កម្មវិធី The Voice នៅអាស៊ាន មានក្នុងប្រទេសណាខ្លះ?

2014-11-16 22:33:52
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធី The Voice Cambodia នឹងបញ្ចប់រដូវកាលទី១ របស់ខ្លួន នៅរាត្រីថ្ងៃអាទិត្យនេះហើយ បន្ទាប់ពីដំណើរការតាំងពីដើមឆ្នាំ២០១៤ មក និងជម្រុះបេក្ខជនជាច្រើនចម្រាញ់បានអ្នកមានទឹកដមសំឡេងចុងក្រោយគេ ៤នាក់។ នេះគឺជាកម្មវិធីកម្សាន្តមួយដែលកំពុងពេញនិយមនៅក្នុងព្រះរាជាណាចក្រកម្ពុជា។ ដូចគ្នានេះដែរ ប្រទេសមួយចំនួនទៀតនៅតំបន់អាស៊ាន ក៏បានទិញសិទ្ធិរៀបចំកម្មវិធីនេះដូចកម្ពុជាដែរ។

ក្នុងចំណោមប្រទេសទាំង១០ នៅអាស៊ាន មាន ៥ប្រទេស ទិញសិទ្ធិរៀបចំកម្មវិធី The Voice ដោយផ្ទាល់ ដែលក្នុងនោះរួមមាន កម្ពុជា ឥណ្ឌូណេស៊ី ថៃ វៀតណាម ហ្វីលីពីន។ ចំពោះប្រទេស ២ផ្សេងទៀត គឺម៉ាឡេស៊ី និងសិង្ហបុរី បានសហការផ្សាយកម្មវិធីប្រឡងចម្រៀងសម័យទំនើបនេះជាមួយប្រទេសចិនក្នុងកម្មវិធី The Voice of China។ ចំណែកឯប្រទេស ប្រ៊ុយណេ ឡាវ និងមីយ៉ាន់ម៉ា ពុំបានរៀបចំឲ្យមានកម្មវិធីដ៏ពេញនិយមនេះទេ។

១. ប្រទេសកម្ពុជា (ឈ្មោះកម្មវិធី The Voice Cambodia)

កម្មវិធី The Voice ទើបតែចូលមកដល់ប្រទេសកម្ពុជាក្នុងឆ្នាំ២០១៤ នេះ និងជារដូវកាលទី១ តាមរយៈស្ថានីយទូរទស្សន៍ហង្សមាស។ កម្មវិធីនេះ ចាប់ផ្ដើមវគ្គជម្រុះបេក្ខភាពដំបូងរបស់ខ្លួនពីតំបន់នានា កាលពីខែមិនាកន្លងទៅ ហើយត្រូវបញ្ចប់រដូវកាលទី១ នៅរាត្រីថ្ងៃអាទិត្យយប់នេះ។ (ប្រភព៖ thevoicecambodia)

២. ប្រទេសឥណ្ឌូណេស៊ី (ឈ្មោះកម្មវិធី The Voice Indonesia)

ឥណ្ឌូណេស៊ីបាននាំយកកម្មវិធី The Voice ចូលក្នុងប្រទេសកាលពីឆ្នាំ២០១៣ តាមរយៈស្ថានីយទូរទស្សន៍ Indosiar។ The Voice Indonesia បានបញ្ចប់រដូវកាលទីមួយរបស់ខ្លួនហើយកាលពីឆ្នាំមុន ហើយក្នុងឆ្នាំ២០១៤ នេះ កម្មវិធីរដូវកាលទី២ កំពុងដំណើរការបន្ត។ (ប្រភព៖ thevoiceindonesia)

៣. ប្រទេសថៃ (ឈ្មោះកម្មវិធី The Voice Thailand)

ថៃបាននាំយកកម្មវិធី The Voice ចូលក្នុងប្រទេសកាលពីឆ្នាំ២០១២ តាមរយៈស្ថានីយទូរទស្សន៍ Channel 3។ ពេលនេះ កម្មវិធី The Voice របស់ប្រទេសថៃបានបញ្ចប់ ២រដូវកាលហើយ គឺក្នុងឆ្នាំ២០១២ និង២០១៣ ហើយបច្ចុប្បន្នកំពុងដំណើរការរដូវកាលទី៣ បន្តទៀត។ (ប្រភព៖ thevoicethailand)

៤. ប្រទេសវៀតណាម (ឈ្មោះកម្មវិធី The Voice of Vietnam)

ប្រទេសវៀតណាម បានចាប់ផ្ដើមមានកម្មវិធីប្រលងចម្រៀងThe Voiceតាំងពីឆ្នាំ២០១២ ដែលរហូតមកដល់ពេលនេះ បានបញ្ចប់ទៅ ២រដូវកាលហើយ។ កម្មវិធី The Voice of Vietnam ត្រូវបានចាក់ផ្សាយតាមរយៈស្ថានីយទូរទស្សន៍ VTV3 HD ។ (ប្រភព៖ gionghatviet)

៥. ប្រទេសហ្វីលីពីន (ឈ្មោះកម្មវិធី The Voice of the Philippines)

កម្មវិធី The Voice បានចូលដល់ក្នុងប្រទេសហ្វីលីពីនកាលពីឆ្នាំ២០១៣ តាមរយៈស្ថានីយទូរទស្សន៍ ABS-CBN។ ពេលនេះ កម្មវិធី The Voice របស់ប្រទេសហ្វីលីពីនបានបញ្ចប់រដូវកាលទីមួយក្នុងឆ្នាំ២០១៣ ហើយ និងកំពុងបន្តរដូវកាលថ្មីទី២ ដែលត្រូវបញ្ចប់នៅឆ្នាំ ២០១៥ខាងមុខ។ (ប្រភព៖ entertainment)

ចំណែកឯប្រទេស ២ទៀត គឺម៉ាឡេស៊ី និងសិង្ហបុរី ពុំមានកម្មវិធីនេះនៅក្នុងប្រទេសរបស់ខ្លួនដោយផ្ទាល់ទេ ប៉ុន្តែបានសហការជាមួយចិនផ្សាយកម្មវិធី The Voice of China។ ចិនបានផ្សាយកម្មវិធីនេះតាមរយៈ ស្ថានីយទូរទស្សន៍ Zhejiang TV ឯម៉ាឡេស៊ីផ្សាយតាមរយៈប៉ុស្តិ៍ 8TV2 ហើយសិង្ហបុរីផ្សាយតាមស្ថានីយទូរទស្សន៍ Channel 82 រួមទាំងប៉ុស្តិ៍ទូរទស្សន៍ពីរទៀតរបស់ហុងកុង និងតៃវ៉ាន់។ តាំងពីឆ្នាំ២០១២ រហូតមកដល់ពេលនេះ The Voice of China បានបញ្ចប់ទៅ ៣រដូវកាលហើយ។ (ប្រភព៖ haoshengyin)

ចុចអាន៖ បេក្ខនារីអាស៊ី ចូល The Voice អាមេរិក ច្រៀងពីរោះដល់ថ្នាក់គ្រូបង្វឹកលុតជង្គង់អង្វរឲ្យចូលក្រុម

ដោយ៖ គង់ វិសាល