កែវ ប៊ុនធា បេក្ខជន The Voice Cambodia ធ្វើសំណង់៣ថ្ងៃយកលុយជិះឡានមកសុំគេច្រៀង

2014-11-16 18:45:12
ចំនួនមតិ 0 | ចំនួនចែករំលែក 0

ចន្លោះមិនឃើញ

បេក្ខជន កែវ ប៊ុនធា បានឡើងឆាកតន្ត្រីលើកដំបូងរបស់ស្ថានីយទូរទស្សន៍អាស៊ីអាគ្នេយ៍កាលពីម្សិលមិញ តាំងពីជ្រុះចេញពីកម្មវិធី The Voice Cambodia មក។ យុវជនមកពីខេត្តបាត់ដំបងរូបនេះ ប្រាប់ថា គឺលោកជាអ្នកសុំគេឡើងច្រៀង មិនមែនគេហៅឡើយ ក្នុងនោះលោកចំណាយថវិកាដែលរកបានពីការងារសំណង់ដល់ទៅ៣ថ្ងៃឯណោះ សម្រាប់មួយជើងឡើងមកច្រៀងនេះ។

កែវ ប៊ុនធា នៅមុខស្ទូឌីយ៉ូទូរទស្សន៍អាស៊ីអាគ្នេយ៍ (រូបថត Facebook កែវ ប៊ុនធា)

“ខ្ញុំពឹង Coach ខ្ញុំបង ភា ឲ្យគាត់ជួយសុំគេឲ្យ ព្រោះខ្ញុំអត់មានស្គាល់អ្នកណាគេទេនៅភ្នំពេញ ហើយគាត់ក៏សុំបាន ខ្ញុំសប្បាយណាស់បង ព្រោះខ្ញុំចង់កែប្រែជីវភាពក្រែងអាចរកលុយបានច្រើនជួយពុកម៉ែ!"។ នៅលើឆាកតន្ត្រីទូរទស្សន៍អាស៊ីអាគ្នេយ៍ ប៊ុនធា បានបកស្រាយបទចម្រៀងពីរបទរបស់លោក ព្រាប សុវត្ថិ មានចំណងជើងថា "លោកឪពុក" និងបទ "បេះដូងជិតដាច់ខ្យល់" ។

កែវ ប៊ុនធា មានវ័យ ២៦ឆ្នាំ ជាអ្នកស្រុកបាត់ដំបង ដែលមានឪពុកម្ដាយចាស់ជរា និងមានបងប្អូនចំនួន៣នាក់ រូបគេជាកូនទី២ បងប្រុសរបស់លោកឈ្មោះ កែវ ឆៃដែន និងប្អូនពៅឈ្មោះ កែវ ស្រីណែត។ ទាំងបីនាក់បងប្អូន គឺជាកម្មករសំណង់ដូចគ្នា ដោយ១ថ្ងៃពួកគេអាចរកប្រាក់បានពី១ម៉ឺនទៅ២ម៉ឺនរៀល។ សម្រាប់ដំណើរមកច្រៀងនៅភ្នំពេញ ប៊ុនធា បានចំណាយចំនួន ១៥ដុល្លារ។

" បើយាយពីលុយដែលខ្ញុំខំរកលុយបីថ្ងៃ បាន៤-៥ ម៉ឺនហ្នឹងអស់ហើយបង តែសំណាងដែរ បានខាងអាស៊ីអាគ្នេយ៍គេឲ្យវិញ១៥ដុល្លារដែរ អីចឹងមិនអីទេ។ ចេះតែប្រឹងហើយបង ព្រោះខ្ញុំចង់រកលុយឲ្យបានច្រើនជួយពុកម៉ែ ពួកគាត់ចាស់អស់ហើយ!”។

លោក កែវ ប៊ុនធា បានជ្រុះចេញពីកម្មវិធី The Voice Cambodia ក្នុងសប្ដាហ៍ទី៣នៃវគ្គ Live Show ។បរាជ័យនៅគ្រានោះ ប៊ុនធា ថ្លែងថាមិនមានអាក់អន់ស្រពន់ចិត្តអ្វីឡើយ។ "និយាយទៅខ្ញុំដូចជាសប្បាយចិត្តម្យ៉ាងទៅវិញ ព្រោះខ្ញុំអស់លទ្ធភាពនឹងឡើងមកទៀតហើយ ខ្ញុំអត់មានលុយឡើងទៀតទេ!"។

