ភកង់កម្រិតស្តង់ដារអន្តរជាតិ រួមនិងសម្ភារទាំង១៤ឈុត ដែលគិតជាលុយខ្ទង់ម៉ឺនដុល្លារសម្រាប់ជួយដល់យុវជនថ្នាល។ ការជួយនេះដែរមិនមែនជាលើកទី១ឡើយសម្រាប់ក្រុមហ៊ុនឯកជនខាងលើនេះមកដល់សហព័ន្ធ ហើយនៅពេលខាងមុខនឹងជួយជំនួយផ្សេងៗទៀត អាស្រ័យលើការខំប្រឹងប្រែងរបស់កីឡាករ និងសហព័ន្ធផងដែរ។

ទិដ្ឋភាពព្រឹកមិញ

អគ្គលេខាធិការរូបនេះបន្ថែមថា ការជួយឧបត្ថម្ភនេះ គឺល្អ និងមានសារប្រយោជន៍ខ្លាំងដល់យុវជនថ្នាលនាពេលបច្ចុប្បន្ន ដើម្បីរឹតតែមានងាយ និងអំណោយផលក្នុងការហ្វឹកហាត់ឆ្ពោះទៅកាន់ស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ លោកដាស់តឿនដល់កីឡាករ កីឡាការិនីទាំងអស់ឲ្យខំប្រឹងហ្វឹកហាត់បន្ថែមទៀត ព្រោះអីមានឧបករណ៍ល្អ ត្រូវតាមស្តង់ដាររួចហើយ។

ទិដ្ឋភាពព្រឹកមិញ

រំលឹកដែរថា កម្មវិធីប្រគល់កង់កម្រិតស្តង់ដារអន្តរជាតិដល់សហព័ន្ធទ្រីយ៉ាថ្លុងកម្ពុជានេះ ធ្វើឡើងនៅក្នុងគណៈកម្មាធិការជាតិអូឡាំពិកកម្ពុជា កាលពីព្រឹកថ្ងៃចន្ទ ទី២៧ ខែសីហា ២០១៨។ កង់ដែលឧបត្ថម្ភទាំងអស់ចំនួន ១៤គ្រឿង និងសម្ភារសម្រាប់ជិះ១៤ឈុតផងដែរ៕

អត្ថបទ៖ នួន ស៊ីណា