កំថូង ពីសិស្សរៀនបាតថ្នាក់ តស៊ូរៀនចប់ដល់ឥណ្ឌា ចុងក្រោយអាចទៅធ្វើការដល់ជប៉ុន

2018-09-27 07:43:07
ចំនួនមតិ 0 | ចំនួនចែករំលែក 0

ចន្លោះមិនឃើញ

មានឈាមជ័រជាអ្នកបន្ទាយមានជ័យយុវជន ឡី កំថូង មានឱកាសបានទៅបម្រើការងារ ផ្នែកស្រាវជ្រាវបច្ចេកវិទ្យានៅវិទ្យាស្ថាន NICT ក្នុងទីក្រុង Kyoto ប្រទេសជប៉ុន។ តើ កំថូង បានឆ្លងកាត់ព្យុះភ្លៀងអ្វីខ្លះ ទម្រាំមានថ្ងៃនេះ?

ឡី កំថូង (ស្ដាំ)

**សិស្សបាតតារាងប្រចាំថ្នាក់**

បើត្រឡប់ទៅអតីតកាល ក្នុងចំណោមសិស្ស ៥០ នាក់ កំថូង ជាជើងខ្លាំងបានលេខ ៨ បើរាប់ពីក្រោយមកវិញ ពោលគឺសិស្សបាតតារាងប្រចាំថ្នាក់តែម្ដង។ កាលនៅវិទ្យាល័យធ្លាប់ត្រូវគេវាយតម្លៃជាមនុស្សមិនល្អ ជាហេតុធ្វើឱ្យគេស្ទើរបោះបង់ការសិក្សាចោល។ ប៉ុន្តែក្រោយប្រលងជាប់បាក់ឌុប អ្នកបន្ទាយមានជ័យរូបនេះ បានទទួលការជំរុញលើកទឹកចិត្តពីឪពុកម្ដាយ ឱ្យទៅបន្តការសិក្សានៅសាកលវិទ្យាល័យក្នុងរាជធានីភ្នំពេញ ស្របពេលជីវភាពគ្រួសារ មិនទាន់ល្អប្រសើរនៅឡើយ។

ការរស់នៅភ្នំពេញម្នាក់ឯង

ការសិក្សា និងរស់នៅក្នុងទីក្រុងម្នាក់ឯង គឺជាបញ្ហាសម្រាប់កូនអ្នកខេត្តដែលក្រីក្រនេះ។

កំថូង ថា៖ "សម្រាប់ខ្ញុំអ្វីដែលសំខាន់ គឺត្រូវប្រឈមមុខ និងដោះស្រាយបញ្ហាដូចពាក្យចាស់ថា ភាពជោគជ័យគឺស្ថិតនៅក្រោយបញ្ហា បើយើងដោះស្រាយបញ្ហាតូច យើងនឹងទទួលបានជោគជ័យតូច បើយើងដោះស្រាយបញ្ហាធំ យើងនឹងបានជោគជ័យធំ”។

មិនយូរប៉ុន្មាន ការខិតខំប្រឹងប្រែងរបស់ កំថូង ក៏បានផ្ដល់ផ្លែផ្កាជាដុំកំភួន ដោយទទួលបានការងារ និងជួបមនុស្សល្អៗ។

កំថូង កំពុងធ្វើការនៅវិទ្យាស្ថានជាតិ NICT នៅទីក្រុង Kyoto

ចាប់ជំនាញអភិវឌ្ឍន៍កម្មវិធី

ឆ្លើយនឹងសំណួរហេតុអ្វីបានជា កំថូង រៀនជំនាញអភិវឌ្ឍន៍កម្មវិធី ឬ Software Development? កំថូង ប្រាប់ថា កត្តាដែលធ្វើឱ្យគេជ្រើសរើសផ្នែក Software Development ព្រោះមើលឃើញការរីកចម្រើននៃបច្ចេកវិទ្យា។ ម្យ៉ាងវិញទៀត គេក៏មានគោលបំណងចង់ក្លាយខ្លួនជាអ្នកបង្កើតប្រព័ន្ធគ្រប់គ្រងទិន្នន័យ គេហទំព័រ និងកម្មវិធីទូរសព្ទដៃជាដើម។

ក្នុងពេលសិក្សា កំថូង ធ្លាប់ទទួលបានពានរង្វាន់លេខ ៣ ក្នុងការប្រកួតប្រជែង ផ្នែកព័ត៌មានវិទ្យាលើកទី ១២ ក្នុងសកលវិទ្យាល័យន័រតុន និងមេដាយប្រាក់ ពីប្រទេសម៉ាឡេស៊ីក្នុងការប្រកួតប្រជែងអន្តរជាតិ i-ENVEX។

ការសិក្សានៅឥណ្ឌា និងការងារនៅជប៉ុន

ដោយសារការខិតខំប្រឹងប្រែង ឡី កំថូង ក៏បានជាប់ទៅបន្តការសិក្សាជំនាញអភិវឌ្ឍន៍កម្មវិធីទូរសព្ទដៃ PG Diploma Mobile Computing នៅមជ្ឍមណ្ឌលបណ្តុះបណ្តាលបច្ចេកវិទ្យាជាន់ខ្ពស់ Centre for Development of Advanced Computing (C-DAC) នៅទីក្រុង Pune ប្រទេសឥណ្ឌា និងជាប់បានទៅធ្វើការផ្នែកស្រាវជ្រាវបច្ចេកវិទ្យា ក្នុងវិទ្យាស្ថានជាតិ NICT ប្រទេសជប៉ុន ដែលគិតមកពេលនេះមានរយៈពេលជិតមួយឆ្នាំហើយ។

ពេលសួរថា តើ កំថូង យល់យ៉ាងណាដែរ ក្រោយបានធ្វើការនៅជប៉ុន?