ប៊ុនធា ឲ្យដឹងថា រូបគេបានចំណាយប្រាក់អស់ប្រមាណ ១០០០ដុល្លារ ក្នុងរយៈពេលប្រឡូកកម្មវិធី The Voice Cambodia តាំងពីខែឧសភាមក។ ការចំណាយនេះ រាប់តាំងពីការធ្វើដំណើរ ស្នាក់នៅ និងហូបចុក។ "ហ្នឹងខ្ញុំចាយត្បិតត្បៀតផងបង មិនហ៊ានចាយផ្ដេសផ្ដាសទេ ខោអាវអត់ហ៊ានទិញទេ ពីរវគ្គដំបូងខ្ចីមិត្តភ័ក្ដិ ក្រោយមកទៀតខ្ចីបងភា។ លុយទាំងអស់ មួយចំនួនជារបស់ខ្លួនឯងផង មួយចំនួនទៀតខ្ចីគេពីនេះពីនោះផង ដល់ឥឡូវអស់ហើយ អីចឹងគិតថា ធ្លាក់ចេញក៏សប្បាយម្យ៉ាងដែរ!”។

ក្រៅពីមូលហេតុអស់លទ្ធភាពចំណាយឡើងមកប្រឡង ប៊ុនធា ក៏ទទួលស្គាល់ភាពបរាជ័យរបស់ខ្លួនឯងដែរ។ លោកថ្លែងថា "អត់ស្ដាយអីទេបង ដឹងដែរថាខ្លួនឯងធ្វើអត់សូវបានល្អពេលហ្នុង ព្រោះដោយសារខ្ញុំមានបញ្ហាបំពង់កផង"។

Post by Keo Bunthea SP.

ប៊ុនធា មិនទាន់ដឹងថាអាចសម្រេចក្ដីប្រាថ្នារបស់ខ្លួនបានដោយរបៀបណាផងទេ ខណៈមកទល់នឹងពេលនេះ មិនមានខាងណាទាក់ទងលោកនៅឡើយ បើទោះគេមើលឃើញថា លោកមានសំឡេងល្អ និងមានទេពកោសល្យខាងសិល្បៈមួយនេះក៏ដោយ។ បន្ថែមពីនេះ លោកត្រូវប្រឈមនឹងបញ្ហាបំពង់ក និងច្រមុះទៀត។

អត្ថបទ៖ ចង់ដឹងថា ហង្សមាសនិយាយអ្វីខ្លះមុន The Voice Cambodia បញ្ចប់ទៅ?

" បំពង់កខ្ញុំចេះតែឡើងស្លេស្ម វាមានបញ្ហាតាំងពីឆ្នាំ ២០១០ បង តែដោយសារខ្វះខាតចេះផង តែទុកៗមកដល់ឥឡូវទៅ ពេទ្យថា រលាកបំពង់ក និងអាល្លែកហ្ស៊ីច្រមុះ។ ខ្ញុំចង់សុំគេច្រៀងតាមហាងអីណាបង តែដឹងម៉េចឡើយទេ បើឈឺអីចឹង...”។

ដោយសារខ្វះខាត កែវ ប៊ុនធា បានបោះបង់ការសិក្សាត្រឹមថ្នាក់ទី១១ មកធ្វើសំណង់ជួយដោះស្រាយជីវភាពគ្រួសារ។ ទោះជាយ៉ាងនេះក្ដី រូបគេថ្លែងថានៅតែស្រឡាញ់ការសិក្សា ដោយបច្ចុប្បន្នបានឆ្លៀតរៀនភាសាអង់គ្លេស និងជំនាញជួសជុលកុំព្យូទ័រ។ "ខ្ញុំចេះតែឆ្លៀតរៀនទៅ ព្រោះស្រឡាញ់ ណាមួយខ្ញុំមិនចង់ល្ងង់ណាបង តែចិត្តខ្ញុំនៅស្រឡាញ់អាជីពចម្រៀងដដែល"។

ប៊ុនធា បានមកដល់រាជធានីតាំងពីថ្ងៃសុក្រ មកដល់ថ្ងៃនេះមិនទាន់ត្រឡប់ទៅបាត់ដំបងវិញនៅឡើយទេ។ លោកថា ចាំមើល The Voice Cambodia ផ្ដាច់ព្រ័ត្រយប់នេះ៕

អត្ថបទផ្សេងទៀតពាក់ព័ន្ធនឹងកម្មវិធី The Voice Cambodia មាននៅទីនេះ!

អត្ថបទ៖ ទារិកា