អ្នកជំនាញបង្ហើបពីរបៀបប្រមូលព័ត៌មានត្រឹមត្រូវពីអចលនទ្រព្យដើម្បីកុំឲ្យវិនិយោគខុសខាតឡុងចុង
- 2019-04-22 06:05:55
- ចំនួនមតិ 0 | ចំនួនចែករំលែក 0
អ្នកជំនាញបង្ហើបពីរបៀបប្រមូលព័ត៌មានត្រឹមត្រូវពីអចលនទ្រព្យដើម្បីកុំឲ្យវិនិយោគខុសខាតឡុងចុង
ចន្លោះមិនឃើញ
«វិនិយោគលើអចលនទ្រព្យ តែងត្រូវការលុយធំ ដូច្នេះត្រូវប្រយ័ត្នប្រយែងឲ្យមែនទែន កុំចេះតែជ្រួលតាមគេញាក់ ឃើញគេដាក់ត្រូវៗ ដាក់តាមគេនោះ អាចខុស។ យើងខ្លួនឯងត្រូវចេះស៊ើបសួរព័ត៌មាន និងវិភាគទិន្នន័យឲ្យច្បាស់លាស់សិន ថាទីតាំងដែលយើងទិញល្អសម្រាប់រស់នៅ ឬ ធ្វើអាជីវកម្ម ឬ អាចមានហាងឆេងនៅថ្ងៃមុខជាដើម»។ នេះជាការលើកឡើងរបស់ លោក សួស ចិន្តា រដ្ឋលេខាធិការសមាគម អ្នកវាយតម្លៃ និង ភ្នាក់ងារអចលនវត្ថុកម្ពុជា [CVEA] ថ្លែងក្នុងកម្មវិធីសន្និសីទសារព័ត៌មានរបស់ពិព័រណ៍លំនៅដ្ឋានកម្ពុជាឆ្នាំ ២០១៩ រៀបចំ ដោយ ក្រុមហ៊ុន Realestate.com.kh ។
ពាក់ព័ន្ធនឹងកង្វល់កប់លុយលើការវិនិយោគដីធ្លី លោកសង្កត់ធ្ងន់ថា៖ «ជាទូទៅអចលនទ្រព្យទាំងអស់សុទ្ធតែមានតម្លៃគោលរបស់វា (ហាងឆេង) គ្រាន់តែថាវាជានឹងមានហាងឆេងកម្រិតណា ឡើងថ្លៃឆាប់ៗ ឬ ត្រូវចាំយូររាប់ខែ ឬ ឆ្នាំ។ កន្លែងដែលកំពុងមានហាងឆេងស្រាប់ មើលទៅឃើញចំណេញលើគោក អីចឹងច្បាស់ជាថ្លៃកប់ពពក។ សម្រាប់អ្នករកស៊ីវិនិយោគអចលនទ្រព្យគេតែងរកមើលកន្លែងដែលធូរថ្លៃ តែអាចមានហាងឆេងនាពេលអនាគត។»
«ចំណុចសំខាន់ត្រូវចង់ចាំនោះ គឺ ត្រូវវិនិយោគនៅតំបន់ណាដែលមានដង្ហើមសេដ្ឋកិច្ច ឧទាហរណ៍ដូចជា ក្បែរផ្សារ រោងចក្រ សាលារៀន ទីប្រជុំជន ឬ នៅក្បែរគម្រោងអភិវឌ្ឍធំៗណាមួយ។ សំខាន់មួយទៀតនោះ ប្រសិនបើអ្នកទិញដីធូរថ្លៃនៅតំបន់ឆ្ងាយៗ ត្រូវមើលពីផលប្រយោជន៍ដែលអ្នកអាចទាញចេញបានពីដី ឬផ្ទះនោះបានមុនពេលលក់ចេញវិញ ដូចជា ដីនោះអាចដាំដំណាំ ឬធ្វើកសិកម្មបានឬអត់ ឬ ក៏ផ្ទះនោះអាចជួលស្នាក់នៅ ឬ ធ្វើឃ្លាំងបានឬ អត់ ជាដើម។ សកម្មភាពផ្សេងៗដែលអ្នកធ្វើលើដីដែលខ្លួនបានវិនិយោគនោះ នឹងបន្ថែមតម្លៃដល់ដី ឬផ្ទះរបស់អ្នក»។ លោកបញ្ជាក់បន្ថែម។
