អ្នកជំនាញអចលនទ្រព្យ៖ ការបំបែកខេត្តពីរទៀតនឹងធ្វើឱ្យតម្លៃដីអាចហក់ឡើង១គុណនឹង១០០

2018-09-01 07:48:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈរាជរដ្ឋាភិបាលកម្ពុជាព្រមព្រាងបង្កើតខេត្តពីរបន្ថែមទៀត អ្នកជំនាញផ្នែកអចលនទ្រព្យនៅកម្ពុជាមានសុទិដ្ឋិនិយមថា នឹងរុញល្បឿនការអភិវឌ្ឍ ព្រមទាំងតម្លៃដីធ្លីនៅតំបន់នោះ ឱ្យហក់ខ្ពស់ជាងមុន។ ហក់ឡើងអាច១គុណនឹង ១០០% ឬលើសពីនេះ។

កាលពីថ្ងៃទី២៨ ខែសីហា ២០១៨ សម្ដេចនាយករដ្ឋមន្ត្រី ហ៊ុន សែន បានចារយល់ព្រមតាមសំណើរបស់ក្រសួងមហាផ្ទៃ ដើម្បីសិក្សាលទ្ធភាពរៀបចំបង្កើតខេត្តថ្មីចំនួន២។

សូមចុចអាន៖ ឆ្នាំ២០១៩ ពលរដ្ឋខ្មែររស់នៅខេត្តទាំង២នេះ ត្រៀមមានឈ្មោះរស់នៅក្នុងខេត្តថ្មី

លោក ស៊ា ឆៃលីន អគ្គនាយកក្រុមហ៊ុនឆៃ លីនស៊ា CL Realty បានឱ្យដឹងតាមទូរសព្ទថា តាមបទពិសោធន៍កន្លង ការបំបែកខេត្ត ឬក្រុងថ្មី គេត្រូវអភិវឌ្ឍន៍នូវហេដ្ឋារចនាសម្ព័ន្ធជាច្រើន ដើម្បីទាក់ទាញប្រជាពលរដ្ឋមករស់នៅកាន់តែច្រើន។ ជាក់ស្ដែងដូចជាការបំបែកខេត្តត្បូងឃ្មុំ បានធ្វើឱ្យតំបន់នោះមានការអភិវឌ្ឍហេដ្ឋារចនាសម្ព័ន្ធថ្មីៗជាច្រើន ហើយតម្លៃដីធ្លីក៏បានពុះកញ្រ្ជោលខ្លាំង ដែលនេះ គឺជាការពិតមួយ បន្ទាប់ពីលោកបានចុះទៅដល់ទីតាំងពុះដីឡូតិ៍លក់។

“អញ្ចឹងបើសិនជាមានការហែកខេត្តថ្មីមួយទៀត នៅចន្លោះខេត្តកណ្ដាល ដូចដែលខ្ញុំបានលើកឡើងខាងលើ ការបន្តរីកចម្រើនអាចមានសក្ដានុពលខ្ពស់ និងរុញឱ្យតម្លៃដីធ្លីមានតម្លៃស្មើនឹងក្រុងតាខ្មៅ និងអាចស្មើនឹងតំបន់ផ្សេងទៀតនៅជាយរាជធានីភ្នំពេញ”។ លោក ស៊ា ឆៃលីន បន្ថែម។

លោកបានឱ្យដឹងទៀតថា តម្លៃដីធ្លីនៅខេត្តកណ្ដាលបច្ចុប្បន្នមានតម្លៃចន្លោះពី ៥០ដុល្លារ រហូតដល់ ២០០ដុល្លារ ក្នុងមួយម៉ែត្រការ៉េ ដោយមិនរាប់បញ្ចូលតម្លៃដីនៅក្រុងតាខ្មៅទេ។ “ដូច្នេះបើអ្នកឆាប់ឆក់យកឱកាស ដោយទិញដីនៅចំកណ្ដាល ឬក្បែរៗក្រុងបង្កើតថ្មីនឹងអាចមានឱកាសទទួលបានប្រាក់ចំណេញច្រើន។ ដីអាចឡើងដល់ ១គុណនឹង១០០% គុណ៥០០% ឬអាចគុណនឹង១០០០% ក៏ថាបានដែរនៅតំបន់ខ្លះ”។

លោកបន្តដោយមានសុទិដ្ឋិនិយមច្រើនចំពោះ គម្រោងបង្កើតខេត្តថ្មី ខណៈដីនៅតំបន់ទាំងនោះមិនមែនតម្លៃខ្ពស់នៅឡើយ បែរជារាជរដ្ឋាភិបាលបានប្រកាសគម្រោងឡើង ដែលនេះគឺជាដំណឹងដ៏រីករាយមួយ។ រីករាយដោយគេអាចស្រវាទិញដី ព្រមទាំងបោះទីតាំងទុកជាមុន និងរីករាយដោយសារតែសេវាសាធារណៈផ្សេងត្រូវបានបង្ខិតឱ្យកាន់តែកៀកជាងមុន។ លោកជឿថា រាជរដ្ឋាភិបាលប្រាកដជាបានសម្លឹងឃើញគ្រប់ជ្រុងជ្រោយទាំងលំហូរសេដ្ឋកិច្ច ការដឹកជញ្ជូន និងការធ្វើចរាចររបស់ប្រជាពលរដ្ឋនៅតំបន់នោះ។

