អាជីពទាំង៨ សក្តិសមបំផុត សម្រាប់អ្នកចូលចិត្តការដើរលេង

2018-10-23 06:37:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាមនុស្សម្នាក់ដែលចូលចិត្តការដើរកម្សាន្ត ប៉ុន្តែមិនសូវមានពេលដោយសារត្រូវធ្វើការ ឬចង់បានការងារដែលមានភាពឯករាជ្យ និងបានធ្វើដំណើរច្រើន? អីចឹងប្រសិនបើថ្ងៃនេះ Kanha ប្រាប់អ្នកថា អ្នកអាចទៅកន្លែងណាក៏បាន ព្រមទាំងបានធ្វើការក្នុងពេលតែមួយ គិតថាជាជម្រើសគួរឲ្យចាប់អារម្មណ៍អត់? ថ្ងៃនេះ យើងសូមណែនាំអាជីពចំនួន ៨ដែលអាចឲ្យអ្នកធ្វើដំណើរកម្សាន្តផង ធ្វើការផងក្នុងពេលតែមួយ៖

១. អ្នកនិពន្ធ

គឺជាអាជីពដែលពឹងផ្អែកទៅលើសមត្ថភាពក្នុងការសរសេរ ច្នៃប្រឌិតរូបារម្មណ៍របស់ខ្លួនចូលក្នុងក្រដាសសៀវភៅ ដើម្បីបញ្ជូនបន្តឲ្យអ្នកអានបានឃើញបានយល់ពីអ្វីដែលខ្លួនចង់ប្រាប់។ គឺជាអាជីពដែលត្រូវការកម្លាំងបណ្ដាលចិត្ត (Inspiration) ហើយមានអ្នកនិពន្ធមិនតិចឡើយដែលកសាងកម្លាំងចិត្តនេះបានតាមរយៈការធ្វើដំណើរទៅទីកន្លែងផ្សេងៗ។ នេះជាអាជីពឯករាជ្យដែលអ្នកអាចធ្វើនៅទីណា ពេលណា បែបណាក៏បាន ឲ្យតែអ្នកមានវិន័យចំពោះខ្លួនឯង។ បើអ្នកជាអ្នកនិពន្ធដែលមានស្នាដៃល្អ និងទទួលបានការគាំទ្រជាបន្តបន្ទាប់ អាជីពនេះនឹងអាចឲ្យអ្នកធ្វើដំណើរកម្សាន្ត និងរកចំណូលបានច្រើនក្នុងពេលតែមួយ។

២. អ្នកថតរូប

គឺជាអាជីពមួយទៀតដែលស្ថិតក្នុងផ្នែកការងារសិល្បៈ មិនសូវខុសប្លែកពីវិចិត្រករគូររូបដែលត្រូវយល់ដឹងពីអ្វីដែលនៅជុំវិញខ្លួន និងចេះប្រើការស្រមើស្រមៃមុននឹងលើកកាមេរ៉ាថត ដើម្បីទទួលបានរូបភាពដែលស្រស់ស្អាត។ បច្ចុប្បន្នអាជីពនេះកំពុងមានតម្រូវការខ្ពស់មិនថានៅតាមស្ថាប័ន ឬជាអាជីពឯករាជ្យ ហើយអ្នកនឹងមានឱកាសធ្វើដំណើរទៅទីកន្លែងផ្សេងៗជាច្រើនដើម្បីធ្វើការងារនេះ។

៣. Graphic Designer

ដោយការរីកចម្រើននៃបច្ចេកវិទ្យា បច្ចុប្បន្នអាជីព Graphic Designer ក៏កំពុងមានតម្រូវការច្រើនដែរ និងត្រូវបានបែងចែកជាច្រើនផ្នែកតូចៗទៀតដូចជា Web Design, Print Design, Brand Identity, ឬ Packaging ជាដើម។ អ្នកធ្វើការផ្នែកនេះមានឱកាសក្នុងការចេញធ្វើការបែបឯករាជ្យច្រើន ហើយចំណូលវិញក៏ខ្ពស់គួរសមដែរ ដែលអាចឲ្យអ្នកមានពេលនិងប្រាក់កាសគ្រប់គ្រាន់សម្រាប់ការធ្វើដំណើរ។