ដើម្បីទទួលបានព័ត៌មានច្បាស់លាស់ និងគ្រប់ជ្រុងជ្រោយពីអចលនទ្រព្យ អ្នកវិនិយោគ គួរទៅប្រឹក្សាយោបល់ពីភ្នាក់ងារអចលនទ្រព្យណាមួយដែលមានជំនាញត្រឹមត្រូវ ចុះបញ្ជីជាមួយក្រសួងមហាផ្ទៃ ដែលយល់ដឹងពីច្បាប់ភូមិបាល និងមានវិជ្ជាជីវៈលើការវាយតម្លៃអចលនទ្រព្យ តួយ៉ាងក្នុងសមាគម អ្នកវាយតម្លៃ និង ភ្នាក់ងារអចលនវត្ថុកម្ពុជា [CVEA] មានភ្នាក់ងារអចលនទ្រព្យជាង ១០០ក្រុមហ៊ុនរង់ចាំប្រឹក្សាយោបល់អ្នក។
ទាក់ទងនឹងបញ្ហានេះ លោក Thomas O’Sullivan ជានាយកប្រតិបត្តិរបស់ Realestate.com.kh ក៏បន្ថែមថា៖ « ការតាមដានព័ត៌មានពីការអភិវឌ្ឍប្រទេសជាតិ ក៏អាចជាទុនសំខាន់មួយក្នុងការជួយដល់ការវិនិយោគអចលនទ្រព្យដែរ ។ ដូច្នេះខ្ញុំសូមឲ្យប្រព័ន្ធផ្សព្វផ្សាយទាំងអស់នៅកម្ពុជាបន្ត ផ្សព្វផ្សាយព័ត៌មានត្រឹមត្រូវដែលផ្តល់ចំណេះដឹងប្រជាពលរដ្ឋជុំវិញវិស័យអចលនទ្រព្យ។»
«នៅថ្ងៃសុក្រ ទី២៦ និង ថ្ងៃសៅរ៍ ទី២៧ មេសា ២០១៩នេះ ពិព័រណ៍លំនៅដ្ឋានកម្ពុជា (ឬ Home and Lifestyle Expo 2019 ) នៅសាលពិព័រណ៍កោះពេជ្រ នឹងប្រមូលផ្តុំគម្រោងអចលនទ្រព្យជាច្រើនជុំវិញកម្ពុជា ដាក់មួយកន្លែងដែលនេះជាឱកាសដ៏ល្អបំផុតមួយសម្រាប់អ្នកមានចំណាប់អារម្មណ៍លើអចលនទ្រព្យ»។
លោកបន្តថា៖ «ក្នុងពិព័រណ៍លំនៅដ្ឋានកម្ពុជា ក៏មានវគ្គសិក្ខាសាលាចែករំលែកចំណេះដឹងពីវិស័យអចលនទ្រព្យអប់រំអ្នកចូលរួមឲ្យចេះមើលទីផ្សារ ដើម្បីឲ្យការវិនិយោគច្បាស់លាស់ និងជោគជ័យដោយវាគ្មិនក្នុងកម្មវិធី ក្រៅពីអ្នកជំនាញអចលនទ្រព្យហើយ ក៏មានអ្នកច្បាប់ អ្នកធនាគារ Developer ចូលរួមធ្វើបទបង្ហាញពីលក្ខណៈពិសេសៗរបស់គម្រោងរបស់គេ។ លើសពីនេះ ដើម្បីទិញបានតម្លៃសមរម្យ គឺចូលរួមទិញក្នុងឱកាសពិព័រណ៍នេះ នឹងទទួលបានប្រូម៉ូសិនជាច្រើន ទិញក្នុងឱកាសនោះ គឺតម្លៃខុសគ្នាពីយើងដើរទិញតាមគម្រោងដោយខ្លួនឯង»៕