ខែក្តៅ អ្នកប្រើស្មាតហ្វូន ត្រូវជៀសទម្លាប់អាក្រក់ ៤ នេះ បើមិនចង់ជួបបញ្ហាធំ!
- 2019-04-01 01:40:34
- ចំនួនមតិ 0 | ចំនួនចែករំលែក 0
ខែក្តៅ អ្នកប្រើស្មាតហ្វូន ត្រូវជៀសទម្លាប់អាក្រក់ ៤ នេះ បើមិនចង់ជួបបញ្ហាធំ!
ចន្លោះមិនឃើញ
អាកាសធាតុក្តៅខ្លាំង មិនត្រឹមតែបង្កជាបញ្ហាសុខភាពដល់អ្នកនោះទេ លើសពីនេះឧបករណ៍បច្ចេកវិទ្យាមួយចំនួន ក៏អាចរងឥទ្ធិពលពីសីតុណ្ហភាពខ្ពស់ហួសកម្រិតនៅជុំវិញវាដូចគ្នា។ ជាពិសេសសម្រាប់ស្មាតហ្វូនដែលអ្នកកាន់ប្រើប្រាស់ប្រចាំថ្ងៃ បើអ្នកមិនប្រយ័ត្ននូវទម្លាប់មួយចំនួន នោះអាចនឹងបង្កហានិភ័យ រហូតធ្វើឲ្យម៉ាស៊ីនត្រូវខូចខាត ឬគាំងលែងដំណើរការដល់បាត់ទិន្នន័យក៏មាន។
Sabay ណែនាំឲ្យម្ចាស់ស្មាតហ្វូនគ្រប់រូប គួរបញ្ចៀសទម្លាប់អាក្រក់ ៤ យ៉ាងដូចខាងក្រោម សម្រាប់ការប្រើប្រាស់ស្មាតហ្វូននារដូវក្តៅ៖
១. កុំទុកស្មាតហ្វូនចោលក្នុងរថយន្ត
រថយន្តដើរតួមិនខុសពីផ្ទះកញ្ចក់នៅក្រោមអាកាសធាតុក្តៅខ្លាំង ដោយការសិក្សាមួយបង្ហាញថារថយន្តដែលចតចោលនារដូវក្តៅ អាចឡើងសីតុណ្ហភាពដល់ខ្ទង់ ៤៦ អង្សាសេ ដែលនេះផ្ទុយស្រឡះពីការហាមប្រាមរបស់ Apple ដោយធ្លាប់កំណត់ថាទូរសព្ទ iPhone ដែលប្រើប្រាស់នៅសីតុណ្ហភាពក្រោម ៣៥ អង្សាសេ គឺជាសីតុណ្ហភាពដ៏សមស្របបំផុត។
២.កុំសាកទូរសព្ទចោលក្រោមពន្លឺព្រះអាទិត្យ
ជាធម្មតាហើយអំឡុងពេលសាកថ្ម ម៉ាស៊ីនណាក៏ងាយនឹងឡើងកម្តៅដែរ ប៉ុន្តែបើឧបករណ៍នោះរងកម្តៅពីបរិវេណខាងក្រៅបន្ថែមទៀតនោះ វានឹងអាចបង្កបញ្ហាកាន់តែធំឡើងដល់ផ្នែកខាងក្នុងម៉ាស៊ីន រហូតអាចឈានដល់ការផ្ទុះឆេះក៏មាន ប្រសិនណាផ្នែកថ្មកំពុងរងបញ្ហាស្រាប់។
៣.កុំសាកទូរសព្ទទុកចោលក្រោមខ្នើយ
ស្រដៀងនឹងហេតុផលខាងលើ ការសាកទូរសព្ទទុកចោលក្រោមខ្នើយ ភួយ ឬរបស់ហប់ណាមួយនៅអាកាសធាតុក្តៅហួតហែងបែបនេះ វានឹងហប់ខ្យល់ខ្លាំង រហូតអាចបង្កឲ្យផ្ទុះឆេះ ដូចករណីធ្លាប់កើតមានកន្លងមកនៅក្រៅស្រុក។ បែបនេះគួរជ្រើសយកទីតាំងសមស្របណាមួយ ដូចជាសាកចោលលើតុឬផ្ទៃរឹងលាតស្មើដែលមានសភាពត្រជាក់។
៤. ពេលស្មាតហ្វូនឡើងកម្តៅខ្លាំង កុំយកដាក់ក្នុងទូទឹកកកឲ្យសោះ
បម្លាស់ប្តូរសីតុណ្ហភាពលឿនជ្រុលក៏ជាបញ្ហាសម្រាប់ស្មាតហ្វូនដូចគ្នា ដោយជម្រើសល្អបំផុតត្រង់ចំណុចនេះ គឺអ្នកគួរបិទម៉ាស៊ីនចោល ហើយរក្សាទុកនៅទីតាំងត្រជាក់សមល្មមណាមួយមុនលើកយកមកប្រើប្រាស់សារជាថ្មី។
ប្រភព: http://time.com/5319693/phone-smartphone-heat-hot/?fbclid=IwAR2y6UuLA5ngoRRHuhZtlXyQcJ9Tc4w9tBkDVffwsLHlMn0an8KtblX-oBk
ចុច Like និង See First ដើម្បីទទួលព័ត៌មានបច្ចេកវិទ្យាមុនគេ......
អានអត្ថបទ: