ឡៅ ចិត្រា ប្រាប់មូលហេតុនាំឲ្យមានអ្នកគាំទ្រច្រើននាពេលបច្ចុប្បននេះ

2018-12-06 03:10:39
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់មកពីខេត្តកំពង់ស្ពឺ ឡៅ ចិត្រា ប្រាប់មូលហេតុដែលមានអ្នកគាំទ្រស្រឡាញ់ចូលចិត្តច្រើននោះ គឺដោយសារតែពេលដែលខ្លួនប្រកួតអស់ពីសមត្ថភាព និងវ៉ៃដោយមិនចេះខ្លាចដៃគូនោះឡើយ។

កីឡាករ ឡៅ ចិត្រា

ចិត្រា ប្រាប់ឲ្យដឹងថា រាល់ការប្រកួតទាំងអស់គឺតាំងចិត្តបានល្អ ឡើងទៅដើម្បីវ៉ៃ ដូច្នេះមិនថាដៃគូល្អ ឬខ្លាំងប៉ុណ្ណាទេ ដឹងតែវ៉ៃឲ្យអស់ពីសមត្ថភាព ចាញ់ឈ្នះពេលប្រកួតចប់បានដឹង។ ចំណុតទាំងនេះហើយ ដែលអ្នកគាំទ្រពេញចិត្ត និងស្រឡាញ់ខ្លួននាពេលកន្លងមកនេះ។

ម្ចាស់មេដាសំរឹទ្ធស៊ីហ្គេមរូបនេះលើកឡើងទៀតថា ទន្ទឹមនិងការជោគជ័យមានអ្នកគាំទ្រច្រើនបែបនេះ ខ្លួនឯងគឺតែងតែត្រៀមខ្លួនបានល្អសម្រាប់ការប្រកួតម្ដងៗ ជាពិសេសការហ្វឹកហាត់តែម្ដង ហាត់ឲ្យបានច្រើន។ ប៉ុន្តែមួយរយៈពេលនេះមានការរវល់ច្រើននៅក្នុងបន្ទាយ ដូច្នេះពេលខ្លះមកហាត់នៅក្លឹប ពេលខ្លះក៏ហាត់ទាហានផងដែរ។

ឡៅ ចិត្រា ក្រហម

រំលឹកដែរថា ឡៅ ចិត្រា ជាអ្នកប្រដាល់ដែលមានកេរ្តិ៍ឈ្មោះល្បីល្បាញម្នាក់នៅកម្ពុជា ធ្លាប់ឈ្នះមេដាយសំរឹទ្ធស៊ីហ្គេមឆ្នាំ២០១៧ នៅម៉ាឡេស៊ី ធ្លាប់ឈ្នះមេដាយមាសថ្នាក់ជាតិច្រើនគ្រឿង។ អ្នកប្រដាល់ដើមកំណើតមកពីខេត្តកំពង់ស្ពឺម្នាក់នេះកម្រចាញ់ការប្រកួតខ្លាំងណាស់ ហើយភាគច្រើនវ៉ៃតែជាមួយបរទេសនោះទេ។ ជើងខ្លាំងខាងលើនឹងត្រូវប្រកួតផ្ដាច់ព្រ័ត្រខ្សែក្រវាត់ខារាប៉ាវ ទម្ងន់ ៦០គីឡូក្រាមថ្ងៃទី១៦ ធ្នូ ២០១៨ នៅសង្វៀនបាយ័ន៕

អត្ថបទ៖ នួន ស៊ីណា