ស្ត្រីម្នាក់នេះហើយជាបងស្រីបង្កើត Beat Richner រៀបរាប់ពីរឿងរ៉ាវប្អូនប្រុសទាំងក្ដុកក្ដួល

2018-12-06 03:11:01
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃទី០៥ ខែធ្នូ ឆ្នាំ២០១៨ ម្សិលមិញនេះអដ្ឋិធាតុរបស់លោកវេជ្ជបណ្ឌិត Beat Richner បាននាំយកមកពីទីក្រុងហ្សួរិច ប្រទេសស្វីស ដែលឱបក្រសោបដោយដៃស្ត្រីវ័យចំណាស់ម្នាក់ ត្រូវជាបងស្រីបង្កើតរបស់លោកមានឈ្មោះថា Annaregula Lutz ដើម្បីសម្រេចបំណងចុងក្រោយរបស់ប្អូនប្រុស ដែលចង់ឲ្យយកអដ្ឋិធាតុមកតម្កល់ទុកនៅទឹកដីខេត្តសៀមរាប។

លោកយាយ Annaregula Lutz លើកដៃសំពះ (រូបភាព៖ Dr. Beat Richner)

លោកយាយ Annaregula Lutz បានរៀបរាប់បន្ថែមអំពីមូលហេតុដែលយកអដ្ឋិធាតុរបស់ប្អូនប្រុសមកតម្កល់នៅសៀមរាបទាំងសំឡេងហាក់ដូចជាក្រៀមក្រំថា នេះជាការចងចាំមួយសម្រាប់ប្រជាជនខ្មែរ ចំពោះវីរភាពរបស់លោកបណ្ឌិត Beat Richner នូវអ្វីដែលលោកបានជួយដល់កម្ពុជា ដែលប្រជាជនខ្មែរគោរពស្រលាញ់ផ្ដល់តម្លៃឲ្យលោក នូវការលះបង់ដ៏ធំធេងរបស់លោក។ ដូច្នេះការយកអដ្ឋិធាតុ របស់ប្អូនប្រុសលោកយាយមកតម្កល់ទីនេះ គឺស័ក្ដិសមបំផុត ចំពោះប្រជាជនខ្មែរ ដែលស្រលាញ់ និងគោរពលោក អាចមកធ្វើការគោរពដល់វិញ្ញាណក្ខន្ធរបស់ប្អូនប្រុសលោកយាយ។

(រូបភាព៖ Dr. Beat Richner)

លោកយាយបន្តថា ពាក់កណ្ដាលនៃជីវិតរបស់ប្អូនប្រុសលោកយាយ ពិសេស២៥ឆ្នាំចុងក្រោយនេះ បានចំណាយពេលវេលាដ៏មានសារៈសំខាន់នៅកម្ពុជា និងចាត់ទុកកម្ពុជាដូចជាផ្ទះរបស់លោក ជាកន្លែងដែលប្រជាជនខ្មែរ បានស្គាល់ និងគោរពស្រលាញ់ នេះក៏ជាហេតុផលដែលលោកយាយត្រូវតែយកអដ្ឋិធាតុប្អូនប្រុសមកតម្កល់ទីនេះ។

សម្ដីមួយឃ្លាដែលបង្កប់ដោយអត្ថន័យយ៉ាងជ្រាលជ្រៅ លោកយាយបាននិយាយថា៖ «ខ្ញុំតែងតែមានអារម្មណ៍ថា គាត់នៅទីនេះ ជាកន្លែងដែលមានមនុស្សជាច្រើនស្គាល់លោក ហើយនឹងចងចាំលោកយ៉ាងល្អបំផុត»។

(រូបភាព៖ Dr. Beat Richner)

ពិធីទទួលអដ្ឋិធាតុរបស់លោកវេជ្ជបណ្ឌិត Beat Richner នៅព្រលានយន្តហោះអន្តរជាតិម្សិលមិញនេះ ត្រូវបានផ្ដល់កិត្តិយសយ៉ាងខ្ពង់ខ្ពស់ពីសម្តេចចៅហ្វាវាំង គង់ សំអុល។ បន្ទាប់មកត្រូវបានដង្ហែយកទៅតម្កល់នៅមន្ទីរពេទ្យគន្ធបុប្ផា ដោយមានប្រជាពលរដ្ឋ សិស្សានុសិស្ស លោកតា លោកយាយ ចូលរួមយ៉ាងច្រើនកុះករ។

ដោយឡែក នៅព្រឹកថ្ងៃព្រហស្បតិ៍ ១៤រោច ខែកក្តឹក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៦ ខែធ្នូ ឆ្នាំ២០១៨នេះ ព្រះមហាក្សត្រខ្មែរ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី និងព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ យាងដាក់កម្រងផ្កា និងគោរពវិញ្ញាណក្ខន្ធលោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផា នៅចេតិយតម្កល់ធាតុរបស់លោកនៅមុខមន្ទីរពេទ្យគន្ធបុប្ផា ក្នុងក្រុងសៀមរាប៕