“អញ្ចឹងសម្រាប់ខ្ញុំចម្លើយ គឺយើងយល់ស្របតែម្តង អ្វីដែលឪពុក ម្ដាយ…ដូចជាឪពុកម្ដាយយើងអញ្ចឹង គឺរាជរដ្ឋាភិបាលជាអាណាព្យាបាលរបស់យើងគឺគាត់ដឹងគ្រប់ជ្រុងជ្រោយនៅក្នុងការធ្វើហ្នឹង”។

ទន្ទឹមគ្នានេះ លោក ភារម្យ វិចិត្រដារ៉ា ប្រធានក្រុមហ៊ុនអចលនទ្រព្យ ECC បានលើកឡើងថា នេះគឺជាបរិបថថ្មីមួយ ដែលធ្វើឱ្យតម្លៃដីប្រែប្រួលបន្ថែមទៀត ព្រោះខេត្តកណ្ដាលមានភូមិសាស្ត្រក្បែររាជធានីភ្នំពេញ។

ចំណែកនៅភូមិសាស្ត្រស្រុកកោះញែក និងស្រុកលំផាត់នៃខេត្តរតនគិរី ដែលមានការអភិវឌ្ឍទំហំតូច អាចប្រែមកលឿន និងធំជាងមុន ព្រមទាំងក្លាយជាទីប្រជុំជន និងជាតំបន់ទេសចរធម្មជាតិផងដែរ ព្រោះវាស្ថិតនៅចំណុចកណ្តាល។

“បច្ចុប្បន្នដីនៅតំបន់បំបែកគួរស្រូវ ក្នុងខេត្តកណ្ដាលមានតម្លៃខ្ទង់ ១៤០ដុល្លារ ទៅ១៥០ដុល្លារ ក្នុងមួយម៉ែត្រការ៉េ ហើយបើខេត្តថ្មីត្រូវបានបំបែកមែនតម្លៃដីអាចហក់ឡើងយ៉ាងតិចក៏ ១០០ដុល្លារដែរ។ ចំពោះស្រុកកោះញែកវិញក៏អាចក្លាយជាប្រជុំជនមួយទៀត ពោលគឺវាជាទីប្រជុំជនទេសចរធម្មជាតិ។ ខ្ញុំជឿថាខេត្តថ្មីបំបែកចេញពីរតនគិរី និងមណ្ឌលគិរី រដ្ឋាភិបាលអាចផ្ដោតលើទេសចរធម្មជាតិច្រើនជាង”។

ក្នុងលិខិតចំណារយល់ព្រមរបស់ សម្ដេច ហ៊ុន សែន បានធ្វើឡើងលើលិខិតស្នើសុំគោលការណ៍អនុញ្ញាតមួយរបស់ក្រសួងមហាផ្ទៃ ដែលធ្វើឡើងកាលពីថ្ងៃទី២៧ ខែសីហា ២០១៨ កន្លងទៅ។ ក្នុងលិខិត បញ្ជាក់ថា ក្នុងករណីសម្ដេចនាយករដ្ឋមន្ត្រីឯកភាពជាគោលការណ៍ហើយ ក្រសួងមហាផ្ទៃនឹងចាត់មន្ត្រីបច្ចេកទេស ដើម្បីសហការជាមួយក្រសួង និងខេត្តពាក់ព័ន្ធ ចុះធ្វើការសិក្សាស្រាវជ្រាវជាក់ស្ដែង ដើម្បីរាយការណ៍សុំយោបល់ដឹកនាំជាបន្តបន្ទាប់ពីសម្ដេចនាយករដ្ឋមន្ត្រី។

ការរៀបចំសិក្សាលទ្ធភាពបង្កើតខេត្តនេះ នឹងធ្វើឲ្យចប់សព្វគ្រប់នៅខែមករា ឆ្នាំ២០១៩ ដើម្បីទុកពេលវេលាសមស្របសម្រាប់រាជរដ្ឋាភិបាលកំណត់ចំនួនអាសនៈក្រុមប្រឹក្សារាជធានី ខេត្ត ក្រុង ស្រុក ខណ្ឌ សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តិទី៣ ដែលតាមអាណត្តិកំណត់ក្នុងច្បាប់ គឺក្នុងអំឡុងខែឧសភា ឆ្នាំ២០១៩ ខាងមុខ៕

អត្ថបទ៖ សុផល