រថយន្ត Volvo ២០១៩ កាន់តែ​ទំនើប អាច​តាមដានអាកប្បកិរិយាអ្នកបើកបរ ថែមទាំង​ឆែក​សុខភាព​បានទៀត

  • 2019-01-03 09:32:01
  • ចំនួនមតិ 0 | ចំនួនចែករំលែក 17

ចន្លោះមិនឃើញ

ក្រុមហ៊ុន​​ផលិត​រថយន្ត​របស់​ប្រទេស​ស៊ុយអែត Volvo នឹង​ដាក់​បំពាក់​នូវ​កាមេរ៉ា​តាម​ដាន​អ្នក​បើកបរ​ ដែល​អាច​​តាម​ដាន​ទាំង​អាកប្បកិរិយា និង​មុខងារ​ជីវសាស្ត្រ​មួយ​ចំនួន​ទៀត។

ក្រុមហ៊ុន​រថយន្ត​សម្បួរ​ដោយ​បច្ចេកវិទ្យា​ទំនើប​នេះ បាន​ប្រាប់​ដល់​អ្នក​ប្រើប្រាស់​កុំ​ឲ្យ​បារម្ភ​ពី​ការ​លួច​យក​ទិន្នន័យ​ ផ្ទុយ​ទៅ​វិញ Volvo បញ្ជាក់​ថា បច្ចេកវិទ្យា​នេះ​នឹង​ផ្ដល់​ប្រយោជន៍​ដល់​អ្នក​បើកបរ​ដូច​ទូរសព្ទ​ទំនើប​ និង​នាឡិកា​ឆ្លាតវៃ​ សម្រាប់​តាម​ដាន​សុខភាព​ដូច​គ្នា​អ៊ីចឹង។

លោក Atif Rafiq ប្រធាន​ផ្នែក​ឌីជីថល​របស់ Volvo បាន​លើក​ឡើង​ថា បច្ចេកវិទ្យា​កាមេរ៉ា​នេះ នឹង​ត្រូវ​ដាក់​បញ្ចូល​ក្នុង​រថយន្ត Volvo ក្នុង​អំឡុង​ពេល ១២ ខែ​ទៀត ប៉ុន្តែ​សម្រាប់​អតិថិជន​ដែល​មិន​ចង់​បាន សូម​កុំ​បារម្ភ​ព្រោះ​បច្ចេកវិទ្យា​នេះ​ជា​ជម្រើស (Option) ​មិន​មែន​មក​ស្រាប់​ជាមួយ​នឹង​រថយន្ត​ឡើយ​ ប្រសិន​បើ​អ្នក​មិន​ជ្រើស​យក​ជម្រើស​នោះ។

ខាង Volvo បាន​អះ​អាង​ថា បច្ចេកវិទ្យា​កាមេរ៉ា​នេះ​ទំនើប​ណាស់ ដោយ​វា​អាច​ដឹង​កម្រិត​ជាតិ​ស្ករ (Glucose) នៅ​ក្នុង​ខ្លួន​របស់​អ្នក​បើកបរ​បាន​ ដោយ​ត្រឹម​តែ​យក​រូបភាព​មក​វិភាគ​ទិន្នន័យ អ៊ីចឹង​ហើយ​បើ​សិន​ជា​វា​រក​ឃើញ​ថា​ អ្នក​បើកបរ​មាន​អាការៈ​មិន​ស្រួល នោះ​ប្រព័ន្ធ​ក្នុង​រថយន្ត​នឹង​ជួន​ដំណឹង​ទៅ​សាច់​ញាតិ ឬ​ក៏​បញ្ជូន​សញ្ញា​ទៅ​កាន់​មន្ទីរ​ពេទ្យ​តែ​ម្ដង។ មិន​ត្រឹម​តែ​ប៉ុណ្ណោះ បច្ចេកវិទ្យា​នេះ​នឹង​ធ្វើ​ឲ្យ​រថយន្ត​អ្នក​យល់​ពី​អារម្មណ៍​របស់​អ្នក ហើយ​វា​នឹង​ជួយ​កាត់​បន្ថយ​ភាព​តាន​តឹង​ពេល​កំពុង​បើកបរ​ ដោយ​វិធី​ផ្សេងៗ​គ្នា​ផង​ដែរ។

គួរ​បញ្ជាក់​ផង​ដែរ​ថា រថយន្ត​របស់​ស៊ុយអែត​មួយ​នេះ មាន​ប្រព័ន្ធ​សុវត្ថិភាព​ខ្ពស់​ខ្លាំង ហើយ​ក៏​មាន​ការ​អភិវឌ្ឍន៍​បច្ចេកវិទ្យា​បើក​បរ​ដោយ​ខ្លួន​ឯង​ផង​ដែរ។ ដោយ​សារ​តែ​មាន​ការ​សិក្សា និង​ប្រមូល​ទិន្នន័យ​បាន​ច្រើន​គួរ​សម​ និង​ការ​ធ្វើ​តេស្ត​លើ​កាមេរ៉ា ពិនិត្យ​មើល​សុខភាព​នេះ​បាន​ជោគជ័យ​ទៀត​នោះ Volvo អាច​នឹង​ក្លាយ​ទៅ​ជា​រថយន្ត​ ដែល​លេច​ធ្លោ​ខ្លាំង​បំផុត​មួយ​ជាមួយ​នឹង​បច្ចេកវិទ្យា​ទំនើប។

ចុចអាន៖


ប្រភព៖ CAR Magazine   ប្រែ​សម្រួល៖ ផាត សុវត្ថិ