អ្នកលេងរន្ទះជើង គង់ សំបូរ នឹងឡើងសង្វៀន ONE បន្ទាប់ពីសុខ ធី
- 2018-11-22 00:55:49
- ចំនួនមតិ 0 | ចំនួនចែករំលែក 0
អ្នកលេងរន្ទះជើង គង់ សំបូរ នឹងឡើងសង្វៀន ONE បន្ទាប់ពីសុខ ធី
ចន្លោះមិនឃើញ
ស្ថាប័នប្រដាល់ធំប្រចាំអាស៊ី ONE Championship បានសម្រេចបញ្ចូលសមាជិកអ្នកប្រយុទ្ធកម្ពុជាថ្មីម្នាក់ទៀតហើយគឺ គង់ សំបូរ មកពីក្លឹប «អាណាចក្រប្រយុទ្ធ» ខេត្តសៀមរាបដើម្បីត្រៀមខ្លួនបង្ហាញខ្លួនលើឆាកអន្តរជាតិ។
ថ្មីៗនេះក្លឹបអាណាចក្រប្រយុទ្ធបានចាប់ដៃជាមួយ Ernesto Hoost ជើងឯក K-1ពិភពលោក និងជើងខ្លាំងប្រដាល់ Andy Souwer ហើយឥឡូវនេះមានជើងខ្លាំងប្រចាំក្លឹបឡើងប្រកួតក្នុងសង្វៀនធំជាងគេនៅអាស៊ីទៀត។
ម្ចាស់ក្លឹប អាណាចក្រប្រយុទ្ធ លោក Kwok Leung Tsang និយាយពេលគង់ សំបូរ ចុះកុងត្រាជាមួយ ONE ៖«បានចូលក្នុងស្ថាប័ននេះ ក្នុងស្តង់ដារកម្រិតនេះ…ពិតជានិយាយមិនចេញ ខ្ញុំគិតថា យើងនឹងល្បីខ្លាំងពេលទៅដល់សង្វៀន ក្នុងចំណោមភ្នែកទស្សនិកជនជាច្រើនស្ទើរជុំវិញពិភពលោក និងនៅមុខកាមេរ៉ាទាំងនោះ។ ពេលនោះប្រាកដជា រំភើបខ្លាំងហើយនិយាយមិនចេញទេ»។
គង់ សំបូរ នឹងត្រូវឡើងប្រកួតក្នុងកម្មវិធី ONE Super Series នាពេលខាងមុខ បន្ទាប់ពីជើងខ្លាំងវ័យក្មេងរបស់កម្ពុជា សុខ ធី បានបង្ហាញមុខ២ដងហើយ។ គេមិនទាន់ដឹងថា កីឡាករកម្ពុជាពូកែទាត់រូបនេះនឹងត្រូវឡើងសង្វៀនថ្ងៃណាឲ្យប្រាកដនោះទេ ប៉ុន្តែ ONE នឹងរៀបចំចាប់គូឆាប់ៗនេះ ទោះជាទើបចុះកុងត្រាថ្មីក៏ដោយ។
Tsang និយាយថា ៖«ពួកយើងភ្ញាក់ផ្អែល ព្រះអើយ... ONE ទើបចុះត្រាសោះ ហើយឥឡូវគេផ្តល់ឱកាសឲ្យភ្លាមៗតែម្តង? សប្បាយមិនខាន!»។
«យើងត្រូវធ្វើយ៉ាងណាឲ្យល្បីម្តងនេះ។ មនុស្សម្នាច្រើននឹងតាមដាន ទាំងឈ្មោះ គង់ សំបូរ ទាំងឈ្មោះក្លឹប កម្ពុជា ក៏ដូចជាសៀមរាប និងមានខ្ទរខ្ទារក្នុងឆាកអន្តរជាតិ។ អីចឹង យើងត្រូវតែសំរុកឲ្យខ្លាំងក្នុងការប្រកួតមួយនេះ។ ពិភពលោកកំពុងយកភ្នែកមើលយើង ONE បានជួយធ្វើរឿងល្អៗជាច្រើនសម្រាប់ប្រទេសតូចៗដូចជា កម្ពុជា ឡាវ និងភូមាជាដើម»។
លោកបន្តថា ៖«ខ្ញុំបានប្រឡូកក្នុងវិស័យក្បាច់គុននេះប្រហែល២០ឆ្នាំមកហើយ ខ្ញុំឲ្យតម្លៃសិល្បៈក្បាច់គុននេះណាស់។ អ្នកខ្លះគិតថា ក្បាច់គុន គ្រាន់តែសម្រាប់វ៉ៃគ្នាប៉ុណ្ណោះ ប៉ុន្តែបើយើងសង្កេតមើលមកអ្នកប្រដាល់នៅទីនេះវិញ មើលពីការគោរពដែលពួកគាត់មាន មិនមែនចេះតែនិយាយៗទេ គឺឲ្យតម្លៃគ្នាទៅវិញទៅមក»។
ក្នុងរដូវកាលបុណ្យអុំទូកនេះ ទាំងប្រធានក្លឹប និង គង់ សំបូរផ្ទាល់នៅតែប្រឹងប្រែងហ្វឹកហាត់ដើម្បីត្រៀមឡើងសង្វៀននាពេលខាងមុខ។ ពួកគាត់ស្វាគមន៍គ្រប់ឧបសគ្គចំពោះមុខទាំងអស់ ហើយទន្ទឹងនឹងហ្វឹកហាត់ឲ្យខ្លាំងបន្ថែមទៀតដើម្បីបង្ហាញមុខក្នុងសង្វៀន ONE ជាលើកដំបូង។
«ពេលនេះយើងមិនឲ្យគាត់ទៅប្រកួតនៅណាទេ យើងទុកពេល ៤អាទិត្យសម្រាប់ហ្វឹកហាត់ឲ្យណាណីតែម្តង យើងត្រៀមរួចរាល់ហើយ»៕