៦សំណួរសំខាន់ ដើម្បីកំណត់ថាក្លឹបមានទោសឬអត់ក្នុងការចុះកុងត្រាជាមួយកីឡាករជាអនីតិជន

2018-11-17 07:32:37
ចំនួនមតិ 0 | ចំនួនចែករំលែក 0

ចន្លោះមិនឃើញ

តើ FIFA មានច្បាប់អ្វីខ្លះក្នុងការចុះហត្ថលេខាលើអនីតិជន? តើក្លឹបណាខ្លះធ្លាប់បានប្រព្រឹត្តបទល្មើសនេះ? ហើយតើមានផលវិបាកអ្វីខ្លះបើ FIFA រកឃើញថាមានទោស? ខាងក្រោមនេះគឺជា៦សំណួរចាំបាច់ ដើម្បីស្វែងយល់អំពីច្បាប់ FIFA ក្នុងការការពារអនីតិជន។

១ បើរកឃើញមានទោស តើអ្វីជាការពិន័យ?

Chelsea គឺជាក្លឹបមួយក្នុងចំណោមក្លឹប៥នៅ Premier League ស្ថិតក្រោមការស៊ើបអង្កេតអំពីការរំលោភបំពានលើច្បាប់ស្តីពីការចុះហត្ថលេខាលើកីឡាករបរទេសដែលមានអាយុក្រោម ១៨ ឆ្នាំ។ ប៉ុន្តែនេះមិនមែនជារឿងថ្មីទេ។

Zinedine Zidane និយាយជាមួយកូនប្រុស Enzo Zidane ក្នុងអំឡុងពេលការប្រកួត Copa del Rey រវាង Real Madrid និង Cultural Leonesa នៅឆ្នាំ ២០១៦

Barcelona ត្រូវបានរកឃើញថាបំពាននឹងច្បាប់ខាងលើ ហើយត្រូវបាន FIFA ពិន័យដោយហាមមិនឲ្យលក់ចេញឬទិញចូល អំឡុងទីផ្សារដោះដូរកីឡាករចំនួន២ដងកាលពីឆ្នាំ២០១៤ នៅពេលដែលក្លឹបអេស្ប៉ាញមួយនេះត្រូវបានរកឃើញថាមានជាប់ពាក់ព័ន្ធនឹងកីឡាករក្រោមអាយុ១៨ឆ្នាំមួយចំនួនពីប្រទេសកូរ៉េ និង អាហ្វ្រិក។

មួយឆ្នាំក្រោយមក ក្លឹប Madrid ទាំង២ត្រូវបានរកឃើញពិរុទ្ធពីបទល្មើសដូចនឹង Barcelona ដែរហើយត្រូវជាប់បម្រាមមិនអាចផ្ទេរកីឡាករអំឡុងទីផ្សារដោះដូរចំនួន២ដង។ Real Madrid កាលណោះក៏បានចុះកុងត្រាជាមួយកូនប្រុសរបស់ Zinedine Zidane ផងដែរ។

២ តើច្បាប់របស់ FIFA ចែងដូចម្ដេច? ហើយមានករណីលើកលែងឬអត់?

មាត្រា ១៩ របស់ FIFA គឺការការពារអនីតិជន។ អនីតិជនត្រូវបានចាត់ទុកថាជាកីឡាករដែលមានអាយុក្រោម ១៨ ឆ្នាំ ឬ ចន្លោះពី ១៦ ទៅ ១៨ ឆ្នាំសម្រាប់ការផ្ទេរនៅក្នុងសហភាពអឺរ៉ុប។

