និស្សិតខ្មែរឈ្នះអាហារូបករណ៍បរទេសពីរផ្ទួនគ្នាទៅសិក្សាជំនាញដែលខ្មែរត្រូវការបំផុត

2014-11-17 21:29:48
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិត ខ្មែរមកពីជនបទមួយរូបបានជាប់អាហារូបករណ៍បរទេសពីរដងផ្ទួនគ្នា ទៅសិក្សាជំនាញ ដែលត្រូវការចាំបាច់បំផុតសម្រាប់ប្រើប្រាស់ក្នុង ស្រុក នោះគឺទាក់ទងនឹងឧស្សាហកម្មកៅស៊ូ។ ឡាយ មករា មានស្រុកកំណើតនៅស្រុកកោះសូទិន ខេត្តកំពង់ចាម កំពុងតែសិក្សាថ្នាក់អនុបណ្ឌិតផ្នែកវិស្វករឧស្សាហកម្មកៅស៊ូ នៅសាកលវិទ្យាល័យ Universiti Sains Malaysia (USM) ក្នុងប្រទេសម៉ាឡេស៊ី។ មិនទាន់នឹងចប់ស្រួលបួលផង យុវជនរូបនេះបានទទួលអាហារូបករណ៍មួយទៀត ទៅសិក្សាថ្នាក់បណ្ឌិតផ្នែកវិស្វករវិទ្យាសាស្ត្ររូបធាតុប្លាស្ទិក នៅប្រទេសអេស្ប៉ាញទៀត។ តើយុវជនរូបនេះធ្វើម៉េច អាចឈ្នះអាហារូបករណ៍ផ្ទួនគ្នាបែបហ្នឹងទៅសិក្សាជំនាញដែលខ្មែរ កំពុងត្រូវការ?

មុនបានអាហារូបករណ៍ទៅម៉ាឡេស៊ី

ក្រោយ បញ្ចប់បាក់ឌុបជាមួយនិទ្ទេស C ពីវិទ្យាល័យកោះសូទិនក្នុងឆ្នាំ២០០៥ ឡាយ មករា ខាតពេលមួយឆ្នាំ ព្រោះមិនបានចូលរៀននៅសាកលវិទ្យាល័យភ្លាមទេ ដោយសារតែមកចុះឈ្មោះនៅវិទ្យាស្ថានបច្ចេកវិទ្យាកម្ពុជា (តិចណូ) យឺតពេល។ យុវជនរូបនេះអាចសិក្សានៅសាកលវិទ្យាល័យឯកជននានានៅពេលនោះបាន ប៉ុន្តែត្រូវឪពុកម្ដាយខ្លួនជំទាស់ ព្រោះគាត់ចង់ឲ្យរៀននៅសាកលវិទ្យាល័យរដ្ឋជាង។ ថ្វីត្បិតតែ មករា នៅក្រៅសាកលវិទ្យាល័យមួយឆ្នាំមែន ប៉ុន្តែយុវជនរាងស្ដើងរូបនេះមិនចំណាយពេលអត់ប្រយោជន៍ឡើយ។ គេបានទៅរៀនបំប៉នមុខវិជ្ជា រូបវិទ្យា គណិតវិទ្យា និងគីមីវិទ្យា នៅសាលាជ័យថាវី ព្រមទាំងបានបំប៉នភាសាអង់គ្លេសរបស់ខ្លួនទៀតផង។

