ឱកាសល្អមកដល់ទៀតហើយ! សិស្សឆ្នើម២០រូប នឹងទទួលបានអាហារូបករណ៍ពីកម្មវិធី SmartEdu
- 2018-09-12 07:31:40
- ចំនួនមតិ 0 | ចំនួនចែករំលែក 0
ឱកាសល្អមកដល់ទៀតហើយ! សិស្សឆ្នើម២០រូប នឹងទទួលបានអាហារូបករណ៍ពីកម្មវិធី SmartEdu
ចន្លោះមិនឃើញ
អាហារូបករណ៍ចំនួន 20 កន្លែងនឹងត្រូវបានផ្ដល់ជូនសិស្សឆ្នើម ដែលទើបប្រលងជាប់បាក់ឌុបឆ្នាំ 2018 នេះ តាមរយៈកម្មវិធីអាហារូបករណ៍ SmartEdu របស់ក្រុមហ៊ុន Smart Axiata ដែលជាក្រុមហ៊ុនទូរសព្ទចល័តនាំមុខគេនៅកម្ពុជា។
អាហារូបករណ៍ SmartEdu មានតម្លៃសរុបរហូតដល់ទៅ 15 000 ដុល្លារសហរដ្ឋអាមេរិក ដែលរាប់បញ្ចូលទាំងថ្លៃបង់សាលា និងការចំណាយលើការរស់នៅ ក្នុងអំឡុងពេល នៃការសិក្សានៅមហាវិទ្យាល័យរបស់ពួកគេ។ នេះបើយោងតាមសេចក្ដីប្រកាសព័ត៌មានរបស់ ក្រុមហ៊ុន Smart Axiata Co., Ltd ដែលបានចុះកាលបរិច្ឆេទថ្ងៃទី ១១ ខែកញ្ញា ម្សិលមិញនេះ។
សេចក្ដីប្រកាសដដែលបានឲ្យដឹងទៀតថា កម្មវិធីអាហារូបករណ៍ SmartEdu នេះត្រូវបានផ្ដួចផ្ដើមឡើង ដើម្បីជួយដល់សិស្សឆ្នើមដែលបានយកចិត្តទុកដាក់លើការសិក្សារបស់ខ្លួន ហើយទទួលបានលទ្ធផលដ៏ល្អ ប៉ុន្តែមិនអាចបន្តការសិក្សាថ្នាក់មហាវិទ្យាល័យ និង ក្ដីស្រមៃរបស់ខ្លួនដោយសារតែជីវភាពខ្វះខាត។
លោក ថូម៉ាស ហ៊ុន នាយកប្រតិបត្តិនៃក្រុមហ៊ុន Smart Axiata បានថ្លែងថា៖ “អាហារូបករណ៍នេះ មានបំណងបង្កើតការផ្លាស់ប្ដូរជាវិជ្ជមានសម្រាប់សិស្ស ដើម្បីឲ្យពួកគេបានបន្តការសិក្សាខ្ពស់មួយកម្រិតទៀត ជាពិសេសអ្នកដែលបានខិតខំប្រឹងប្រែងសិក្សា និងធ្វើបានយ៉ាងល្អ ប៉ុន្តែមិនមានជោគវាសនា ឬក៏មានអារម្មណ៍ថាចង់បោះបង់ការសិក្សា ដោយសារឧបសគ្គផ្នែកហិរញ្ញវត្ថុ។ ក្រុមហ៊ុន Smart មានមោទនភាពនឹងចូលរួមជាផ្នែកមួយ នៃការចាប់ផ្ដើមជំពូកថ្មីសម្រាប់ដំណើរជីវិតរបស់និស្សិតទាំង 20 នាក់នេះ"។
សិស្សវិទ្យាល័យ ដែលទើបបញ្ចប់ការសិក្សាឆ្នាំ 2018 នេះ អាចដាក់ពាក្យអាហារូបករណ៍នេះ ដើម្បីសិក្សាតាមសាកលវិទ្យាល័យល្បីៗនៅប្រទេសកម្ពុជា ដែលគ្រប់គ្រងដោយ ក្រសួងអប់រំ យុវជន និង កីឡា និង វិទ្យាស្ថានជាតិ NIPTICT នៃក្រសួងប្រៃសណីយ៍ និងទូរគមនាគមន៍។
កម្មវិធីអាហារូបករណ៍ SmartEdu បានផ្ដល់អាហារូបករណ៍ដល់សិស្សចំនួន 30 នាក់ ក្នុងរយៈពេលពីរឆ្នាំកន្លងមកនេះ។ និស្សិត ហ៊ាន មៃលាង ដែលជាជ័យលាភីអាហារូបករណ៍ឆ្នាំ២០១៦ នៃកម្មវិធីអាហារូបករណ៍ SmartEdu បាននិយាយថា៖ ”ខ្ញុំមិនអាចស្រមៃថាតើជីវិតរបស់ខ្ញុំនឹងជួបការលំបាកយ៉ាងណាទេ បើមិនមានកម្មវិធីអាហារូបករណ៍ SmartEdu សម្រាប់ជួយខ្ញុំ។ អាហារូបករណ៍នេះមិនត្រឹមតែផ្តល់ឲ្យខ្ញុំនូវការគាំទ្រផ្នែកហិរញ្ញវត្ថុប៉ុណ្ណោះទេ ប៉ុន្តែវាថែមទាំងលើកទឹកចិត្តឲ្យខ្ញុំចេះកែលម្អខ្លួនឯងឲ្យក្លាយជាមនុស្សម្នាក់ដ៏ល្អប្រសើរ និង មានសមត្ថភាពនៅក្នុងសង្គម”។
ដើម្បីដាក់ពាក្យអាហារូបករណ៍ សិស្សត្រូវតែទទួលបាន និទ្ទេសរួម A ឬ B ពីការប្រលងបាក់ឌុបខែសីហា ឆ្នាំ 2018 កន្លងទៅនេះ។ ការដាក់ពាក្យអាចធ្វើបានតាមរយៈគេហទំព័រ http://smartedu.com.kh/index.php/en/ ឬ ទទួលយកពាក្យសរសេរ ដៃនៅតាមសាខា Smart Shop ទូទាំងប្រទេស អោយបានមុនថ្ងៃទី 10 ខែ តុលា ឆ្នាំ2018។
សម្រាប់ព័ត៌មានបន្ថែម និងព័ត៌មានថ្មីៗពីក្រុមហ៊ុន Smart Axiata សូមចូលទៅកាន់ទំព័រហ្វេសប៊ុករបស់ Smart តាមរយៈ https://www.facebook.com/smartforcambodia/ ឬចូលទៅកាន់គេហទំព័រ https://www.smart.com.kh/ ៕