អតីតសិស្សវិទ្យាល័យ មង្គលបូរី លើកឡើងថា៖ "ខ្ញុំពិតជាសប្បាយចិត្តខ្លាំងណាស់ ដែលបានមកធ្វើការ និងយកបទពិសោធន៍នៅជប៉ុន ប៉ុន្តែមិនទាន់គ្រប់គ្រាន់ទេសម្រាប់ខ្ញុំ។ ពេលខ្ញុំនៅក្នុងប្រទេសអភិវឌ្ឍន៍មួយនេះទើបដឹងថា ខ្ញុំនៅមានចំណុចខ្វះខាតច្រើន ដែលតម្រូវឲ្យខ្ញុំស្វែងយល់ និងរៀនសូត្របន្ថែមទៀត"។

មូលហេតុដែលបានធ្វើការនៅជប៉ុន

កំថូង ប្រាប់ថា បន្ទាប់ពីបានឃើញមានការជ្រើសរើសបេក្ខជន ទៅធ្វើការនៅប្រទេសជប៉ុន ទើបគេបានចាប់ផ្តើមសិក្សាសមត្ថភាពខ្លួនឯង និងសម្រេចចិត្តចូលរួមប្រកួតប្រជែងដើម្បីមានសិទ្ធិទៅធ្វើការនៅប្រទេសខ្លាំងផ្នែកបច្ចេកវិទ្យានេះ។

យុវជនរូបនេះប្រាប់ថា មុនបានទៅធ្វើការ គេទាមទារចំណេះផ្នែក Programming , ត្រូវបញ្ចប់ការសិក្សាផ្នែកព័ត៌មានវិទ្យា ( Computer Science), ត្រូវឆ្លងកាត់ការសម្ភាសន៍ផ្ទាល់ ហើយចាំបាច់ត្រូវចេះភាសាអង់គ្លេស ឬភាសាជប៉ុន។

នៅប្រទេសជប៉ុន លោកបានរៀនពីបច្ចេកវិទ្យាថ្មីៗ ដែលពិភពលោកកំពុងត្រូវការ។ លើសពីនេះ ក៏បានយល់ដឹងអំពីបែបបទនៃការងារ ទំនៀមទម្លាប់ ប្រពៃណី និងបានរាប់អានស្គាល់មិត្តភ័ក្ដិច្រើន ដែលសុទ្ធសឹងតែជាអ្នកស្រាវជ្រាវបច្ចេកវិទ្យា ដូចជា មកពីវៀតណាម មីយ៉ាន់ម៉ា ចិន និងអឺរ៉ុបជាដើម។

ទាក់ទងបទពិសោធន៍ឆ្លងកាត់ទាំងជីវិតការងារ និងការសិក្សា ឡី កំថូង ប្រាប់ថា ការចង់សម្រេចអ្វីមួយ មិនមែនធ្វើមួយថ្ងៃ ឬពីរថ្ងៃនោះទេ ពោលគឺត្រូវព្យាយាមតស៊ូ ទើបរឿងល្អៗអាចកើតឡើងនិងសម្រេចជោគជ័យ។

"ក្នុងន័យនេះខ្ញុំចង់បញ្ជាក់ថា ការរៀនមិនពូកែនៅវិទ្យាល័យ មិនប្រាកដថា យើងខ្សោយនៅមហាវិទ្យាល័យនោះទេ អ្វីដែលសំខាន់យើងត្រូវមានគោលដៅច្បាស់លាស់ និងការខិតខំប្រឹងប្រែង"។

អនាគត កំថូងចង់ក្លាយជាសាស្ត្រាចារ្យនៅប្រទេសកម្ពុជា ក្នុងគោលបំណងពង្រឹង និងពង្រីកការអប់រំផ្នែកបច្ចេកវិទ្យា ព្រមទាំងចែករំលែកបទពិសោធន៍ និងជំនាញ ដែលលោកបានរៀនទាំងក្នុង និងក្រៅប្រទេស ដល់យុវជនជំនាន់ក្រោយ។

ប្រវត្តិសិក្សា

បញ្ចប់ថ្នាក់មធ្យមសិក្សាទុតិយភូមិ នៅវិទ្យាល័យមង្គលបូរី ខេត្តបន្ទាយមានជ័យ
បរិញ្ញាបត្រផ្នែកព័ត៌មានវិទ្យានៅសាកលវិទ្យាល័យន័រតុន រាជធានីភ្នំពេញ
PG Diploma Mobile Computing នៅសាលារៀន Centre for Development of Advanced Computing (C-DAC) ទីក្រុង Pune ប្រទេសឥណ្ឌា

ប្រវត្តិគ្រួសារ