Chanathip និង Quang Hai ស្ថិតក្នុងចំណោមកីឡាករល្បីបានចូលលេង Asian Cup 2019
- 2018-12-25 06:35:44
- ចំនួនមតិ 0 | ចំនួនចែករំលែក 0
Chanathip និង Quang Hai ស្ថិតក្នុងចំណោមកីឡាករល្បីបានចូលលេង Asian Cup 2019
ចន្លោះមិនឃើញ
អ្នកគាំទ្រនៅតំបន់អាស៊ីនឹងសប្បាយចិត្តសប្បាយភ្នែកជាបន្តទៀតដោយនៅដើមឆ្នាំ២០១៩នេះកម្មវិធីបាល់ទាត់ដ៏ធំ AFC Asian Cup 2019 នឹងចាប់ផ្ដើមពីថ្ងៃទី ៥ ខែ មករាតទៅដែលមានប្រទេសអារ៉ាប់រួមធ្វើជាម្ចាស់ផ្ទះ។
ក្រុមទាំង២៤ដែលបានឡើងមកពីការជម្រុះនឹងត្រូវប្រជែងគ្នាដើម្បីយកពានដែលរៀបចំ៤ឆ្នាំម្ដងនេះ។ យ៉ាងណាមិញមុនព្រឹត្តិការណ៍នេះមកដល់គេបានបង្ហាញកីឡាករល្បី៥រូប ដែលគួរចាប់អារម្មណ៍នឹងបានចូលរួមកម្មវិធីនេះ។
១. អ្នកចាំទី Neil Etheridge របស់ហ្វីលីពីន
Neil Etheridge ជាកីឡាករល្បីមួយរូបរបស់ជម្រើសជាតិហ្វីលីពីន ដែលបានមកលេងនៅ AFC Asian Cup 2019។ នេះជាការបង្ហាញខ្លួនលើកដំបូងរបស់ហ្វីលីពីនក្នុងព្រឹត្តិការណ៍មួយនេះ។ យ៉ាងណាមិញ Neil ដែលបច្ចុប្បន្នកំពុងលេងឲ្យក្លឹប Cardiff City នៅ Premier League អាចបង្ហាញខ្លួនបានតែ១ប្រកួតប៉ុណ្ណោះ ដោយសារតែមានការដាក់កម្រិតពីក្លឹប។
២. Mathew Leckie របស់អូស្ត្រាលី
Mathew Leckie នឹងត្រូវប្រឹងប្រែងជួយក្រុមឲ្យអស់ពីចិត្តដើម្បីការពារតំណែងជើងឯក ព្រោះកាលឆ្នាំ២០១៥អូស្ត្រាលីគឺជាម្ចាស់ពាន។ ខ្សែបម្រើប្រយុទ្ធវ័យ២៧ឆ្នាំ បច្ចុប្បន្នលេងនៅលីគកំពូលរបស់អាល្លឺម៉ង់ Bundesliga ជាមួយក្លឹប Hertha BSC រកបាន៧គ្រាប់ ក្នុងការបង្ហាញខ្លួន៣២ប្រកួត។
៣. Yuya Osako របស់ជប៉ុន
ជប៉ុនកំពុងតែសម្លឹងឃើញចង់ឈ្នះពាន AFC Asian Cup ជាលើកទី៥ក្នុងប្រវត្តិសាស្ត្រ ហើយសម្រាប់ឆ្នាំនេះ Yuya Osako ត្រូវបានចាត់ទុកជាកីឡាករលេចធ្លោប្រចាំក្រុម។ ខ្សែប្រយុទ្ធរូបនេះលេងនៅក្លឹប Werder Bremen នៅប្រទេសអាល្លឺម៉ង់ កំពុងតែបង្ហាញសមត្ថភាពល្អ ដោយ១៤ប្រកួតរកបាន៣គ្រាប់។
៤. Channathip Songkrasin របស់ថៃ
ក្រុមមកពីតំបន់អាស៊ានសង្ឃឹមនឹងជោគជ័យនៅ AFC Asian Cup 2019 ក្រោយខកចិត្តនៅ AFF Suzuki Cup 2018។ ជម្រើសជាតិថៃនឹងពេញជើងឡើងវិញ បន្ទាប់ពីកីឡាករសំខាន់ៗជាពិសេស Channathip Songkrasin បានត្រលប់មកជួយក្រុមវិញ។ Channathip កំពុងតែបង្ហាញការភ្ញាក់ផ្អើលខ្លាំងនៅក្នុងលីគកំពូលជប៉ុនជាមួយក្លឹប Consadole Sapporo ថែមទាំងឈ្នះកីឡាករឆ្នើមប្រចាំក្លឹបក្នុងឆ្នាំនេះទៀតផង។
៥. Nguyen Quang Hai របស់វៀតណាម
AFF Suzuki Cup 2018 វៀតណាមបានយកឈ្នះម៉ាឡេស៊ីគ្រងជាម្ចាស់ពានជាលើកដំបូង ក្រោយខកខានអស់រយៈពេល១០ឆ្នាំ ហើយ Nguyen Quang Hai បានក្លាយជាកីឡាករឆ្នើមប្រចាំព្រឹត្តិការណ៍។ កីឡាកររបស់ក្លឹប Ha Noi FC វ័យទើបតែ២១ឆ្នាំ ប៉ុន្តែគេបានបង្ហាញទេពកោសល្យយ៉ាងល្អ បាននាំក្រុមឈ្នះជើងឯក។ សម្រាប់ពេលនេះ Quang Hai នឹងនៅតែដើរតួសំខាន់ដើម្បីតទល់នឹងក្រុមខ្លាំងដូចជា អ៊ីរ៉ាក់ អ៊ីរ៉ង់និង យេម៉ែន ដែលនៅពូលជាមួយពួកគេ៕