កីឡាកររបស់ក្លឹប Bolton មិនព្រមចូលទីលាន និង បានធ្វើការតវ៉ាទាមទារប្រាក់ឈ្នួល

2019-04-28 05:53:29
ចំនួនមតិ 0 | ចំនួនចែករំលែក 0

ចន្លោះមិនឃើញ

រដូវកាលដ៏ចម្រូងចម្រាសរបស់ Bolton ឈានទៅដល់លុបការប្រកួតក្នុងដីទល់នឹងក្រុម Brentford នៅថ្ងៃសៅរ៍នេះ ក្រោយកីឡាករមិនព្រមចូលទីលាន និង ធ្វើការតវ៉ាទាមទារប្រាក់ឈ្នួល។

Bolton ពីក្លឹបដែលធ្លាប់ឈរលើ Atletico Madrid, Man City និង PSG ជាដើមកាលពីឆ្នាំ២០០៨ ឥឡូវនេះបានធ្លាក់ពីលីគលំដាប់ទី២នៅអង់គ្លេសទៅលីគលំដាប់ទី៣កាលពីសប្ដាហ៍មុន ហើយខណៈពេលដែលក្លឹបកំពុងរៀបចំនីតិវិធីដើម្បីប្តូរម្ចាស់ ព្រោះម្ចាស់មុនប្រកាសក្ស័យធន បញ្ហាប្រាក់ខែបុគ្គលិក និង កីឡាករនៅមិនត្រូវបានទូទាត់នៅឡើយគិតចាប់តាំងពីខែមីនាមកម្ល៉េះ។

Ken Anderson បានមកធ្វើជាម្ចាស់ក្លឹប Bolton ក្នុងឆ្នាំ ២០១៦

Ken Anderson ម្ចាស់ក្លឹបចាស់របស់ Bolton បានយល់ព្រមលក់ក្លឹបឲ្យទៅ Laurence Bassini បុរសដែលធ្លាប់ប្រកាសក្ស័យធនចំនួន២ដងទៅហើយ។ គេមិនច្បាស់ទេថាម្ចាស់ថ្មីនេះ អាចនឹងប្រសើរ ឬ ក៏ដូចម្ចាស់ក្លឹបចាស់ទេ ពីព្រោះសុទ្ធតែជាអ្នកជំនួញមានប្រវត្តិរូបមិនល្អ។

សេចក្តីថ្លែងការណ៍របស់ក្រុមកីឡាករបានឲ្យដឹងថា "វិបត្តិហិរញ្ញវត្ថុដ៏រ៉ាំរ៉ៃនៅក្លឹបរបស់យើងត្រូវបានគេចងក្រងជាឯកសារយ៉ាងល្អ។ ជាការពិត យើងជាកីឡាករទាំងអស់គ្នា នៅមិនទាន់ទទួលបានប្រាក់ឈ្នួលខែមីនានៅឡើយ"។

“បុគ្គលិកគ្រូបង្វឹកចំនួន ៥ នាក់របស់យើងក៏មិនទាន់បានប្រាក់ឈ្នួលខែមីនាដែរ។ យើងបានខិតខំប្រឹងប្រែងបន្តការហ្វឹកហាត់ និង ព្យាយាមលេងក្នុងកំឡុងពេលវេលាដ៏លំបាកនេះ ប៉ុន្តែហាក់ដូចជាគ្មានដំណោះស្រាយសម្រាប់ពួកយើងសោះ"។

"យើងគិតថា ការផ្ទេរក្លឹបនេះអាចនឹងជាដំណោះស្រាយសម្រាប់ពួកយើង ប៉ុន្តែនៅតែគ្មានដំណោះស្រាយ ហើយយើងមិនអាចបន្តទៅមុខទៀតបានទេ។ ស្ថានភាពនេះបានបង្កើតឱ្យមានបញ្ហាស្មារតី ផ្លូវចិត្ត និង ហិរញ្ញវត្ថុសម្រាប់មនុស្សដែលគ្មានកំហុសដោយសារពួកគេ"។

ចាប់តាំងពីលោក Ken Anderson បានមកធ្វើជាម្ចាស់ក្លឹប Bolton ក្នុងឆ្នាំ ២០១៦ បុរសដែលមានមូលនិធិតិចតួច ហើយគ្មានទំនាក់ទំនងប្រវត្តិសាស្ត្រជាមួយក្រុម Bolton Wanderers បានធ្វើឲ្យក្លឹបជំពាក់បំណុលគេវ័ណ្ឌក។ ទីបំផុត ក៏សម្រេចចិត្តលក់ក្លឹបឲ្យអ្នកដែលប្រកាសក្ស័យធន២ដង និង ធ្លាប់ជាប់បម្រាមរបស់សហព័ន្ធបាល់ទាត់អង់គ្លេសទៀងផង៕

អាន៖ Bolton ៖ ពីក្លឹបធ្លាប់ឈរលើ Man City, PSG ក្លាយជាក្លឹបស្ទើរលែងមានអ្នកគាំទ្រទៅទស្សនា

អាន៖ លេង ២៦ ប្រកួត ចាញ់ទាំង ២៦ តែក្រុម Antigua Barracuda បានធ្វើរឿងមួយឲ្យគូប្រកួតគោរព

ប្រភព៖ theguardian ប្រែសម្រួល៖ សុខ លាងហ៊ត