៤. Blogger

ការសរសេរអត្ថបទ រឿងរ៉ាវ ទាំងរឿងផ្ទាល់ខ្លួន រឿងទូទៅ រឿងមុខជំនួញ ឬសូម្បីតែការ Review ផលិតផលផ្សេងៗ ក៏ជាវិធីមួយដែលអាចរកលុយតាមអនឡាញដែរ។ បើសិនជាអ្នកមានទឹកដៃក្នុងការសរសេរ អាចទាក់ទាញអ្នកតាមដានកាន់តែច្រើន នោះឱកាសក្នុងការដាក់ពាណិជ្ជកម្មគឺមានកាន់តែច្រើន។ Blogger ខ្លះអាចរកចំណូលបានច្រើនមិនចាញ់អ្នកធ្វើការទូទៅឡើយ ដូច្នេះហើយពួកគេអាចធ្វើដំណើរកម្សាន្តពេលណាក៏បានដោយមិនខ្លាចប៉ះពាល់ដល់ការងារឡើយ ហើយដើរកម្សាន្តអាចឲ្យពួកគេជួបបទពិសោធន៍ថ្មីៗដែលអាចយកមកបន្ថែមក្នុងអត្ថបទរបស់ខ្លួនទៀត។

៥. Event Planner

Event Planner គឺអ្នកដែលមានតួនាទីរៀបចំកម្មវិធីផ្សេងៗ មិនថាជាកម្មវិធីអាពាហ៍ពិពាហ៍ កម្មវិធីសម្ពោធផលិតផល កម្មវិធីជប់លៀង និងពិធីបុណ្យផ្សេងៗ។ ប្រសិនបើអ្នកមានចំណេះដឹង សមត្ថភាព និងចាប់អារម្មណ៍ចង់ធ្វើការងារផ្នែកនេះមែន នោះអ្នកនឹងមានឱកាសធ្វើការផង និងធ្វើដំណើរកម្សាន្តតាមទីកន្លែងផ្សេងៗផង។

៦. ការងារពាក់ព័ន្ធការធ្វើដំណើរលើយន្តហោះ

ការងារត្រង់នេះគឺសំដៅលើអ្នកបើកយន្តហោះ និងអ្នកបម្រើការលើយន្តហោះ ដែលជាអាជីពក្នុងក្ដីស្រមៃមនុស្សជាច្រើន ព្រោះវាផ្ដល់ប្រាក់កម្រៃខ្ពស់ ហើយក៏មានឱកាសបានដើរកម្សាន្តក្រៅប្រទេសច្រើនដែរ ប៉ុន្តែការប្រកួតប្រជែងក៏មានច្រើនដូចគ្នា ដែលទាមទារឲ្យអ្នកមានសមត្ថភាពខ្ពស់។

៧. មគ្គុទ្ទេសក៍

ការដែលមានការប្រាស្រ័យទាក់ទងល្អ មានទេពកោសល្យក្នុងការពន្យល់អធិប្បាយ និងចូលចិត្តការធ្វើដំណើរទៅទីកន្លែងផ្សេងៗ គឺជាគុណសម្បត្តិធំៗសម្រាប់អ្នកប្រកបការងារមគ្គុទ្ទេសក៍។ ការងារនេះនឹងអាចឲ្យអ្នកផ្លាស់ប្ដូរបរិយាកាស និងទៅដល់ទីកន្លែងកម្សាន្តផ្សេងៗជាច្រើន។

៨. អ្នកបុរាណវិទ្យា

អ្នកបុរាណវិទ្យានឹងអាចធ្វើដំណើរទៅកាន់ប្រទេសផ្សេងៗលើពិភពលោកដើម្បីជួសជុល និងកែលម្អ ក៏ដូចជាសិក្សាស្រាវជ្រាវពីសំណង់បុរាណ និងតំបន់វប្បធម៌នានារបស់មនុស្សជំនាន់មុន។ ជាធម្មតាអ្នកបុរាណវិទ្យាដែលអាចធ្វើដំណើរទៅកាន់ទីកន្លែងផ្សេងៗទូទាំងពិភពលោកបាន យ៉ាងហោចណាស់ត្រូវមានសញ្ញាប័ត្រលំដាប់បរិញ្ញាបត្រជាន់ខ្ពស់ ឬបណ្ឌិត ព្រមទាំងបទពិសោធន៍ច្រើន ៕

ចុចអាន៖