ពេលទិញឡានមួយទឹកភ្លាម ៥ ចំណុចគួរធ្វើមុនយកមកជិះ

2019-02-27 04:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្តមួយទឹកគ្របដណ្តប់ជិត ៩០ ភាគរយនៃទីផ្សារប្រើប្រាស់រថយន្តនៅកម្ពុជា។

បើតាម លោក ហេង ថាត់ ជាអ្នកលក់រថយន្តមួយទឹកបានប្រាប់ Sabay ថា ពេលទិញរថយន្តមួយទឹកភ្លាម ត្រូវអនុវត្តប៉ុន្មានចំណុចសំខាន់នេះ។

លាងសម្អាត

ពេលទិញភ្លាម គួរយកទៅកន្លែងលាងរថយន្តឲ្យគេដុសសម្អាតទាំងខាងក្នុងនិងខាងក្រៅរថយន្ត ដើម្បីកម្ចាត់ក្លិននិងភាពកខ្វក់ផ្សេងៗលើរថយន្ត។

ប្ដូរប្រេង

ត្រូវប្ដូរប្រេងម៉ាស៊ីនចោលភ្លាម ក៏ដូចជាប្រេងប្រអប់លេខ ប្រេងចង្កូត ប្រេងមីញុង ប្រេងហ្វាំ្រងជាដើម។ ព្រោះមុនពេលម្ចាស់រថយន្តលក់ មិនបានផ្លាស់ប្តូរបានត្រឹមត្រូវ អាចនាំរថយន្តមានបញ្ហា។

ផ្លាស់ប្ដូរសម្បកកង់

សម្បកកង់ បើត្រូវប្តូរក៏គួរតែប្តូរដែរ។ ពិនិត្យមើលឲ្យបានលម្អិតថាសម្បកកង់មានការប្រេះ ឬសឹក? ហើយបើសម្បកហើមអាចធ្វើឲ្យរថយន្តញ័រ ពេលបើកបរក្នុងល្បឿនលឿន។ បើជួបសភាពដូចការរៀបរាប់ខាងលើ ប្រញាប់ប្ដូរយកសម្បកកង់ថ្មី។

ឆែកប្រព័ន្ធហ្វ្រាំង

ហ្រ្វាំងសំខាន់ណាស់ ទាក់ទងសុវត្ថិភាពក្នុងការបើកបរ។ ពិនិត្យមើលប្រព័ន្ធហ្រ្វាំង បើចាំបាច់ត្រូវប្តូរថ្មីកុំឲ្យមានបញ្ហាពេលធ្វើដំណើរ។

ជួសជុលចំណុចខូចខាត

ពេលទិញទោះបីអ្នកបានពិនិត្យមើលគ្រប់ជ្រុងជ្រោយក៏ដោយ ប៉ុន្តែពេលខ្លះក៏អាចមើលរំលងចំណុចណាមួយក៏ថាបាន។ វិធីល្អត្រូវយករថយន្តទៅយានដ្ឋាន ដើម្បីពិនិត្យមើលសភាពរថយន្ត ហើយឲ្យជាងបញ្ជាក់ពីផ្នែកណាខ្លះដែលត្រូវប្ដូរចេញ ។

ជាចុងក្រោយលោកបញ្ជាក់ប្រាប់ថា ការទិញរថយន្តមួយទឹកមិនល្អ១០០% ក៏មិនមែនជារឿងប្លែកដែរ។ តែរឿងសំខាន់បំផុតគឺការថែទាំឲ្យបានល្អដើម្បីឲ្យប្រើប្រាស់បានយូរ៕

អត្ថបទ៖ ម៉េងងី