Porsche Panamera ឆ្នាំ ២០១៧-២០១៨ មានបញ្ហាចង្កូត ត្រូវហៅចូលរោងចក្រវិញ

2018-12-26 01:48:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតរថយន្តអាឡឺម៉ង់ Porsche បានធ្វើការប្រកាសហៅចូលមកវិញ នូវរថយន្តស៊េរីថ្មីឆ្នាំ ២០១៧ និង ២០១៨ ម៉ូដែល Panamera ក្រោយពីពិនិត្យឃើញថា វាមានបញ្ហាក្នុងប្រព័ន្ធជំនួយការកាច់ចង្កូត (Power Steering)។ ការប៉ះពាល់នេះ គឺមានដល់គ្រប់រថយន្ត Porsche Panamer ២ ឆ្នាំខាងលើ ដែលលក់ចេញពាសពេញពិភពលោក ដែលមានចំនួនប្រហែល ៧៥ ០០០ គ្រឿង។

តាមពិតទៅ បញ្ហាដែល Porsche បានរកឃើញនេះ គឺបណ្ដាលមកពី Software ដែលសម្រាប់បញ្ជាប្រព័ន្ធជំនួយការកាច់ចង្កូតនោះឯង។ ការដំណើរការមិនប្រក្រតីរបស់ Software នោះ អាចបណ្ដាលឲ្យប្រព័ន្ធជំនួយការកាច់ចង្កូតនោះលែងដំណើរការ ឬក៏ម្ដងដើរ ម្ដងអត់ អាក់ៗ។ ប្រការនេះ អាចបណ្ដាលឲ្យអ្នកបើកបរមានការពិបាកក្នុងការគ្រប់គ្រងចង្កូតរថយន្ត ជាពិសេសនៅពេលវ៉ាកាត់គ្នា អាចធ្វើឲ្យរថយន្តមានគ្រោះថ្នាក់បាន។ យ៉ាងណាមិញ មកទល់ពេលនេះ មិនទាន់មានរបាយការណ៍គ្រោះថ្នាក់ណាមួយ បានកើតឡើងចំពោះរថយន្ត Porsche Panamera ដែលបណ្ដាលមកពីបញ្ហាខាងលើនៅឡើយទេ។

ចំពោះការជួសជុល ចន្លោះប្រហោងនេះ គឺវានឹងធ្វើឡើងទៅលើ Software តែមួយមុខគត់ ហើយនឹងមិនចំណាយពេលច្រើនឡើយ។ ចំពោះការជូនដំណឹងទៅកាន់អតិថិជនទាំងអស់នៅទូទាំងពិភពលោក ក្រុមហ៊ុន Porsche នឹងធ្វើការផ្ញើជាសំបុត្រផ្ទាល់ First Class Mail ដល់ដៃអតិថិជនតែម្ដង។

ចុចអាន៖

ប្រភព៖ Cnet ប្រែសម្រួល៖ ផាត សុវត្ថិ