ដោយ មានក្ដីស្រមៃចង់ក្លាយជាវិស្វករតាំងពីតូចមក និងដោយមើលឃើញថា កម្ពុជាមានធនធានប្រេងនិងរ៉ែជាច្រើន ប៉ុន្តែខ្វះខាតធនធានមនុស្សខាងផ្នែកនេះ នៅឆ្នាំ២០០៦ មករា ក៏ចូលរៀនថ្នាក់បរិញ្ញាបត្រផ្នែកវិស្វករភូគព្ភសាស្ត្រនៅវិទ្យាស្ថានបច្ចេកវិទ្យាកម្ពុជា។ តាមពិតទៅ មុនពេលចូលរៀននៅតិចណូ ពោលគឺអំឡុងខែកុម្ភៈឆ្នាំ២០០៦ មករា បានប្រឡងជាប់អាហារូបករណ៍ទៅសិក្សានៅប្រទេសរុស្ស៊ីក្រោមការ ឧបត្ថម្ភពីរដ្ឋាភិបាលរុស្ស៊ី ប៉ុន្តែយុវជនរូបនេះសុខចិត្តបោះបង់អាហារូបករណ៍នោះចោល ដោយសារតែក្រុមគ្រួសាររបស់ខ្លួនបារម្ភពីបញ្ហាសុខភាព ព្រោះអាកាសធាតុនៅទីនោះត្រជាក់ខ្លាំងពេក។ ណាមួយឮដំណឹងមិនល្អថា និស្សិតមួយចំនួននៅទីនោះមិនអាចបញ្ចប់ថ្នាក់បរិញ្ញាបត្របានឡើយ ព្រោះបើប្រឡងធ្លាក់ គេនឹងបញ្ជូនមកស្រុកខ្មែរវិញហើយ។ ដូច្នេះ មករា ក៏បង់លុយសិក្សានៅតិចណូរហូតចប់ថ្នាក់បរិញ្ញាបត្រក្នុងឆ្នាំ២០១១ ដែលរយៈពេល៥ឆ្នាំ នៃការសិក្សាថ្នាក់បរិញ្ញាបត្រនេះ មករា ស្នាក់នៅអន្តេវាសិកដ្ឋានរបស់វិទ្យាស្ថាន ដោយបង់ថ្លៃឈ្នួល១២ដុល្លារក្នុងមួយឆ្នាំ។

ស្វែងរកអនុបណ្ឌិតលើជំនាញដ៏កម្រនៅម៉ាឡេស៊ី

វិទ្យាស្ថាន បច្ចេកវិទ្យាកម្ពុជាមានកិច្ចសហប្រតិបត្តិការជាមួយស្ថាប័នផ្ដល់ អាហារូបករណ៍ជាច្រើនដូចជា AUN ឬSEED.Net (សម្រាប់សិក្សានៅតំបន់អាស៊ីអាគ្នេយ៍ មានថៃ ម៉ាឡេស៊ី ឥណ្ឌូណេស៊ី…) AUF(សម្រាប់ទៅសិក្សានៅបារាំង) និង Erasmus mundus (ទៅសិក្សានៅអឺរ៉ុប) ជាដើម។ អំឡុងពេលកំពុងសិក្សានៅតិចណូ យុវជនដែលមានឪពុកជានាយកសាលាបឋមសិក្សារូបនេះមានគម្រោងរួចជា ស្រេចថានឹងដាក់ពាក្យប្រឡងយកអាហារូបករណ៍ទៅបន្តថ្នាក់អនុបណ្ឌិត នៅក្រៅប្រទេស បន្ទាប់ពីបញ្ចប់បរិញ្ញាបត្រ ប៉ុន្តែមិនរំពឹងទុកមុនថាជាប់ទេ ព្រោះត្រូវប្រជែងជាមួយនិស្សិតមកពីសាកលវិទ្យាល័យផ្សេងៗទៀតនៃ បណ្ដាប្រទេសក្នុងតំបន់។