ប៉ុន្តែមានករណីលើកលែង៣ជាទូទៅដែលក្លឹបអាចចុះកិច្ចព្រមព្រៀងទិញកីឡាករដែលជាអនីតិជនបាន។ ទី១ ឪពុកម្តាយរបស់កីឡាករបានផ្លាស់ទីលំនៅទៅប្រទេសថ្មីដោយសារមូលហេតុដែលមិនទាក់ទងទៅនឹងបាល់ទាត់។ ទី២ កន្លែងដែលកីឡាកររស់នៅមិនឆ្ងាយជាង ៥០ គីឡូម៉ែត្រពីព្រំដែនប្រទេសរបស់គេ។ ទី៣ បើកីឡាករដែលជាអនីតិជន មានអាយុចន្លោះពី ១៦ ទៅ ១៨ឆ្នាំ ក្លឹបអាចទិញបាន ប៉ុន្តែត្រូវមានលក្ខខ័ណ្ឌ អប្បបរមានៃការហ្វឹកហាត់បាល់ទាត់ ផ្តល់ការសិក្សាអប់រំ កន្លែងស្នាក់នៅ និង ការថែទាំសុខុមាលភាពរបស់កុមារឲ្យបានប្រសើរ។

៣ តើអ្វីទៅជាប្រព័ន្ធត្រួតពិនិត្យទីផ្សារដោះដូរ?

ប្រព័ន្ធត្រួតពិនិត្យទីផ្សារដោះដូរ (transfer matching system) ឬហៅកាត់ TMS គឺជាទម្រង់កត់ត្រាការផ្ទេរកីឡាកររវាងក្លឹបដោយប្រើប្រព័ន្ធអនឡាញតាំងពីឆ្នាំ២០១០មកម្ល៉េះ។ ទម្រង់នេះក្លឹបដាច់ខាតត្រូវតែបំពេញ ហើយវាត្រួតពិនិត្យទិន្នន័យរបស់កីឡាករដែលជាអនីតិជនតាំងពីអាយុ១០ឆ្នាំឡើងទៅ។ ក្លឹបនិងកីឡាករត្រូវបានតម្រូវឱ្យបញ្ចូលព័ត៌មានលំអិតអំពីការផ្ទេរ។

៤ តើ FIFA មានលទ្ធភាពពេញលេញក្នុងការគ្រប់គ្រងការដោះដូរកីឡាករពីប្រទេសមួយទៅប្រទេសមួយដែរឬទេ?

មិនទេ។ ច្បាប់ការងារខុសគ្នារវាងប្រទេសមួយទៅប្រទេសមួយសូម្បីតែនៅសហភាពអឺរ៉ុប។ នៅអេស្ប៉ាញ កីឡាករអាយុក្មេងបំផុតដែលអាចអាចចុះហត្ថលេខាលើកិច្ចសន្យាបាល់ទាត់អាជីពបានលុះត្រាតែមានអាយុក្មេងបំផុតយ៉ាងហោចណាស់ ១៨ឆ្នាំ។

Chelsea រងការស៊ើបអង្កេតពី FIFA ជុំវិញការចុះហត្ថលេខាលើអតីតកីឡាករវ័យក្មេង Bertrand Traore

រីឯនៅប្រទេសអង់គ្លេសពួកគេអាចចុះកិច្ចសន្យាបាននៅត្រឹមអាយុ១៦ឆ្នាំ ប៉ុន្តែត្រូវគេឲ្យឈ្មោះថាជាកិច្ចសន្យាអាហារូបករណ៍ និង ហើយអាចចុះកិច្ចសន្យាបាល់ទាត់អាជីពបាននៅពេលគេមានអាយុ ១៧ ឆ្នាំ។ ម្ល៉ោះហើយទើបអង់គ្លេសអាចឆក់យកកីឡាករបរទេសក្មេងៗមានទេពកោសល្យបានច្រើនជាងប្រទេសផ្សេងៗនៅអឺរ៉ុប។

៥ តើធ្លាប់មានករណីចុះកុងត្រាកីឡាករដែលជាអនីតិជន តែត្រូវបានច្បាប់លុបចោលពីព្រោះឪពុកម្ដាយរបស់ពួកគេត្រូវផ្លាស់លំនៅទៅបរទេស បើទោះមិនមែនដោយសារហេតុផលបាល់ទាត់?

