លីកបាល់បោះ៖ Mekong Tigers ដើរចេញពីទីលានទាំងការប្រកួតមិនទាន់ចប់

2014-11-17 23:02:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុម Mekong Tigers បានបោះបង់ការប្រកួតចោល ដោយដើរចេញពីទីលាននៅប៉ុន្មាននាទីចុងក្រោយដែលនៅសល់ ដោយមានការមិនពេញចិត្តចំពោះការសម្រេចចិត្តរបស់លោកអាជ្ញាកណ្ដាល ក្នុងការប្រកួតលីកបាល់បោះជ្រើសរើសជើងឯកជាតិវគ្គ៤ក្រុមចុងក្រោយកាលពីរសៀលថ្ងៃអាទិត្យចុងសប្ដាហ៍កន្លងទៅនេះនៅវិមានពហុកីឡដ្ឋានជាតិ។

លោក Michael Dibbern មន្ត្រីព័ត៌មានរបស់លីកបាល់បោះជាតិបានរៀបរាប់ថា ការប្រកួតបានដំណើរការធម្មតា ហើយក៏ជិតចប់ទៅហើយដែរ ប៉ុន្មាននាទីមុននោះមានការប៉ះទង្គិចគ្នាក្នុងពេលប្រកួតដែលបានបណ្ដាលឲ្យកីឡាកររបស់ក្រុម Pate 310 ម្នាក់រងរបួស ប៉ុន្តែលោកអាជ្ញាកណ្ដាលមិនបានផ្អាកការប្រកួតនោះទេ ដែលធ្វើឲ្យកីឡាកររបស់ក្រុម Pate 310 មួយចំនួនមិនពេញចិត្ត ហើយបានតវ៉ានឹងលោកអាជ្ញាកណ្ដាល។ សម្លេងតវ៉ានៅតែកើតមាន ធ្វើឲ្យរំខានដល់ការប្រកួត ដែលបានធ្វើឲ្យកីឡាករខាងក្រុម Mekong Tigers មិនពេញចិត្តចំពោះទង្វើរបស់អាជ្ញាកណ្ដាលដែលមិនបានពិន័យលើកីឡាករក្រុម Pate 310 ចំពោះការតវ៉ាដែលរំខានដល់ការប្រកួតនេះ។

ចំពោះលោកអាជ្ញាកណ្ដាលគ្មានវិធានការយ៉ាងណាចំពោះការតវ៉ានោះទេ កីឡាករក្រុម Mekong Tigers ក៏យកលេសនេះដើម្បីដើេរចេញពីទីលានតែម្ដង ដោយបោះបង់ម៉ោងប្រកួតដែលនៅសល់ ១:៣០នាទី។ បន្ទាប់ពីការដើរចេញ លោកអាជ្ញាកណ្ដាលក៏បានផ្ដល់ជ័យជម្នះដល់ក្រុម Pate 310 ខណៈក្រុមនេះកំពុងនាំមុខលើក្រុម Mekong Tigers ក្នុងលទ្ធផល ៦២ ទល់នឹង ៥៤។ នេះបើតាមការឲ្យដឹងពីលោក Michael Dibbern មន្ត្រីព័ត៌មានរបស់លីកបាល់បោះជាតិ។

Mekong Tigers ដើរចេញពីទីលានដោយបោះបង់ការប្រកួត

ដូច្នេះនៅប្រកួតទី១នេះ ជ័យជម្នះបានទៅលើក្រុម Pate 310 ជាស្វ័យប្រវត្តិ ហើយមានតែរង់ចាំអ៊ុតមើលលទ្ធផលនៅប្រកួតទី២ ប៉ុណ្ណោះ មុនពេលដឹងថាក្រុមណានឹងមានលទ្ធភាពឡើងទៅវគ្គផ្ដាច់ព្រ័ត្រ៕

អត្ថបទ៖ អៀង សូទ្រី