នៅខែសីហា ចុងឆ្នាំ២០១១ យុវជនរូបនេះបានឈ្នះអាហារូបករណ៍ដូចបំណង ក្រោមគម្រោងរបស់ JICA ដែលមានឈ្មោះថា (AUN/SEED.Net = Asean University Network/ Southeast Asia Engineering Education Development Network) ទៅសិក្សាថ្នាក់អនុបណ្ឌិតនៅម៉ាឡេស៊ី លើជំនាញវិធីសាស្ត្រ ក្នុងការបន្ថែមសារធាតុគីមីដើម្បីបង្កើនគុណភាពកៅស៊ូស្ងួតកម្ពុជា សម្រាប់អនុវត្តក្នុងឧស្សាហកម្មកៅស៊ូដើម្បីផលិត កៅស៊ូ កង់ឡាន ខ្សែក្រវាត់ ខ្សែពាន បំពង់ទឹក និងទ្រនាប់ម៉ាស៊ីនជាដើម។ ពេលនោះមាននិស្សិតស្រីកម្ពុជាពីរនាក់ផ្សេងទៀតក៏ជាប់ទៅម៉ាឡេស៊ី ដែរ ប៉ុន្តែពួកគេរៀនជំនាញផ្សេងគ្នា ពោលគឺជំនាញពាក់ព័ន្ធនឹងកៅស៊ូនេះមានតែ មករា ម្នាក់ប៉ុណ្ណោះ។នៅ ម៉ាឡេស៊ី មករា ស្នាក់នៅក្នុងអន្តេវាសិកដ្ឋានរបស់សាកលវិទ្យាល័យដែលខ្លួនរៀន គឺ Universiti Sains Malaysia ដោយត្រូវបង់ថ្លៃឈ្នួល៥០ដុល្លារ ក្នុងមួយខែ ហើយត្រូវធ្វើអាហារញ៉ាំដោយខ្លួនឯង ប៉ុន្តែមិនជាបញ្ហាទេ ព្រោះ មករា ទទួលបានប្រាក់អាហារូបករណ៍១៩០០រីងហ្គីត (លុយម៉ាឡេស៊ី) ក្នុងមួយខែ ឬប្រមាណ៦០០ដុល្លារអាមេរិក ដែលផាត់ថ្លៃចំណាយទៅ យុវជនរូបនេះអាចសល់ប្រហែល២០០ដុល្លារដែរក្នុងមួយខែៗ។

យុវជន ដែលមានកំណើតនៅលើដីកោះល្បីខាងដំណាំថ្នាំជក់រូបនេះ ឲ្យដឹងថា ការសិក្សានៅទីនោះប្រើប្រាស់ភាសាអង់គ្លេសសុទ្ធ ហើយនិស្សិតត្រូវប្រឡងឲ្យបានពិន្ទុ C+ ឡើង ប៉ុន្តែសាកលវិទ្យាល័យផ្ដោតសំខាន់ទៅលើកិច្ចការស្រាវជ្រាវជាងការប្រឡងពីព្រោះនិស្សិតថ្នាក់អនុបណ្ឌិតនៅទីនោះសិក្សាក្នុងនាមជាអ្នក ស្រាវជ្រាវ។ រីឯទំនាក់ទំនងប្រចាំថ្ងៃក៏មិនជាបញ្ហាចោទដែរ ព្រោះប្រជាជននៅទីនោះនិយាយភាសាអង់គ្លេសបានល្អណាស់។

មិនទាន់នឹងចប់ស្រួលបួលផង គេឲ្យអាហារូបករណ៍មួយទៀត

ថ្នាក់ អនុបណ្ឌិតរបស់ មករា នឹងបញ្ចប់នៅខែសីហា ឆ្នាំ២០១៣នេះ។ ខណៈដែលការសិក្សានៅម៉ាឡេស៊ីមិនទាន់ទាំងចប់ស្រួលបួលផង យុវជនវ័យក្មេងរូបនេះ ទទួលបានអាហារូបករណ៍មួយទៀតទៅសិក្សាថ្នាក់បណ្ឌិតផ្នែកវិទ្យាសាស្ត្ររូបធាតុប្លាស្ទិក រយៈពេល៣ឆ្នាំ នៅប្រទេសអេស្ប៉ាញ ក្រោមការឧបត្ថម្ភពីកម្មវិធី Erasmus Mondus Techno Project II។ សាកលវិទ្យាល័យដែល មករា ត្រូវទៅសិក្សានោះ មានឈ្មោះថា University of Girona។

