Van Dijk ទម្លាយពីមូលហេតុដែលស្ទើរតែគ្មានកីឡាករណាអាចឆ្លងផុតពីរូបគេ

2019-05-12 04:35:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Virgil van Dijk បានជួយ Liverpool ឡើងទៅកាន់វគ្គផ្តាច់ព្រ័ត្រ Champions League ២ឆ្នាំជាប់ៗគ្នា ខ្សែការពាររូបនេះត្រូវបានគេនិយាយច្រើនបំផុតនៅអឺរ៉ុបនាពេលបច្ចុប្បន្ន ថាស្ទើរតែគ្មានកីឡាករណាអាចឆ្លងផុតកីឡាករកម្ពស់ ១,៩៣ ម៉ែត្រនេះឡើយ។

ចូលលេងបាន ៤,២៨៥នាទី ក្នុងចំណោម ៤៨ប្រកួត និងទើបតែឈ្នះពានរង្វាន់កីឡាករឆ្នើមនៅ Premier Leauge កីឡាករហូឡង់ត្រូវបានគេចាត់ទុកថាជាខ្សែការពារដែលបិទបានល្អបំផុត។

និយាយនៅក្នុងបទសម្ភាសន៍ជាមួយ Sky Sports ដែលបានជីកសួរថាមានគេរិះគន់ខ្សែការពារថ្លៃបំផុតលើលោករូបនេះ Van Dijk ឆ្លើយតបនឹងការរិះគន់ថា "មានគេនិយាយថាខ្ញុំរត់ពីក្រោយខ្សែប្រយុទ្ធ...វាមិនពិតទេ តាមពិតទៅខ្ញុំចង់ឲ្យប្រាកដថា គ្មាននរណាម្នាក់អាចឆ្លងផុតខ្ញុំ"។

Van Dijk ក៏បានទម្លាយពីអាថ៌កំបាំងដែលធ្វើឲ្យរូបគេអាចបិទខ្សែប្រយុទ្ធបានយ៉ាងល្អ ហើយទាំងនោះក៏មកពីបទពិសោធន៍របស់កីឡាករវ័យ២៧ឆ្នាំ ធ្លាប់ធ្វើជាខ្សែប្រយុទ្ធកាលពីវ័យក្មេង។

ត្រង់នេះធ្វើឲ្យគេនឹកឃើញសំដី Didier Drogba ដែលធ្លាប់លើកឡើងថា ខ្សែការពារដែលអតីតខ្សែប្រយុទ្ធ Chelsea ខ្លាចបំផុតក្នុងអាជីពគឺ Gerard Pique។ Pique ក៏ធ្លាប់មានប្រវត្តិធ្វើជាខ្សែប្រយុទ្ធនៅ Man Utd មុនទៅលេងជាខ្សែការពារនៅ Barcelona។

Van Dijk បាននិយាយថា "វិធីការពាររបស់ខ្ញុំ គឺតែងតែធ្វើឱ្យខ្សែប្រយុទ្ធត្រូវធ្វើការសម្រេចចិត្ត ហើយនោះជាពេលដែលខ្ញុំព្យាយាមដណ្ដើមបាល់ចេញពីពួកគេ។ វិធីនេះដំណើរការរលូនណាស់នៅរដូវកាលនេះ។ ខ្ញុំចាំថា នៅពេលខ្ញុំលេងជាខ្សែប្រយុទ្ធ វាតែងតែមិនល្អឡើយនៅពេលអ្នកស្ទាក់ស្ទើរដោយសារមានគេបង្ខំឲ្យអ្នកសម្រេចចិត្ត"។