ចាន់ រតនា ប្តេជ្ញាធ្វើឲ្យភ្ញាក់ផ្អើលសង្វៀន ONE ដើមខែក្រោយ

2018-11-25 07:22:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាន់ រតនា ប្តេជ្ញាធ្វើឲ្យមានការភ្ញាក់ផ្អើលនៅពេលរូបគេវិលចូលកាន់សង្វៀនអន្តរជាតិ ONE ជាថ្មីនៅពេលរូបគេជួបជើងខ្លាំងមិនដែលចាញ់របស់ឥណ្ឌូណេស៊ីនាថ្ងៃទី៧ ខែធ្នូ ឆ្នាំ២០១៨នៅប្រទេសម៉ាឡេស៊ី។

ដើមឡើយ ចាន់ រតនា និងកីឡាករឥណ្ឌូណេស៊ី Abro Fernandes ត្រូវជួបគ្នាកាលពីថ្ងៃទី៩ ខែវិច្ឆុកា កន្លងទៅនៅសិង្ហបុរី ប៉ុន្តែដោយសារដៃគូមានបញ្ហាក៏ត្រូវបានពន្យារពេលទៅខែធ្នូវិញ។គ្រូបង្វឹកគុនខ្មែរក្លឹប«សិល្បៈ» វ័យ៣២ឆ្នាំបានហ្វឹកហាត់យ៉ាងខ្លាំងដើម្បីត្រៀមប្រកួតលើកនេះ។

ចាន់ រតនា

រតនា បាននិយាយថា ៖«ខ្ញុំបានត្រៀមស្មារតីសម្រាប់ការប្រកួតនេះរួចហើយ ត្រៀមតាំងពីត្រូវវ៉ៃថ្ងៃ៩ មកម្ល៉េះ មកដល់ឥឡូវខ្ញុំបន់ឲ្យតែឆាប់ដល់ថ្ងៃប្រកួតទេ។ ខ្ញុំចង់បង្ហាញអ្វីដែលថ្មីនៅ ONE Championship ឱ្យគេចាប់អារម្មណ៍ខ្ញុំច្រើនជាងនេះទៀត»។

អ្នកប្រដាល់ជើងចាស់ ចាន់ រតនា មិនប្រកួតប្រដាល់ចម្រុះតាំងពីឆ្នាំ២០១៧មកម្លេះ ប៉ុន្តែបានហ្វឹកហាត់ជាប្រចាំក្នុងប្រទេស និងនៅក្រៅប្រទេស ដូចជាភូមាជាដើមជាមួយកូនសិស្ស Phoe Thaw និងជាមួយអ្នកលេងសាច់ដុំ Emmanuel Onyedikachi ជាដើម។

លោក Lorenzo Lanzafame គ្រូបង្វឹកផ្ទាល់កំពុងជួយត្រៀមស្នៀតពិសេសៗបន្ថែមទៅលើសមត្ថភាព និងភាពខ្លាំងរបស់រតនាថែមទៀត។ Lanzafame និយាយថា៖ «ខ្ញុំប្រាកដណាស់ថា វានឹងកក្រើកសង្វៀនមិនខាន ហើយខ្ញុំភ្នាល់ថាទឹកទី១ នឹងជាទឹកចុងក្រោយ»។

ចាប់តាំងពីប្រឡូកក្នុងវិស័យក្បាច់គុនខ្មែរមក រតនា បង្ហាញពីជំនឿ និងមោទនភាពរបស់ក្បាច់គុនខ្មែរ ដែលមានប្រវត្តិយូរលង់តាំងពីសម័យអង្គរមកម្លេះ។ គាត់ជឿជាក់ថា ចូលវ៉ៃក្នុងទ្រុងជាមួយ Fernandes នៅខែធ្នូ នេះនឹងក្លាយជាកំណត់ត្រាមួយទៀតក្នុងប្រវត្តិសាស្រ្តរបស់ខ្លួន។

យ៉ាងណាមិញគូប្រកួតជនជាតិឥណ្ឌូណេស៊ីលើកនេះ នឹងមិនងាយស្រួលផ្តួលប៉ុន្មានទេ គេមានប្រវត្តិវ៉ៃនៅសង្វៀន ONE ឈ្នះបាន៧លើកជាប់ៗគ្នា។ ចាន់ រតនា បង្ហាញអារម្មណ៍ ៖ «ពួកគាត់ចង់ឱ្យខ្ញុំឈ្នះរាល់ការប្រកួត។ វាធ្វើឱ្យខ្ញុំសប្បាយចិត្តណាស់ ហើយដែលធ្វើឱ្យខ្ញុំតស៊ូវ៉ៃឈ្នះគ្រប់ការប្រកួតដែរ។ ខ្ញុំប្រកួតមិនសម្រាប់តែខ្លួនឯងទេ ប៉ុន្តែខ្ញុំប្រកួតសម្រាប់អ្នកគាំទ្ររបស់ខ្ញុំទាំងអស់ផងដែរ។ តាមពិតខ្ញុំសប្បាយចិត្តជាង ពេលឃើញអ្នកគាំទ្រខ្ញុំសប្បាយចិត្ត»៕

អត្ថបទ៖ ជាន ចាន់រ៉ា