មករា ប្រាប់ថា ខ្លួនឈ្នះអាហារូបករណ៍នេះតាមរយៈការដាក់ពាក្យតាមប្រព័ន្ធ អ៊ីនធឺណិត ដោយបំពេញគ្រប់លក្ខខណ្ឌទាមទារយ៉ាងប្រុងប្រយ័ត្ន ដូចជាបំពេញពាក្យសុំ ដាក់ព្រឹត្តិបត្រពិន្ទុពីឆ្នាំទី១ដល់ទី៥នៅតិចណូ ព្រឹត្តិបត្រពិន្ទុថ្នាក់អនុបណ្ឌិត បទពិសោធន៍ស្រាវជ្រាវ Motivation Letter & Research Proposal, Recommendation, វិញ្ញាបនបត្រភាសាអង់គ្លេស និងភាសាបារាំង ព្រមទាំងវិញ្ញាបនបត្រមួយចំនួនទៀតទាក់ទងនឹងការងារ និងការរៀនវគ្គខ្លីៗ។ នៅថ្ងៃទី៨ ខែកញ្ញាខាងមុខនេះ គេនឹងធ្វើដំណើរទៅកាន់ប្រទេសអេស្ប៉ាញហើយ។ ក្នុងដំណើរឆ្ពោះទៅក្រេបជញ្ជក់យកចំណេះដឹងនៅប្រទេសអឺរ៉ុបមួយនេះ មករា ប្រាប់ថាទទួលបានប្រាក់អាហារូបករណ៍ ១៥០០អឺរ៉ូ ដែលស្មើនឹងជិតពីរពាន់ដុល្លារអាមេរិក ក្នុងមួយខែ។ មករា បន្តថា ខែដំបូងនៅអេស្ប៉ាញ គេត្រូវស្នាក់នៅក្នុងអន្តេវាសិកដ្ឋានរបស់សាកលវិទ្យាល័យសិន ដោយត្រូវបង់ថ្លៃឈ្នួលដល់ទៅ៣៥០អឺរ៉ូឯណោះក្នុងមួយខែ។ ដោយសារតែថ្លៃឈ្នួលខ្ពស់បែបនេះ មករា ប្រាប់ថានឹងប្ដូរទៅរកជួលផ្ទះនៅខាងក្រៅសាលាវិញនៅខែ បន្ទាប់។ ទាក់ទងនឹងជំនាញខាង វិទ្យាសាស្ត្ររូបធាតុប្លាស្ទិកនេះ មករា និយាយថា ខ្លួនមិនមែននិស្សិតខ្មែរទី១ទេដែលចាប់ជំនាញនេះ។ តាមដឹង មាននិស្សិតខ្មែរ៣នាក់មកហើយបានបញ្ចប់ថ្នាក់បណ្ឌិត ដែលក្នុងនោះមានម្នាក់បញ្ចប់ថ្នាក់បណ្ឌិតផ្នែកស៊ីម៉ង់ និងពីរនាក់ទៀតបញ្ចប់ខាងដីឥដ្ឋ។

