Apple ចាប់ផ្ដើមលក់លាងឃ្លាំងសុទ្ធតែ iPhone SE ថ្មីៗ

2019-02-20 02:55:23
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីខែកញ្ញាកន្លងទៅ Apple បានបញ្ឈប់ការលក់ iPhone SE ទំហំតូចជាងគេបំផុតនាកាលនោះ (អេក្រង់ ៤ អ៊ីញ ដូច iPhone 5 និង iPhone 5S) និង iPhone 6S ដោយសារតែការចេញលក់ iPhone ជំនាន់ថ្មីគឺ iPhone XS, iPhone XS Max និង iPhone XR។ ប៉ុន្តែ ក្នុងពេលថ្មីៗនេះ បើតាមសារព័ត៌មាន MacRumours បានឲ្យដឹងថា Apple លួចលក់ iPhone SE ថ្មីប្រភេទ Refurbished សារជាថ្មីស្ងាត់ៗ ដោយពេលនេះវាកំពុងតែមានដាក់លក់ម្ដងទៀតហើយ ក្នុងកម្មវិធីលក់លាងឃ្លាំងលើគេហទំព័រ Apple ផ្ទាល់។

iPhone SE គឺជា iPhone ដែលមានអេក្រង់តូចជំនាន់ចុងក្រោយគេបំផុត ពោលគឺដើម្បីផ្គាប់ចិត្តអតិថិជន ដែលមិនស្រឡាញ់ iPhone អេក្រង់ធំៗ ដែល Apple បានបញ្ចេញចាប់ពីស៊េរី iPhone 6 និង iPhone 6 Plus មក។ iPhone SE នេះចេញក្នុងឆ្នាំ ២០១៦ ដែលមានអង្គចងចាំទំហំ ៣២ GB និង ១២៨ GB ដោយតម្លៃលក់លាងឃ្លាំងនេះ ថោកជាងតម្លៃធម្មតាដែលវាទើបនឹងចេញ ១០០ ដុល្លារសម្រាប់ម៉ូដែល ៣២ GB និង ១៥០ ដុល្លារ សម្រាប់ម៉ូដែល១២៨ GB ដោយមាន ៤ ពណ៌ សម្រាប់ជ្រើសរើសគឺ ប្រផេះ (Space Grey) ប្រាក់ (Silver) មាស (Gold) និងមាសបែកផ្កាឈូក (Rose Gold)។

គួរបញ្ជាក់ផងដែរថា iPhone SE ប្រើឈីប A9 ដូចទៅនឹង iPhone 6S ផងដែរ ដោយក្នុងពេលសព្វថ្ងៃនេះ វានៅតែដំណើរការបានធម្មតា មិនយឺតពេក ហើយកាមេរ៉ា ១២ មេកាភិចសែលរបស់វា ក៏នៅតែថតបានស្អាតផងដែរ។ ប្រសិនបើអ្នកមានចំណាប់អារម្មណ៍លើ iOS ចង់ប្រើ iPhone ថ្មី ដែលមានតម្លៃថោកសមរម្យនោះ ឱកាសលក់លាងឃ្លាំងនេះ ពិតជាពិសេសបំផុតហើយ។

ចុចអាន៖

ប្រភព៖ theverge ប្រែសម្រួល៖ ផាត សុវត្ថិ