Messi យល់យ៉ាងណា ចំពោះការចាកចេញរបស់ Ronaldo ពី Real ទៅ Juventus?

2018-09-04 11:12:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងថ្ងៃនេះ ខ្សែប្រយុទ្ធ Lionel Messi បាននិយាយថា ខ្លួនមានការ "ភ្ញាក់ផ្អើល" ចំពោះការចាកចេញរបស់ខ្សែប្រយុទ្ធ Cristiano Ronaldo ពីក្លឹប Real Madrid ទៅចូលរួមជាមួយ Juventus។ កីឡាករអាហ្សង់ទីន គិតថាការបាត់បង់ខ្សែប្រយុទ្ធព័រទុយហ្គាល់ នឹងធ្វើឲ្យក្លឹបយក្សអេស្ប៉ាញដែលមានមូលដ្ឋាននៅ Madrid ខ្សោយជាងមុន។

ប្រភព៖ Catalunya Radio

Messi បានប្រាប់អ្នកសារព័ត៌មានថា៖ "ពិតណាស់ Real Madrid ស្ថិតចំណោមក្លឹបមួយដែលល្អបំផុតលើលោក។ ពួកគេមានកីឡាករល្អៗច្រើន ប៉ុន្តែការចាកចេញរបស់ Cristiano នឹងធ្វើឲ្យក្លឹបខ្សោយជាងមុន"។

ប្រភព៖ Catalunya Radio

ខ្សែប្រយុទ្ធអាហ្សង់ទីនបានបន្តទៀតថា៖ "ការផ្ទេរនេះ ធ្វើឲ្យ Juventus ក្លាយជាក្លឹបមួយដែលមានសមត្ថភាពប្រជែងយកពាន Champions League ក្នុងរដូវកាលនេះ។ តាមពិតទៅ ខ្ញុំមានការភ្ញាក់ផ្អើលនឹងការសម្រេចចិត្តរបស់ Cristiano។ មានក្រុមជាច្រើនដែលល្បីថាចង់បានរូបគេ ហើយខ្ញុំមិនសូវឮច្រើនទេពីចំណាប់អារម្មណ៍របស់ Juventus។ ទោះជាយ៉ាងណា ក្លឹបអ៊ីតាលីមួយនេះ គឺជាក្លឹបដែលល្អណាស់"។

សូមបញ្ជាក់ផងដែរថា ក្នុងរយៈពេលជាង ១០ ឆ្នាំចុងក្រោយ ខ្សែប្រយុទ្ធLionel Messi និង Cristiano Ronaldo ត្រូវបានមជ្ឈដ្ឋានបាល់ទាត់ជាច្រើនចាត់ទុកថាជាដៃគូដ៏ស្វិតស្វាញក្នុងការប្រជែងគ្នាដណ្ដើមយកពានរង្វាន់កីឡាករបាល់ទាត់ល្អបំផុតលើលោក។ ក្នុងអំឡុងពេល ១០ ឆ្នាំកន្លងទៅនេះ ទាំង Messi និង Ronaldo សុទ្ធតែឈ្នះ Ballon D'or ៥ លើកដូចគ្នា។

ទោះជាយ៉ាងណា បើតាមលទ្ធផលប្រកាសដោយ FIFA កាលពីម្សិលមិញ Messi មិនស្ថិតចំណោមបេក្ខភាពទាំងបីដើម្បីប្រជែងពានរង្វាន់កីឡាករល្អបំផុតប្រចាំឆ្នាំឡើយ។ ការណ៍នេះ បានកើតឡើងជាលើកដំបូងបំផុត ក្នុងរយៈពេល ១២ ឆ្នាំ សម្រាប់ខ្សែប្រយុទ្ធអាហ្សង់ទីន។

បកនិយាយពី Cristiano Ronaldo វិញ កាលពីខែកក្កដា ខ្សែប្រយុទ្ធបានធ្វើការផ្ទេរទៅក្លឹប Juventus ក្នុងតម្លៃប្រមាណ ១១៦ លានដុល្លារសហរដ្ឋអាមេរិក។ ទោះយ៉ាងណា ក្រោយលេង ៣ ប្រកួតលីគឲ្យក្លឹបថ្មីរបស់ខ្លួន កីឡាករព័រទុយហ្គាល់មិនទាន់រកគ្រាប់បាល់បាននៅឡើយទេ៕

ប្រភព៖ Marca ប្រែសម្រួល៖ ហ៊ីម រស្មី