ឌីន ណាផូ ថា មឿន សុខហ៊ុច វ៉ៃតោងតែខ្សែសង្វៀនសោះ ឈ្នះដែរ
- 2018-09-10 02:39:13
- ចំនួនមតិ 0 | ចំនួនចែករំលែក 0
ឌីន ណាផូ ថា មឿន សុខហ៊ុច វ៉ៃតោងតែខ្សែសង្វៀនសោះ ឈ្នះដែរ
ចន្លោះមិនឃើញ
អ្នកប្រដាល់ជើងខ្លាំងរបស់ថៃ ឌីន ណាផូ ពិតជាមិនអស់ចិត្ត និងសម្ដែងការមិនពេញចិត្តទាល់តែសោះ ដែលសម្រេចឲ្យកីឡាករកម្ពុជា មឿន សុខហ៊ុច ឈ្នះវគ្គផ្ដាច់ព្រ័ត្រពានរង្វាន់ ISI ម្សិលមិញនេះ ខណៈស្នៀតប្រយុទ្ធមិនជាអីអស្ចារ្យ វ៉ៃគិតតែតោងសង្វៀន។
ឌីន ណាផូ បានឲ្យដឹងក្រោយប្រកួតថា រូបគេពិតជាមិនអស់ចិត្តទៅនឹងលទ្ធផលម្សិលមិញនេះទេ មិនសមណាខ្លួនចាញ់នោះឡើយ ព្រោះអីទាំងជំហរ និងស្នៀតប្រយុទ្ធរួមទាំងការវ៉ៃចេញចំគោលដៅច្រើន។ ចំណែកអ្នកប្រដាល់របស់កម្ពុជាខាងលើ មិនទាំងមានស្នៀតអ្វី និងវ៉ៃត្រូវខ្លួនណាស់ណានោះទេ ហើយក្នុងចំណោម៥ទឹកនេះ មើលឃើញថាល្អបានត្រឹមទី៥បន្តិចប៉ុណ្ណោះ។
អ្នកប្រដាល់កូនកាត់បារាំង ថៃ ម្នាក់នេះបន្ថែមទៀតថា អាជ្ញាកណ្ដាលកាន់ជើងខាងកីឡាករខ្មែរ ព្រោះអីដៃគូប្រកួតតោងសង្វៀនរហូត តែមិនឃើញមានព្រមាន ឬដកពិន្ទុអ្វីឡើយ។ ការកាត់សេចក្ដីនេះ គឺធ្វើឲ្យខ្លួនខូចចិត្ត និងបាក់ទឹកចិត្តតែម្ដង ហើយប្រហែលមិនមកចូលរួមប្រកួតនៅស្រុកខ្មែរទៀតទេ។
ទាក់ទិនទៅនឹងការមិនពេញចិត្តនេះដែរ មឿន សុខហ៊ុច ផ្ទាល់ក៏លើកឡើងដែរថា លទ្ធផលដែលខ្លួនឈ្នះនេះវាសមហើយ ព្រោះអីខ្លួនវ៉ៃត្រូវបានច្រើន។ ប៉ុន្តែបើការប្រកួតនេះនៅឯប្រទេសថៃវិញ ខ្លួនប្រហែលជាចាញ់ហើយ ដោយដួល និងហាក់ជ្រាយបន្តិចយ៉ាងណាមិញការផ្ដល់ពិន្ទុនៅខ្មែរគឺខុសគ្នាពីថៃ អ្នកណាវ៉ៃត្រូវច្រើនគឺឈ្នះហើយ។
រំលឹកដែរថា ការប្រកួតវគ្គផ្ដាច់ព្រ័ត្រពានរង្វាន់ ISI ទម្ងន់ ៦៥គីឡូក្រាម បានបញ្ចប់ទៅហើយកាលពីថ្ងៃអាទិត្យ ទី៩ ខែកញ្ញា ២០១៨ ដោយ មឿន សុខហ៊ុច ឈ្នះពិន្ទុដោយមិនឯកច្ឆាន ៣-២ លើកីឡាករថៃ ឌីន ណាផូ។ ដូច្នេះ មឿន សុខហ៊ុច ជាប់លេខ១ និងលេខ២ ឌីន ណាផូ លេខ៣ ក្រៀង ក្រៃ និងលេខ៤ ឆៃ សារ៉ា៕