មេរោគ GandCrab ទារលុយពីឪពុកកុមារស៊ីរី ៦០០ ដុល្លារ ជាថ្នូរបើកផ្លូវឲ្យបានរូបថតកូនមកវិញ

2018-10-19 11:10:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ការបង្ហោះក្នុងគេហទំព័រវេទិកាឧក្រិដ្ឋកម្មលើប្រព័ន្ធកុំព្យូទ័រ អ្នកអភិវឌ្ឍមេរោគ GandCrab បានប្រកាសព្រមបើក Decryption Key ជូនដល់ជនរងគ្រោះក្នុងប្រទេសស៊ីរីដោយឥតគិតថ្លៃ។ ការចែក Free នេះធ្វើឡើងក្រោយមានការទទូចដ៏សោកសង្រេងមួយពីសំណាក់ពលរដ្ឋស៊ីរីមួយរូប ស្នើសូមឲ្យមានការប្រគល់រូបថតរបស់កូនប្រុសខ្លួនដែលត្រូវមេរោគនេះ Encrypt បាត់អស់គ្មានសល់កាលពីពេលកន្លងទៅ។

គណនីនៃជនរងគ្រោះបានបង្ហោះលើ Twitter យ៉ាងដូច្នោះថា៖ "ខ្ញុំឈ្មោះ Jameel ជាឪពុកសញ្ជាតិស៊ីរីដែលបានបាត់បង់កូនប្រុសទាំងពីររូបក្នុងអំឡុងសង្គ្រាមដ៏កាចសាហាវ ហើយអ្វីដែលនៅសេសសល់គឺត្រឹមរូបថតនិងវីដេអូដែលខ្ញុំបានថតពួកគេមុនបាត់បង់ជីវិត ប៉ុន្តែពេលនេះ GandCrab V5.0.3 បាន Lock ទិន្នន័យទាំងនោះអស់ហើយ"។

លោកបន្ត៖ "ពួកគេត្រូវការលុយ ៦០០ ដុល្លារជាថ្នូរប្តូរយករូបថតកូនប្រុសរបស់ខ្ញុំត្រលប់មកវិញ ប៉ុន្តែខ្ញុំមានប្រាក់ឯណា បើរាល់ថ្ងៃត្រូវរកប្រាក់ទិញអាហារបរិភោគសម្រាប់ខ្ញុំនិងប្រពន្ធមិនបានផងនោះ"។

ឆ្លើយតបពីក្រុមអ្នកអភិវឌ្ឍ GandCrab ក៏ព្រមផ្តល់នូវកូដបើកយកឯកសារទាំងអស់ដោយឥតគិតថ្លៃសម្រាប់ជនរងគ្រោះស៊ីរី ហើយក៏សង្កត់ធ្ងន់ថាជាកំហុសដែលស៊ីរីពុំមានឈ្មោះក្នុងបញ្ជីនៃប្រទេសដែលមេរោគខ្លួនត្រូវលើកលែងការវាយប្រហារ។

រូបតំណាងឯកសារ Decryption Key

សម្រាប់ Decryption Key ផ្ញើជូនជងរងគ្រោះ ក្នុងឯកសារ ZIP មានផ្ទុកនូវឯកសារ readme.txt និង SY_keys.txt ដោយ readme.txt បង្ហាញនូវទិន្នន័យនៃការរៀបចំកូដសម្ងាត់និងព័ត៌មានពីដើមចមដែលកូដទាំងអស់បានបញ្ចេញក្នុងទម្រង់ជាភាសារុស្ស៊ី។ ខណៈឯកសារ SY_keys.txt ផ្ទុកនូវ Decryption Key ចំនួន ៩៧៨ កូដសម្រាប់ជនរងគ្រោះស៊ីរីទាំងអស់ តាំងពីជំនាន់ 1.0 ដល់ 5.0 ដោយក្នុងជួរនីមួយៗក៏បង្ហាញនូវ ID នៃជនរងគ្រោះ, ជំនាន់កម្មវិធី និង Decryption Key។

រំឭកថា Ransomware ឲ្យឈ្មោះ GandCrab ជាប្រភេទ Cryptovirus រាតត្បាតអ្នកប្រើប្រាស់ជុំវិញពិភពលោកចាប់តាំងពីខែឧសភា ឆ្នាំ ២០១៨ ដោយអំឡុងជិត ១ ឆ្នាំមកនេះក៏មានការបញ្ចេញជំនាន់ជាច្រើនជាបន្តបន្ទាប់ ដោយដំណាក់កាលដំបូងក៏ត្រូវក្រុមអ្នកជំនាញនៃប្រទេសរ៉ូម៉ានីធ្វើការបង្រ្កាបបានម្តង និងចែកកម្មវិធី GandCrab Decrytor ឥតគិតថ្លៃ ប៉ុន្តែដោយភាពមិនខ្លាចរអាក្រុមខិលខូចនៅតែបន្តវាយលុកក្នុងប្រទេសដទៃទៀតជារឿយៗ។

ប្រភព: https://www.2-spyware.com/remove-gandcrab-ransomware.html https://www.bleepingcomputer.com/news/security/gandcrab-devs-release-decryption-keys-for-syrian-victims/?fbclid=IwAR2quQj8ev72BTZr9IKEz3fn5NFLycGDLCfwEuZkS6J6R_0XMMt77TkkNgg