ឡុង សំណាង បានឱកាសលេងខ្សែក្រវាត់លើកទី៣ ក្នុងអាជីពរបស់ខ្លួន

2019-01-07 07:22:17
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់កំពុងមានកេរ្តិ៍ឈ្មោះល្បី ឡុង សំណាង បានឱកាសជាលើកទី៣ ចូលលេងខ្សែក្រវាត់ទម្ងន់ ៦៣,៥ នៅសង្វៀន CTN ដែលចាប់ផ្ដើមប្រកួតពីថ្ងៃទី៦ ខែមករា ឆ្នាំ២០១៩ សប្ដាហ៍មុននេះ។

ថ្ងៃសន្និសីទសារព័ត៌មាន

បើតាមការឲ្យដឹងពីលោក ពោជ វិចិត្រ ប្រធានផ្នែកលក់របស់ CBS ថាតាមរយៈកម្មវិធីប្រដាល់ដណ្ដើមខ្សែក្រវាត់ថ្មីរបស់សង្វៀន CTN នេះ កីឡាករគុនខ្មែរទាំងអស់មានឱកាសកសាងសមត្ថភាព និងបង្កើនបទពិសោធបន្ថែមដែលខ្លួនមានពេលបច្ចុប្បន្ន។ ក្រៅពីមានការប្រកួតសន្សំពិន្ទុ២គូជារៀងរាល់សប្ដាហ៍ហើយនោះ ពីកម្មវិធីក៏មានគូមិត្តភាពអន្តរជាតិអមផងដែរ ដើម្បីបម្រើទស្សនីយភាពបន្ថែមទៀត។

តំណាងរបស់ CBS រូបនេះក៏ថ្លែងអំណរគុណដល់សហព័ន្ធគុនខ្មែរ និងម្ចាស់ឧបត្ថម្ភកម្មវិធី Zorus ដែលចូលរួមសហការរៀបចំឲ្យមានកម្មវិធីប្រកួតនេះឡើង ដើម្បីជួយពង្រីកផ្សព្វផ្សាយឲ្យក្បាច់គុនមួយនេះកាន់តែរីកចម្រើនថែមទៀត។

កីឡាករ ឡុង សំណាង

បញ្ជាក់ដែរថា កម្មវិធីប្រកួតដណ្ដើមខ្សែក្រវាត់ Zorus ទម្ងន់ ៦៣,៥គីឡូក្រាមនេះ គឺមានជើងខ្លាំងរបស់កម្ពុជា ៤រូប រួមមាន ឡុង សំណាង ផាន់ គ្រាន់ ឌុម កែវដា និង ពុយ វណ្ណៈ ចំណែកបរទេសគឺថៃទាំង៤រូបតែម្ដង។ នេះជាលើកទី៣ហើយសមា្រប់កូនសិស្សលោក ឡុង សាលវ័ន្ត ដែលបានលេងខ្សែក្រវាត់ បន្ទាប់ពីធ្លាប់ឈ្នះខ្សែក្រវាត់១គ្រឿងនៅសង្វៀនផ្សេង និងមួយកម្មវិធីទៀតនោះធ្លាក់ត្រឹមវគ្គសន្សំពិន្ទុ។ ថ្ងៃអាទិត្យ ទី១៣ មករា ២០១៩ ចាប់ពីម៉ោង៨ព្រឹកតទៅ ឡុង សំណាង នឹងត្រូវធ្វើការប្រកួតជុំទី១របស់ខ្លួន៕

អត្ថបទ៖ នួន ស៊ីណា