សាកល្បងទម្លាក់ iPhone XR និង iPhone 8 ពីទីខ្ពស់ ចុងក្រោយរកឃើញអ្នកឈ្នះ

2018-10-29 11:45:00
ចំនួនមតិ 0 | ចំនួនចែករំលែក 0

ចន្លោះមិនឃើញ

iPhone XR ទើបមានលក់លើទីផ្សារសហរដ្ឋអាមេរិកកាលពីប៉ុន្មានថ្ងៃមុន ត្រូវបានក្រុមការងារ EverythingApplePro យកមកសាកល្បងទម្លាក់តេស្តមើលភាពមាំជាមួយ iPhone 8 សេរ៊ីឆ្នាំ ២០១៧ របស់ Apple។

ខ្នងក្រោយនៃម៉ូឌែលទាំងពីរពុំបានរុំព័ទ្ធដោយសារធាតុអាលុយមីញ៉ូមនោះទេ ពោលគឺស្រោបដោយកញ្ចក់ដូចគ្នា ប៉ុន្តែខាងក្រុមហ៊ុន Apple មិនទាន់បង្ហើបច្បាស់ថាកញ្ចក់ទាំងពីរមានភាពខុសប្លែកគ្នាឬបែបណា។ ចម្លើយពិតប្រាកដម្ចាស់ Channel មាន Subscriber ជាង ៦,៣ លាននាក់នឹងបង្ហាញជូនអ្នករាល់គ្នាដូចខាងក្រោម។

តេស្តក្នុងបីដំណាក់កាលផ្សេងពីគ្នា ដោយទម្លាក់គ្រប់ជ្រុងទាំងផ្នែកកញ្ចក់មុខ ក្រោយ និងគែមសងខាង ដោយកម្ពស់ត្រឹមចង្កេះនៅដំណាក់កាលទីមួយម៉ូឌែលទាំងពីរពុំមានការខូចខាតអ្វីទាំងអស់ ប៉ុន្តែចូលដល់ការសាកល្បងលើកទីពីរកម្ពស់ត្រឹមក្បាល យើងឃើញថា iPhone 8 បានប្រេះស្រាំអេក្រង់មុខ រហូតដល់រលត់សូន្យឈឹង មិនអាចដំណើរការទៅមុខទៀតបាន និងសូម្បីតែកញ្ចក់ខ្នងក្រោយក៏ត្រូវប្រេះម៉ត់អស់ដែរ។

ចូលដល់ដំណាក់កាលទីបីដែលសល់ត្រឹម iPhone XR កម្ពស់ ៩ ហ្វីត ប្រហែល ២,៧ ម៉ែត្រទើបឃើញថាខ្នងក្រោយរបស់ XR រងភាពប្រេះស្រាំ។ ថ្វីបើនេះជាលទ្ធផលដ៏ល្អរបស់ Apple សម្រាប់ iPhone តម្លៃ ៧៤៩ ដុល្លារ ប៉ុន្តែក្រុមការងារខាងលើនៅតែបន្តណែនាំដល់ប្រិយមិត្តអ្នកទស្សនាគួរណាទិញស្រោមការពារធ្លាក់ប្រើប្រាស់ជាប្រចាំ ព្រោះតាមឯកសារយោងកន្លងទៅតម្លៃផ្លាស់ប្តូរកញ្ចក់ក្រោយលើ XR ថ្លៃជិត ៣០០ ដុល្លារឯណោះ៕

ទស្សនាវីដេអូខាងក្រោម៖