ហ៊ុន​ ច័ន្ទរាជ្យ៖​ ខ្ញុំ​រង់ចាំ​ថ្ងៃ​នេះ​យូរហើយ​

  • 2018-10-24 04:27:50
  • ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូ​ប្រដាល់​ MMA​ ហ៊ុន​ ច័ន្ទរាជ្យ​ ថា​រង់ចាំ​ថ្ងៃ​ប្រកាស​បើក​ទទួល​ស្គាល់ជា​ផ្លូវ​ការ​ សហព័ន្ធ​កីឡា​យុទ្ធគុន​ចម្រុះ​កម្ពុជា​ នេះ​ហើយ​យូរ​ហើយ​ ព្រោះ​ចេញ​ទៅ​ប្រកួត​លើក​មុន​ៗ​ គឺ​បាន​ត្រឹម​ចេញ​តំណាងក្លឹប​ឯកជន​ផ្ទាល់​ខ្លួន​ប៉ុណ្ណោះ។​

ទិដ្ឋភាព​ម្សិលមិញ​

លោក​ ហ៊ុន​ ច័ន្ទរាជ្យ​ បាន​ឲ្យ​ដឹង​ថា​ ពិត​ជា​សប្បាយ​រីករាយ​ដែល​សហព័ន្ធ​ MMA​ នេះ​បើក​ដំណើរ​ការ​ជា​ថ្មី​ឡើង​វិញ​ បន្ទាប់​ពី​អាក់ខាន​ និង​មិន​មាន​សកម្មភាព​យូរ​ណាស់​មក​ហើយ។​ ពី​មុន​កីឡាករ​ចេញ​ទៅ​ប្រកួត​នៅ​ក្រៅ​ប្រទេស​ ដូច​ជា​ One Championships FMD​ និង​កម្មវិធី​អន្តរជាតិ​មួយ​ចំនួន​ទៀត​នោះ​ គឺ​បាន​ត្រឹម​តែ​តំណាង​ឲ្យ​ក្លឹប​ប៉ុណ្ណោះ​ ប៉ុន្តែ​ឥលូវ​ចេញ​ប្រកួត​ចាប់​ពី​ពេល​នេះ​ អាច​លើក​ទង់ជាតិ​កម្ពុជា​បាន​ហើយ​ តំណាង​ប្រទេស​កម្ពុជា។​ ជំហាន​បន្ទាប់​ទៀត​នេះ​ អគ្គលេខាធិការ​ថ្មីថ្មោង​រូប​នេះ​ នឹង​ព្យាយាម​បណ្ដុះ​ធនធាន​កីឡាករ​ថ្មីៗ​បន្ថែម​ ដើម្បី​បំពេញ​តម្រូវ​ការ​ទីផ្សារ​ប្រកួត​នៅ​អន្តរជាតិ​ ក៏​ដូច​ជា​លើក​ស្ទួយ​មុខមាត់​ប្រទេស​កម្ពុជា​ និង​រួម​ចំណែក​លើក​កម្ពស់​ជីវភាព​កីឡាករ​ កីឡា​ការិនី​កម្ពុជា​ផង​ដែរ។​

លោកគ្រូ ហ៊ុន ច័ន្ទរាជ្យ

ឯកឧត្ដម​ វ៉ាត់​ ចំរើន​ ប្រធាន​សហព័ន្ធ​ខាង​លើ​នេះ​ លើក​ឡើង​ដែរ​ថា​ ពី​មុន​មាន​ម្ដង​ហើយ​ MMA​ នេះ​ តែ​ដោយ​សារ​មិន​ទាន់​មាន​គេ​ស្គាល់​ មិន​ទាន់​ពេញ​និយម​ ទើប​មិន​សូវ​មាន​ការ​ផុលផុស​ដូច​ឥលូវ។​ ដោយ​ឡែក​បច្ចុប្បន្ន​នេះ​ មាន​ការ​ជួយ​ជ្រោមជ្រែង​ខ្លាំង​ ខិតខំ​ជួយ​រក​ទីផ្សារ​ និង​បណ្ដុះបណ្ដាល​កីឡាករផង​ ពី​លោក​ ហ៊ុន​ ច័ន្ទរាជ្យ​ គឺ​មាន​ការ​ពេញ​និយម​ច្រើន​ ដូច្នេះ​ដល់​ពេល​សម​ល្មម​និង​បង្កើត​ឡើង​វិញ​ផង​ដែរ។​

ទិដ្ឋភាព​ម្សិលមិញ​

រំលឹក​ដែរ​ថា​ ម្សិលមិញ​នេះ​សហព័ន្ធ​កីឡា​យុទ្ធ​គុន​ចម្រុះ​កម្ពុជា(MMA)​ បាន​ប្រកាស​បើក​ជា​ផ្លូវ​ការ​វិញ​ហើយ​ នៅ​ឯ​គណៈកម្មាធិការ​ជាតិ​អូឡាំពិក​កម្ពុជា។​ កម្មវិធី​នេះ​ដែរ​ មាន​ការ​ចូលរួម​ពី​ប្រធាន​សហព័ន្ធ​ ឯកឧត្ដម​ វ៉ាត់​ ចំរើន​ លោក​ ហ៊ុន​ ច័ន្ទរាជ្យ ​អគ្គលេខាធិការ​ និង​ថ្នាក់​ដឹកនាំ​ផ្សេងៗ​ទៀត​ រួម​ទាំង​កីឡាករ​ MMA​ មួយ​ចំនួន​ផង​ដែរ៕​


អត្ថបទ៖ នួន ស៊ីណា​