ចំណុចខ្លាំងមួយនេះ ទាំងគ្រូ-កីឡាករថៃ និងខ្មែរមួយចំនួនសរសើរ ឡៅ ចន្រ្ទា មិនដាច់ពីមាត់...

2019-01-30 03:27:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ឡៅ ចន្រ្ទា ជាអ្នកប្រដាល់ជួរមុខរបស់កម្ពុជា ដែលមានសមត្ថភាពខ្លាំងកម្រនិងចាញ់មិនថាការលេងពានរង្វាន់ ខ្សែក្រវាត់ ឬការប្រកួតមិត្តភាពផ្សេងៗនាពេលកន្លង។ កីឡាករមកពីខេត្តកំពង់ស្ពឺរូបនេះ គឺមានស្នៀតប្រយុទ្ធគ្រប់គ្រឿងមិនថាកណ្ដាប់ដៃ ទាត់ កែង ជង្គង់ នោះទេគឺសុទ្ធតែគេបញ្ចេញបានគ្រប់ពេល។

ឡៅ ចន្រ្ទា ប្រកួតកន្លងទៅ

ដោយឡែកចំណុចខ្លាំងមួយ ឬជាចំណុចពិសេសបំផុតរបស់ ចន្រ្ទា ដែលអ្នកដឹកនាំកីឡាករថៃ ឬគ្រូថៃដែលបានមកស្រុកខ្មែរ រួមទាំងអ្នកប្រដាល់រៀមច្បងដូចជា រឿង សោភ័ណ្ឌ ឡុង សុភី ឡុង សុវណ្ណឌឿន និងកីឡាករក្នុងស្រុក កីឡាករបរទេស(ថៃ)សរសើរមិនដាច់ពីមាត់នោះ គឺភាពរឹងមាំ ភាពប៉ិនប្រសព្វក្នុងការចាប់អោប កាច់វ៉ៃជង្គង់តែម្ដង ដែលមិនងាយកីឡាករណាហ៊ានលេងស្នៀតនេះតទល់រហូតបានឡើយ។ ពេលចាប់គ្នាម្ដងៗគឺ ឡៅ ចន្រ្ទា រឹងណាស់មិនងាយកាច់រូបគេស្រួលៗនោះឡើយ(ដៃរឹង) ខណៈការដោះឃ្លេ ឬរើបម្រាសក៏រហ័ស និងលឿនទៀតផង ចំណុចនេះហើយដែលគេសរសើរ និងសិស្សប្អូនក្រោយៗរៀនតាម។ ការលើកឡើងត្រង់ចំណុចនេះបាន លុះត្រាតែអ្នកធ្លាប់ហ្វឹកហាត់ចាប់ឡាំជាមួយ ធ្លាប់ប្រកួតជាមួយ ឬជាគ្រូជើងចាស់មានបទពិសោធច្រើនទើបអាចបកស្រាយ ឬវិភាគបានច្បាស់បែបនេះ។

ឡៅ ចន្រ្ទា ប្រកួតកន្លងទៅ

បញ្ជាក់ផងដែរថា កីឡាករ ឡៅ ចន្រ្ទា ជាអ្នកប្រដាល់មកពីក្លឹបឆត្រយោង ៩១១ បច្ចុប្បន្ននេះគេអាចវ៉ៃក្នុងប្រភេទទម្ងន់ ៦៧ ឬ ៦៩ គីឡូក្រាម។ អ្នកប្រដាល់មកពីខេត្តកំពង់ស្ពឺខាងលើនេះមានខ្សែក្រវាត់ ៣គ្រឿង ទី១ ខ្សែក្រវាត់របស់សង្វៀន CTN ទី២ ខ្សែក្រវាត់របស់សង្វៀន PNN ទី៣ ខ្សែក្រវាត់របស់សង្វៀនបាយ័ន និងជាម្ចាស់ពានរង្វាន់ រួមទាំងមេដាយថ្នាក់ជាតិជាច្រើនគ្រឿងផងដែរ៕