ស្ទើរ ៩៩ ភាគរយនៅចែកមិនដាច់ពីប្រព័ន្ធដំណើរការស៊ីម ២ (eSIM) លើ iPhone XS

2018-09-13 11:34:22
ចំនួនមតិ 0 | ចំនួនចែករំលែក 0

ចន្លោះមិនឃើញ

លើ iPhone ស៊េរីឆ្នាំ ២០១៨ ទាំង ៣ ម៉ូឌែល អាចគាំទ្រការដំណើរការស៊ីម ២ (eSIM) ជាលើកដំបូងក្នុងប្រវត្តិសាស្ត្រ ដូចមានបំពាក់លើផលិតផលគូប្រជែង Google Pixel 2 ដំណើរការនៅទឹកដីសហរដ្ឋអាមេរិក។ តើអ្វីទៅជាប្រព័ន្ធ eSIM ចុះផ្តល់អត្ថប្រយោជន៍អ្វីខ្លះដល់អ្នកប្រើប្រាស់?

+អ្វីទៅជា eSIM:

រូបតំណាងបន្ទះឈីប eSIM

eSIM ឬពាក្យពេញ **embedded SIM** ជាប្រព័ន្ធដំណើរការស៊ីមជំនួយទីពីរបំពាក់ស្រាប់ក្នុងម៉ាស៊ីន ពុំមែនជាបន្ទះស៊ីមកាតអាចមើលឃើញនៅនឹងភ្នែកផ្ទាល់នោះទេ បែបនេះមានន័យថាលើ iPhone នោះមានប្រអប់ស៊ីមកាត nano-SIM ធម្មតាមួយ និងស៊ីមទីពីរជា eSIM បន្ទះឈីបរាងតូច (ស្រដៀងឈីប NFC) បំពាក់ភ្ជាប់ក្នុងម៉ាស៊ីន។ ដើម្បីដំណើរការប្រព័ន្ធពិសេសនេះបាន ទាមទារឲ្យមានការគាំទ្រពីបណ្ដាញឬក្រុមហ៊ុនទូរគមនាគមន៍ដូចបានបង្ហាញពីបញ្ជី [Apple](https://support.apple.com/en-us/HT209096) កំណត់ ដោយនៅសហរដ្ឋអាមេរិកកំពុងគាំទ្រជាមួយក្រុមហ៊ុន Verizon, AT&T និង T-Mobile។

+អត្ថប្រយោជន៍ពិសេសនៃ eSIM:

ប្រយោជន៍សំខាន់បំផុតគឺសម្រាប់អ្នកធ្វើដំណើរក្រៅស្រុក ដោយអាចបើក eSIM ប្រើប្រាស់ប្រព័ន្ធ Roaming បានដោយសេរី ហើយយកប្រអប់ nano-SIM ធម្មតាមកប្រើប្រាស់ជាមួយស៊ីមប្រចាំតំបន់នោះផ្ទាល់បន្ថែមពីលើក៏បាន។

រូបតំណាងប្រអប់ nano-SIM

លោក Steve Alder នៃក្រុមហ៊ុនផ្គត់ផ្គង់បណ្ដាញទូរសព្ទ Truphone ក៏មានប្រសាសន៍ថា៖ "វាក៏អនុញ្ញាតឲ្យអ្នកធ្វើការផ្លាស់ប្ដូរបណ្ដាញប្រើប្រាស់បានរហ័ស ទោះអ្នកស្ថិតក្នុងតំបន់ដែលគ្មានសេវា ជួយសន្សំសំចៃថាមពលថ្ម និងកាត់បន្ថយហានិភ័យនៃអំពើចោរកម្ម មួយផ្សេងទៀតដោយអតិថិជននិងប្រតិបត្តិករផ្គត់ផ្គង់បណ្ដាញមើលឃើញពីអត្ថប្រយោជន៍ខ្ពស់ នោះទៅថ្ងៃមុខ eSIM នឹងមានតួលេខប្រើប្រាស់កាន់តែច្រើនឡើង "។

សម្រាប់ឧបករណ៍ផ្ទាល់ការដំណើរការ eSIM ក៏ផ្តល់ប្រយោជន៍សម្រាប់ក្រុមហ៊ុនផ្គត់ផ្គង់គ្រឿងបង្គំដោយមិនទាមទារទីតាំងធំដូចការបំពាក់ប្រអប់ Hybrid SIM ពិសេសជាងនេះក៏មិនពិបាកដល់អតិថិជនក្នុងការទុកដាក់ SIM Card ឬយកតាមខ្លួនគ្រប់ពេលនោះទេ។

យ៉ាងណាមិញដូចបានបញ្ជាក់ពីខាងលើម្ចាស់ iPhone សេរ៊ីថ្មីគ្រប់រូប ត្រូវរង់ចាំដល់ដំណើរការ iOS 12 ចេញឲ្យប្រើប្រាស់ជាផ្លូវការ និងពុំមានន័យថាសុទ្ធតែអាចដំណើរការស៊ីម ២ បាននោះទេ ដរាបណាមានការគាំទ្រជាមួយក្រុមហ៊ុនបណ្ដាញទូរសព្ទក្នុងស្រុក ស្របពេលបច្ចុប្បន្នបញ្ជីដៃគូបើកដំណើរការប្រព័ន្ធ eSIM ទូទាំងសកលលោកទើបមានតែក្នុងប្រទេសអូទ្រីស, ហុងគ្រី, កាណាដា, ឥណ្ឌា, ក្រូអាត, អេស្ប៉ាញ, សាធារណរដ្ឋឆេក, អង់គ្លេស, អាល្លឺម៉ង់ និងសហរដ្ឋអាមេរិក ខណៈក្រុមហ៊ុននៃប្រទេសដទៃទៀតអាចកំពុងសម្លឹងពីសក្ដានុពលនៃទំហំអ្នកប្រើប្រាស់ជាបណ្តើរៗសិន។