តើ ឆន សុវណ្ណរាជ និយាយអ្វីខ្លះពី ប៊ុត សីហា ម្ចាស់ពាន The Voice Cambodia?

2014-11-17 21:27:06
ចំនួនមតិ 0 | ចំនួនចែករំលែក 0

ចន្លោះមិនឃើញ

Coach ឆន សុវណ្ណរាជ បានប្រាប់ Sabay មុននេះបន្តិចថា រយៈពេល ១ យប់ទៅហើយ ប៉ុន្តែ លោកនៅតែមានអារម្មណ៍រំភើបរីករាយ ចំពោះជ័យជម្នះរបស់បេក្ខជន ប៊ុត សីហា ក្នុងនាមជាអ្នកបង្ហាត់បង្ហាញដោយផ្ទាល់តាំងពីដើមរហូតមក។

លទ្ធផលនៅពេលនេះ បានពីការខិតខំប្រឹងប្រែង និង ពុះពារគ្រប់ឧបសគ្គតាំងពីវគ្គដំបូង និង ឆ្លងកាត់វគ្គជាច្រើនទៀតក្នុងកម្មវិធី The Voice Cambodia រដូវកាលទី១។

សុវណ្ណរាជ និយាយថា៖ “សីហា មានសំឡេងប្លែក មិនយកត្រាប់តាមនរណាម្នាក់ទេ។ ហេតុផលនេះហើយ ធ្វើឲ្យខ្ញុំចាប់អារម្មណ៍ និងជ្រើសរើសគាត់តាំងពីដំបូង"។

ទោះបីជាយ៉ាងណា ក្រៅពីចំណុចខ្លាំងមានស្រាប់ បេក្ខជន ប៊ុត សីហា ក៏នៅមានចំណុចខ្សោយមួយចំនួន ដូចកូនក្រុមទាំង ១២ នាក់ ផ្សេងទៀតដែរ។ ប៉ុន្តែសម្រាប់យុវជនមកពីខេត្តកំពង់ស្ពឺរូបនេះ អាចធ្វើបានល្អ រាល់បទចម្រៀងមានលក្ខណៈលំបាកទាំងឡាយ ដែល Coach បានជ្រើសរើសឲ្យច្រៀងជារៀងរាល់សប្ដាហ៍ និង ទទួលបានការគាំទ្រពីទស្សនិកជនទៀតផង។

“ចំណុចខ្លាំងគាត់មានអស់ហើយ តែមានចំណុចខ្សោយជាច្រើន ដែលបានកែប្រែបន្តបន្ទាប់រហូតទទួលបានលទ្ធផលដូចពេលនេះអញ្ចឹង"។ សុវណ្ណរាជ បញ្ជាក់យ៉ាងដូច្នេះ។

ជាមួយគ្នានោះ Coach ខាងលើរំលឹកថា មិនមែនជារឿងងាយស្រួលនោះទេ ក្នុងការបង្ហាត់បង្ហាញចំពោះបទចម្រៀងនីមួយៗ ដល់កូនក្រុមទាំងអស់ រួមទាំងបេក្ខជន ប៊ុត សីហា ដែលទើបទទួលបានប្រាក់ចំនួន១០០លានរៀល និងឱកាសក្លាយជាតារាចម្រៀងកុងត្រានៅក្នុងផលិតកម្មហង្សមាសពេលនេះក្ដី។

លោកបន្ដថា រាល់បច្ចេកទេសទាំងអស់ ឆ្លងកាត់បទពិសោធន៍កន្លងមក បានផ្ទេរទៅបេក្ខភាពគ្រប់រូបអស់ហើយ ព្យាយាមធ្វើយ៉ាងណា ឲ្យពូកគេមានសមត្ថភាពក្នុងការប្រលងកម្មវិធី The Voice Cambodia រដូវកាលទី ១ នេះ។ ឬយ៉ាងហោចណាស់ ពួកគេអាចមានសមត្ថភាពបន្ថែមទៀត ដែលអាចបន្តអាជីពចម្រៀងតាមទីកន្លែងនានាផងដែរ។

យ៉ាងណា ឆន សុវណ្ណរាជ នៅតែអរគុណចំពោះផលិតកម្មហង្សមាស បាននាំយកកម្មវិធីប្រលងចម្រៀងលំដាប់ពិភពលោកនេះមកកម្ពុជា ដើម្បីផ្ដល់ឱកាសឲ្យកូនខ្មែរគ្រប់រូប មានឱកាសបានបង្ហាញសមត្ថភាពរបស់ពូកគេ។ ជាពិសេសអ្នកគាំទ្របេក្ខជន ប៊ុត សីហា ទាំងអស់តាមរយៈការផ្ញើសារបោះឆ្នោតក្នុងដំណាក់កាលចុងក្រោយ នាំឲ្យកូនក្រុមរបស់ខ្លួនជោគជ័យក្នុងកម្មវិធី The Voice Cambodia ក្នុងរដូវកាលទី១នេះ៕

មើលវីដេអូ ប៊ុត សីហា លើកពានយប់មិញនេះ

ស្ដាប់បទ"ស្រាលាញ់បងគ្មានអនាគតទេ" របស់ ខេមរៈ សិរីមន្ត និង ប៊ុត សីហា យ៉ាងម៉េចដែរ?

អត្ថបទ៖ សំ ជំនាញ