Real តបដោយកំហឹងនឹង Pochettino ថាពួកគេមិនឲ្យ Spurs ស្នាក់នៅកន្លែងហ្វឹកហាត់ត្រៀម UCL

2019-05-25 05:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Real Madrid បានឆ្លើយតបដោយកំហឹងចំពោះការលើកឡើងរបស់លោក Mauricio Pochettino គ្រូបង្វឹក Tottenham ដែលបានចោទថាក្លឹបយក្សអេស្ប៉ាញមិនឲ្យក្លឹបមកពីក្រុងឡុងដ៍ប្រើប្រាស់ទីលានហ្វឹកហាត់របស់ពួកគេមុនប្រកួតវគ្គផ្តាច់ព្រ័ត្រ Champions League។

Spurs ត្រូវបានកំណត់ឱ្យប្រើកន្លែងហ្វឹកហាត់នៅ Valdebebas របស់កីឡដ្ឋានក្លឹប Real Madrid ដើម្បីត្រៀមក្នុងការប្រកួតជាមួយនឹងក្រុម Liverpool នៅរដ្ឋធានីរបស់អេស្ប៉ាញនាថ្ងៃទី ១ ខែមិថុនា។

Pochettino បានប្រាប់វិទ្យុអេស្ប៉ាញ El Partidazo de Cope ថាម្ចាស់ក្លឹប Real គឺលោក Florentino Pérez បានច្រានចោលសំណើសុំឱ្យក្រុមមាន់ខ្នាយមាសសម្រាកហ្វឹកហាត់នៅមជ្ឈមណ្ឌលកីឡារបស់ Real Madrid ។ នេះបើតាម The Guardian។

"ខ្ញុំបានស្នើ Florentino អនុញ្ញាតឱ្យពួកយើងបានសម្រាកហ្វឹកហាត់ក្នុងមជ្ឈមណ្ឌលកីឡា ប៉ុន្តែគាត់បានប្រាប់ខ្ញុំថា ខ្ញុំអាចដេកនៅទីនោះបានលុះត្រាណាខ្ញុំក្លាយជាគ្រូបង្វឹករបស់ Real Madrid សិន"។ Pochettino បាននិយាយ។

សេចក្តីថ្លែងការណ៍មួយរបស់ក្លឹបអធិរាជសធ្វើឡើងភ្លាមៗកាលពីថ្ងៃសុក្រ ដែលសរសេរថា "Real Madrid CF មានការភ្ញាក់ផ្អើលនឹងការធ្វើអត្ថាធិប្បាយរបស់គ្រូបង្វឹក Tottenham Hotspur លោក Mauricio Pochettino អំពីការស្នើសុំមួយដែលធ្វើឡើងចំពោះក្លឹបរបស់យើងដើម្បីឱ្យក្រុមរបស់គាត់អាចស្នាក់នៅក្នុងផ្ទះរបស់ Real Madrid ក្នុងឱកាសនៃការលេងវគ្គផ្ដាច់ព្រ័ត្រនៃក្របខ័ណ្ឌChampions League"។

“Real Madrid CF ចង់បញ្ជាក់ឱ្យច្បាស់ថា វាមិនពិតទាំងស្រុងដែលសំណើនេះត្រូវបានធ្វើឡើង។ ក្លឹបរបស់យើងតែងតែបង្ហាញពីលទ្ធភាពពេញលេញរបស់ខ្លួនក្នុងការបំពេញតាមសំណើទាំងអស់ដែលធ្វើឡើងដោយសហព័ន្ធកីឡាបាល់ទាត់ទ្វីបអឺរ៉ុប សហព័ន្ធកីឡាបាល់ទាត់អេស្ប៉ាញ ក្លឹបAtlético de Madrid ក្លឹប Liverpool និង Tottenham Hotspur "។

សេចក្តីថ្លែងការណ៍នោះក៏បានបន្ថែមទៀតថា UEFA បានស្នើសុំ Real Madrid ឲ្យជួយសម្រួលទីតាំងហ្វឹកហាត់ដល់ក្រុមឡើងវគ្គផ្ដាច់ព្រ័ត្រទាំង២ ក្លឹបក៏បានសហការ ហើយតាមគម្រោង Tottenham នឹងប្រើមជ្ឈមណ្ឌលហ្វឹកហាត់របស់ Real នៅថ្ងៃទី ៣០ និង ៣១ ខែឧសភា ខណៈដែល Liverpool នឹងប្រើប្រាស់វានៅព្រឹកថ្ងៃទី ១ ខែមិថុនា៕

អាន៖ Van Dijk ៖ អាថ៌កំបាំងអាចបិទខ្សែប្រយុទ្ធបានយ៉ាងល្អគឺ ធ្វើឲ្យខ្សែប្រយុទ្ធបង្កើតជម្រើស

អាន៖ ចំណុច៦នេះនឹងកំណត់ថាក្លឹបមានទោសឬអត់ក្នុងការចុះកុងត្រាជាមួយកីឡាករជាអនីតិជន

ប្រភព៖ theguardian ប្រែសម្រួល៖ សុខ លាងហ៊ត