ចង់យកជំនាញមកអភិវឌ្ឍកម្ពុជា

បច្ចុប្បន្នភាគច្រើននៃជ័រកៅស៊ូធម្មជាតិរបស់កម្ពុជាត្រូវបាននាំចេញទៅកាន់ ប្រទេសវៀតណាម ម៉ាឡេស៊ី សិង្ហបុរី និងកូរ៉េខាងត្បូង ដោយសារតែដំណើរការកែច្នៃកៅស៊ូរបស់កម្ពុជាឲ្យស្របទៅតាម ស្តង់ដារអន្តរជាតិនៅមានកម្រិតនៅឡើយ។ ដោយមើលឃើញត្រង់ចំណុចនេះ មករា បញ្ជាក់ថា ក្រោយពេលបញ្ចប់ថ្នាក់បណ្ឌិតវិទ្យាសាស្ត្ររូបធាតុប្លាស្ទិកនេះ រូបគេនឹងយកចំណេះដឹងនេះមកប្រើនៅកម្ពុជាដោយធ្វើការក្នុងផ្នែក ស្រាវជ្រាវ និងអភិវឌ្ឍន៍” (Research & Development) ក្នុងឧស្សាហកម្មកៅស៊ូនៅកម្ពុជា ដើម្បីជួយធ្វើឱ្យកៅស៊ូ កម្ពុជាអាចប្រកួតប្រជែងក្នុងទីផ្សារ កៅស៊ូជាមួយបណ្ដាប្រទេសផ្សេងៗបាន ជាពិសេសកៅស៊ូស្ងួត។

ប៉ុន្តែពេលត្រលប់មកដល់កម្ពុជាវិញភ្លាម មករា ប្រហែលជាត្រូវធ្វើជាសាស្ត្រាចារ្យនៅវិទ្យាស្ថានបច្ចេកវិទ្យា កម្ពុជាសិន ព្រោះរូបគេបានជាប់កិច្ចសន្យារយៈពេល៣ឆ្នាំជាមួយវិទ្យាស្ថាន នេះ។ការផ្តាំផ្ញើចំពោះនិស្សិតដែលចង់បានអាហារូបករណ៍ទៅក្រៅប្រទេសក្នុង នាមជានិស្សិតមកពីជនបទស្រុកស្រែចម្ការម្នាក់ មករា សូមផ្ដាំផ្ញើទៅកាន់សិស្សនិស្សិតក្រីក្រទាំងអស់កុំអស់សង្ឃឹម និងកុំបាក់ទឹកចិត្ត។ ផ្ទុយទៅវិញ ពួកគេត្រូវតស៊ូខិតខំរៀនសូត្រ ពីព្រោះមានអាហារូបករណ៍ច្រើនណាស់កំពុងរង់ចាំអ្នកមានសមត្ថភាព។

ទន្ទឹមនឹងនេះ មករា ចង់ចែករំលែកគន្លឹះខ្លះៗ ដើម្បីត្រៀមប្រជែងយកអាហារូបករណ៍ទៅក្រៅ ប្រទេសថា ជាដំបូងនិស្សិតគ្រប់រូបត្រូវពង្រឹងភាសាអង់គ្លេសរបស់ខ្លួន (អាហារូបករណ៍ខ្លះទាមទារពិន្ទុ TOEFL ឬ IELTS) ហើយត្រូវមានពិន្ទុមធ្យមសរុប (GPA) យ៉ាងតិច៣.០០ពីសាកលវិទ្យាល័យក្នុងស្រុក។ បន្ថែមពីលើនេះ គេត្រូវឧស្សាហ៍ចូលមើលគេហទំព័រផ្សេងៗទាក់ទងនឹងការផ្ដល់ អាហារូបករណ៍ ឬសាកសួរនិស្សិតដែលកំពុងរៀននៅបរទេសស្រាប់ ប្រសិនបើស្គាល់។ ជាពិសេស និស្សិតត្រូវអានយ៉ាងយកចិត្តទុកដាក់អំពីលក្ខខណ្ឌជ្រើសរើស និងព័ត៌មានផ្សេងៗទៀតដែលពាក់ព័ន្ធ មុននឹងដាក់ពាក្យស្នើសុំ៕

ចុចត្រង់នេះ អានអត្ថបទ តែ រតនៈ៖រៀនខ្សោយមិនមែនជាចំណោទធំទេ តែការតាំងចិត្តជារឿងសំខាន់

អត្ថបទ៖ យ៉ុង ម៉ុងហាក់