មេក្រុមចម្រៀងវ័យក្មេងកូរ៉េ ចេញមុខទម្លាយរឿងពិតពីទារុណកម្មគ្មានមេត្តារបស់ផលិតកម្ម

2018-10-21 08:31:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសាររងនូវរឿងឈឺចាប់ហួសប្រមាណពេក មេក្រុមចម្រៀងប្រុសវ័យក្មេងរបស់កូរ៉េ The East Light បានបើកសន្និសីទកាសែតមួយ និងទម្លាយរឿងពិតដែលខ្លួន និងក្រុមជួបប្រទះនាពេលកន្លងមក។

ក្រុម The East Light

តារាចម្រៀង Lee Seok Cheol មេក្រុម The East Light បានចេញមុខបើកកកាយរឿងពិតគ្មានសល់ អំឡុងពេលបង្ហាញខ្លួនក្នុងសន្និសីទកាសែត ធ្វើឡើងកាលពីថ្ងៃទី ១៩ ខែតុលាកន្លងទៅ។

Seok Cheol បានផ្ដើមថា៖ "ខ្ញុំពិតជាសុំទោស និងអរគុណអ្នកទាំងអស់គ្នាសម្រាប់វត្តមានចូលរូមនៅពេលនេះ។ វាក្លាយជាទម្លាប់ទៅហើយសម្រាប់ ផលិតករ (PD) របស់យើង ដែលតែងវាយធ្វើបាបពួកខ្ញុំ ចាប់តាំងពីឆ្នាំ ២០១៥ ដល់ឆ្នាំ ២០១៧។ គាត់តែងគំរាមថា គាត់នឹងសម្លាប់ពួកយើងចោល បើហ៊ានប្រាប់ម្ដាយឪពុក”។

មេក្រុមរូបនេះបន្តទៀតថា៖ "វាជារឿងពិតដែល Lee Seunghyun (សមាជិកក្នុងក្រុម) ធ្លាប់ត្រូវ PD ធ្វើបាបម្ដង រហូតជាំភ្លៅ និងដៃ។ ចំណែកអ្នកច្រៀងប្រចាំក្រុម គឺ Lee Eunsung ត្រូវគេវាយក្បាលរហូតចេញឈាម"។

Seok Cheol បានឲ្យដឹងទៀតថា ប្រធានក្រុមហ៊ុនរបស់ខ្លួន ដែលធ្វើជាសាក្សីក្នុងរឿងទាំងនេះ បែរជាប្រាប់មកក្រុមថា ឲ្យពួកគេធ្វើចិត្តឲ្យត្រជាក់សិនទៅវិញ។ "CEO មិនបានមើលថែយើងឲ្យបានល្អនោះទេ ហើយគាត់បែរជាបង្គាប់យើងឲ្យសម្ដែងធម្មតាលើទូរទស្សន៍ ក្រោយកើតរឿងទាំងនោះទៀត”។ នេះបើតាមតារាប្រុសរូបនេះបន្ថែម។

ជាមួយគ្នានោះ ក្រោយមានការទម្លាយរឿងរ៉ាវទាំងនេះ ក៏មានសេចក្ដីរាយការណ៍ឲ្យដឹងថា PD ដែលជាប់ពាក់ព័ន្ធនឹងករណីធ្វើបាបក្រុម The East Light ត្រូវបានបណ្ដេញចេញពីក្រុមហ៊ុនហើយ៕