៦ ចំណុចពិសេសៗ អ្នកគាំទ្រចង់ឲ្យលេចចេញលើ OnePlus 6T ឆ្នាំនេះ

2018-08-30 12:57:08
ចំនួនមតិ 0 | ចំនួនចែករំលែក 0

ចន្លោះមិនឃើញ

OnePlus 6T របស់ក្រុមហ៊ុនចិនឆ្នាំនេះ រំពឹងនឹងបង្ហាញខ្លួននាខែតុលា ឆ្នាំ ២០១៨ ជាមួយតម្លៃក្បែរ ៥៥០ ដុល្លារ។ ប៉ុន្តែមុនដល់ថ្ងៃចេញផ្សាយផ្លូវការ ក៏មាន ៦ ចំណុចធំៗ ដែលអ្នកគាំទ្រត្រកូល OnePlus ភាគច្រើនចង់ឲ្យក្រុមហ៊ុនត្រៀមបំពាក់លើម៉ូឌែលក្រោយនេះ។

១.បច្ចេកវិទ្យាស្កេនខ្ចៅដៃក្រោមអេក្រង់:

ទាំង VIVO និង OPPO ត្រកូលគ្រួសារតែមួយជាមួយក្រុមហ៊ុន OnePlus សុទ្ធសឹងបំពាក់បច្ចេកវិទ្យាទំនើបនេះរួចអស់ហើយ នៅឡើយតែ 6T ក៏ត្រូវបានសង្ឃឹមយ៉ាងមុតមាំថានឹងដើរឲ្យទាន់មុខងារទំនើបនាឆ្នាំ ២០១៨ ជៀសវាងអូសបន្លាយដល់ឆ្នាំក្រោយ។ មួយផ្សេងទៀតបើ OnePlus អាចធ្វើបាន នោះក៏នឹងប្រជែង iPhone សេរ៊ីថ្មីត្រៀមប្រើត្រឹម Face ID ស្របពេល Pixel 3 របស់ Google ល្ហិចល្ហៀងថាមានត្រឹមទ្រនាប់ស្កេនខ្ចៅដៃធម្មតា។

២.បំពាក់ប្រអប់បន្ថែម microSD ត្រលប់មកវិញ:

ចាប់តាំងពី OnePlus 3 លែងមានទៀតហើយរន្ធបន្ថែម microSD Card នៅខាងក្រៅ ដោយហេតុផលថាបញ្ចៀសបញ្ហាប្រព័ន្ធសុវត្ថិភាពនិងដំណើរការល្បឿនម៉ាស៊ីន។ ប៉ុន្តែសម្របនឹងតម្រូវការប្រើប្រាស់សព្វថ្ងៃរបស់អតិថិជន ទំហំអង្គផ្ទុកធំពិតជាកត្តាចាំបាច់មួយ។

៣.អាវក្រោះការពារទឹក:

OnePlus 6 មានត្រឹមមុខងារការពារទឹកកម្រិតមធ្យម ដែលត្រឹមចំហាយទឹកល្មមៗអាចស៊ូរួច តែយកទៅងូតទឹកនៅធ្វើពុំបាននោះទេ។ ស្តង់ដារ IP កម្រិតខ្ពស់រំពឹងនឹងមានលើ OnePlus សេរ៊ីឆ្នាំ ២០១៨ នេះ។

៤.អេក្រង់កម្រិត HDR:

ទំហំអេក្រង់ក្បែរ ៦ អ៊ីញ ល្មមសក្ដិសមនឹងកម្រិតបង្ហាញ HDR ទើបសមល្មមនឹងតម្លៃ ក៏ដូចជាងាយស្រួលក្នុងការទស្សនាភាពយន្តឬវីដេអូលើ Netflix និង YouTube ជាដើម។

៥.សូមគ្មានអេក្រង់ឆក:

Vivo និង Oppo បានកែប្រែរចនាបថអេក្រង់ឆក មកត្រឹមផ្ទៃរាបស្មើលើត្រកូល Nex និង Find X ចុះ OnePlus 6T? ស្របពេល OnePlus 6 ឆ្នាំទៅគ្មានខុសអ្វីឡើយធៀបនឹង iPhone X ជាកត្តាធ្វើឲ្យអតិថិជនមានការអន់ចិត្ត ដោយចង់បានរបស់មួយប្លែកពីស្មាតហ្វូនដទៃ ប៉ុន្តែបើចម្លើយបដិសេធក៏សូមត្រឹមឆកតូចល្មមដូចមានលើ R17 និង V11។

៦.រចនាពណ៌ឆើតបែប Unicorn:

មិនថា Huawei ឬ Oppo ការលាយឡំពណ៌ចម្រុះចេញជាពណ៌តែមួយលើស្មាតហ្វូនសេរ៊ីក្រោយ ហាក់កំពុងទទួលបានការចាប់អារម្មណ៍ ជាពិសេសលើត្រកូល P20 និង P20 Pro ចុះ OnePlus អាចធ្វើបែបនេះបានទេ?