ប៉ូលិសហុងកុងសម្ដែងការព្រួយបារម្ភ ក្រោយអ្នកតវ៉ានាំគ្នាប្រមូលដុំឥដ្ឋ និងបង្គោលដែកពីតាមផ្លូវ (វីដេអូ)

2019-06-12 06:46:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពតានតឺងនៅក្នុងទីក្រុងហុងកុង កាន់តែបន្ដកើនឡើងក្រោយបាតុកម្មប្រឆាំងច្បាប់បត្យាប័នថ្មីមានអ្នកចូលរួមច្រើនជាង ១លាននាក់។

យោងតាមសារព័ត៌មានក្នុងតំបន់ឲ្យដឹងថា បាតុករជាច្រើននាក់ បាននាំគ្នាមកបោះតង់សម្រាកនៅសួនច្បារ Tamar និងចាប់ផ្ដើមបិទចរាចរទៅកាន់អគាររដ្ឋាភិបាលនៅព្រឹកថ្ងៃពុធនេះ ខណៈពេលដែលរដ្ឋាភិបាលគ្រោងបើកកិច្ចប្រជុំពេញអង្គលើការសម្រេចច្បាប់បត្យាប័នថ្មី។ ចំណែកឯការព្រួយបារម្ភមួយទៀតកំពុងកើតឡើង ដោយក្រុមអ្នកតវ៉ានៅផ្លូវ Tim Mei បាននាំគ្នាគាស់ឥដ្ឋដែលក្រាលផ្លូវថ្មើរជើង មកធ្វើជាជញ្ជាំងទប់ទល់ជាមួយប៉ូលិស។ ក្រៅពីនេះ បង្គោលដែកជាច្រើនដើមនៅតាមផ្លូវ ក៏ត្រូវបានអ្នកតវ៉ានាំគ្នាប្រមូលផ្ដុំយកមកគរត្រៀមទប់ទល់នឹងប៉ូលិស។

ក្រឡេកមកខាងរដ្ឋាភិបាលវិញ ប៉ូលិសចំនួនជាង ៥ពាន់នាក់ ត្រូវបានដាក់ពង្រាយ និងឆ្លាស់វេនគ្នារយៈពេល ១២ម៉ោងម្ដង ខណៈពេលដែលប៉ូលិសជាង ៣២០ នាក់ផ្សេងទៀត ត្រូវបានដកមកពីតំបន់ ៥នៃទីក្រុងហុងកុងដើម្បីត្រៀមទប់ទល់ជាមួយក្រុមអ្នកតវ៉ា។ យោងតាមប៉ូលិសមួយរូបសូមមិនបញ្ចេញឈ្មោះឲ្យដឹងថា ពួកគេមិនទាន់ទទួលបទបញ្ជាណាមួយដើម្បីបាញ់ឧស្ម័នបង្ហូរទឹកភ្នែកដើម្បីបំបែកក្រុមអ្នកតវ៉ានោះទេ ខណៈដែលប៉ូលិសឈរការពារការិយាល័យកណ្ដាលរដ្ឋាភិបាល និងមិនទាន់មានសកម្មភាពនៅឡើយ។

គួរឲ្យដឹងថា ការតវ៉ានេះ ត្រូវបានធ្វើឡើងក្រោយពេលដែលមានការស្នើសុំបង្កើតច្បាប់បត្យាប័នថ្មីដែលអនុញ្ញាតឲ្យជនល្មើសត្រូវបញ្ជូនទៅកាន់ចិនដីគោកដើម្បីកាត់ក្ដី និងដោយសារពួកគេមិនទុកចិត្តលើការគោរពសិទ្ធិមនុស្ស និងប្រព័ន្ធច្បាប់របស់ចិនដីគោក៕

សូមទស្សនាវីដេអូខាងក្រោម ៖

Apart from bricks, anti-extradition bill protesters also gather metal poles. #extraditionbill #SCMP (video:SCMP reader) pic.twitter.com/FFQDU82m3t
— Stella Lee (@StellaLeeHKnews) June 12, 2019