U-23កម្ពុជាប្រកួតចុងក្រោយបានត្រឹមស្មើឆាយនិសតៃប៉ិ ១-១

2019-03-26 14:55:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមកម្ពុជាអាយុ២៣ឆ្នាំបានបញ្ចប់ភារកិច្ចវគ្គជម្រុះក្នុងពូល H នៃពានរង្វាន់ 2020 AFC U-23 Championship ដោយទទួលបានតែ១ពិន្ទុប៉ុណ្ណោះ បន្ទាប់ប្រកួតចុងក្រោយបានត្រឹមស្មើក្រុមឆាយនិសតៃប៉ិដោយលទ្ធផល ១-១។

ក្រុមកម្ពុជា

ការប្រកួតនៅវគ្គទី១បង្ហាញយ៉ាងច្បាស់ថា ក្រុមកម្ពុជាមានទម្រង់លេងល្អប្រសើរជាងឆាយនិសតៃប៉ិដោយការគ្រប់គ្រងបាល់ លេងបាល់ខ្លី និងបម្រើការពារបានដោយបាននាំបាល់ទៅតំបន់គ្រោះថ្នាក់របស់គូប្រកួតជាញឹកញាប់ ប៉ុន្តែការសម្រេចទីមិនសូវមានប្រសិទ្ធភាពឡើយ។ រងចាំរហូតដល់នាទីទី៤០ទើបខ្សែបម្រើប្រយុទ្ធ ស៊ីន កក្កដា ស៊ុតបំប៉ោងសំណាញ់ទីរបស់ឆាយនិសតៃប៉ិបានសម្រេចដើម្បីនាំមុខ ១-០។

ចំពោះឆាយនិសតៃប៉ិបានព្យាយាមការពារយ៉ាងល្អ និងវាយបកម្តងម្កាលប្រកបដោយគ្រោះថ្នាក់ផងដែរ ប៉ុន្តែមិនសូវមានឱកាសច្រើនឡើយ។ នៅវគ្គទី២ ម្ចាស់ផ្ទះកម្ពុជាហាក់ធ្លាក់ចុះកម្រិតលេងដោយឆាយនិសតៃប៉ិបានសម្រុករហូតអាចរកគ្រាប់បាល់តាមស្មើ ១-១ បានសម្រេច។ ទីបំផុតក្នុងនាមជាម្ចាស់ផ្ទះ កម្ពុជាបានត្រឹមស្មើឆាយនិសតៃប៉ិប៉ុណ្ណោះ។

ក្រុមឆាយនិសតៃប៉ិ

ការប្រកួតវគ្គជម្រុះពូល H ដែលកម្ពុជាទទួលធ្វើម្ចាស់ផ្ទះបានបញ្ចប់ហើយដោយក្រុមខ្លាំង កូរ៉េខាងត្បូងឈរលេខ១បានឡើងទៅជុំផ្តាច់ព្រ័ត្រ ខណៈលេខ២គឺអូស្ត្រាលីដែលមាន៧ពិន្ទុដូចកូរ៉េខាងត្បូងដែរ ហើយក៏សង្ឃឹមច្រើនឡើងទៅជុំផ្តាច់ព្រ័ត្រដែរ ប៉ុន្តែត្រូវចាំមើលលទ្ធផលចំណាត់ថ្នាក់លេខ២ល្អបំផុតនៅពូលផ្សេងៗទៀត។

ម្ចាស់ផ្ទះកម្ពុជាស្ថិតនៅលេខ៣ដោយទទួលបាន១ពិន្ទុជាកម្លាំងចិត្ត បន្ទាប់ពីស្មើ១ប្រកួត និងចាញ់២ប្រកួត ខណៈឆាយនិសតៃប៉ិស្ថិតនៅបាតតារាងដោយមាន១ពិន្ទុរាប់ ហើយអាចរកបាន១គ្រាប់ក្នុងព្រឹត្តិការណ៍នេះ៕

អត្ថបទ៖ ជាន ចាន់រ៉ា