កាលពីឆ្នាំ ២០០៥ ការផ្ទេរកីឡាករសញ្ជាតិប៉ារ៉ាហ្គាយវ័យ ១៦ឆ្នាំ Carlos Javier Caballero ទៅឱ្យ FC Cadiz ក្នុងប្រទេសអេស្ប៉ាញត្រូវបានច្រានចោល។ មួយសប្ដាហ៍បន្ទាប់ពី Javier Caballeroចុះហត្ថលេខា ម្តាយរបស់គេទទួលបានការងារនៅភោជនីយដ្ឋានមួយនៅក្នុងប្រទេសអេស្ប៉ាញ។

សហព័ន្ធកីឡាបាល់ទាត់ប៉ារ៉ាហ្គាយបានបដិសេធមិនចេញវិញ្ញាបនបត្រផ្ទេរអន្តរជាតិដោយសារតែអាយុរបស់កីឡាករ។ ប៉ុន្តែ សហព័ន្ធបាល់ទាត់អេស្ប៉ាញបានស្នើទៅ FIFA ដើម្បីជួយរកដំណោះស្រាយ ព្រោះយោងទៅលើករណីលើកលែងរបស់មាត្រា១៩លើ ដោយថាម្តាយរបស់ កីឡាករសញ្ជាតិប៉ារ៉ាហ្គាយផ្លាស់លំនៅឋានមិនមែនក្នុងគោលបំណងបាល់ទាត់ទេ គឺអ្នកស្រីមកធ្វើការនៅអេស្ប៉ាញ។

យ៉ាងណាក្តី FIFA ច្រានចោល ហើយធ្វើតាមការសម្រេចរបស់សហព័ន្ធកីឡាបាល់ទាត់ប្រទេសប៉ារ៉ាហ្គាយ ព្រោះគណៈកម្មាធិការរបស់ FIFA ជឿថាការផ្លាស់លំនៅរបស់ឪពុកម្តាយ Javier Caballero មានជាប់ពាក់ព័ន្ធនឹងការចុះកុងត្រារបស់កូនប្រុស។

៦ តើមានរូបភាពអ្វីខ្លះដែលក្លឹបព្យាយាមទិញកីឡាករជាអនីតិជនដើម្បីបន្លំភ្នែក FIFA?

កីឡាករបាល់ទាត់ក្មេងៗជាច្រើនត្រូវបានរកឃើញថា បានចុះហត្ថលេខាជាមួយក្លឹបតាមរយៈរូបភាពអាហារូបករណ៍ទៅសិក្សានៅបរទេស។

កន្លងមកក្លឹប FC Midtjylland បានចុះកិច្ចព្រមព្រៀងផ្ទេរកីឡាករអនីតិជន ៣នាក់របស់ហូឡង់ តែត្រូវ FIFA បង្ខំឲ្យអនុវត្តន៍តាមមាត្រា១៩។

Lederman ថតរូបជាមួយ Messi

Barcelona ក៏ធ្លាប់មានរឿងរ៉ាវស្រដៀងនេះកាលពី២ឆ្នាំមុន។ កីឡាករ Lederman របស់អាមេរិក ដោយបានប្រើលិខិតឆ្លងដែនប៉ូឡូញ ដែលជាសញ្ជាតិមួយទៀតរបស់ខ្លួន ដើម្បីចុះហត្ថលេខាជាមួយយុវជនរបស់ក្លឹបអ្នកមានបុណ្យនៅអាយុ១៥ឆ្នាំ។ ប៉ុន្តែសហព័ន្ធបាល់ទាត់ពិភពលោកបានបង្ខំ Barcelona បញ្ជូន Lederman ទៅអាមេរិកវិញ ហើយពិន័យក្លឹបយក្សអេស្ប៉ាញមួយនេះមិនឲ្យចុះហត្ថលេខាយុវជនក្លឹបអស់រយៈពេលជាង១ឆ្នាំ៕

ប្រភព៖ theguardian ប្រែសម្រួល៖ សុខ លាងហ៊ត