ទើបដាក់ឲ្យប្រើថ្មីៗ ត្រូវ Hacker ធ្វើស៊ីអស់ ៥០ ម៉ឺនដុល្លារ

2019-07-07 03:03:19
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃព្រហស្បតិ៍ ផ្សារ 7-Eleven នៅជប៉ុន បានផ្អាកដំណើរការមុខងារដែលទើបដាក់ឲ្យប្រើថ្មីៗទូទាត់សាច់ប្រាក់តាមទូរសព្ទលើកម្មវិធី 7Pay ក្រោយពីមានចន្លោះប្រហោងមួយអាចឲ្យ Hacker ដកយកលុយពីអ្នកប្រើប្រាស់រាប់រយនាក់។

ក្រុមហ៊ុនបានបញ្ចេញមុខងារថ្មីនេះកាលពីថ្ងៃចន្ទ ដែលអាចឲ្យអតិថិជនធ្វើស្កេនកូដជាមួយកម្មវិធី និងបង់ប្រាក់ជាមួយកាតដែលភ្ជាប់ជាមួយកម្មវិធី។ យ៉ាងណាក្ដី ក្រុមហ៊ុនទទួលបានពាក្យបណ្ដឹងនៅថ្ងៃបន្ទាប់ មានអតិថិជនប្រទះឃើញការគិតលុយលើឥវ៉ាន់ដែលពួកគេមិនបានទិញ។

ការចុះផ្សាយរបស់ Yahoo News Japan បានអះអាងថាកម្មវិធី 7Pay មានចន្លោះប្រហោង។ Hacker គ្រាន់តែដឹងអំពីថ្ងៃខែឆ្នាំកំណើត, អ៊ីមែល និងលេខទូរសព្ទរបស់អតិថិជន រួចផ្ញើការ Request សុំ Reset លេខសម្ងាត់ទៅកាន់អ៊ីមែលផ្សេងណាមួយ។ កម្មវិធីនេះថែមទាំងកំណត់មកស្រេចនូវថ្ងៃខែឆ្នាំកំណើតចំ ១ មករា ២០១៩ ដែលអ្នកប្រើប្រាស់មិនបានចាប់ភ្លឹក ធ្វើឲ្យការលួចចូលគណនីកាន់តែមានភាពងាយស្រួល។

ដោយសារចន្លោះប្រហោងនេះ មានគណនីចំនួនប្រមាណ ៩០០ ត្រូវបានវាយប្រហារ និងគិតលុយអស់ប្រមាណ ៥៥ លានយេន (ប្រមាណ ៥០០ ០០០ ដុល្លារ)។ ក្រុមហ៊ុន 7-Eleven ជប៉ុននិយាយថាបានផ្អាកដំណើរការមុខងារនេះ និងលែងទទួលចុះឈ្មោះអ្នកប្រើប្រាស់ទៀតហើយ។ ក្រុមហ៊ុនក៏នឹងសងជំងឺចិត្តដល់អ្នកប្រើប្រាស់ដែលរងគ្រោះផងដែរ។

ក្នុងរឿងរ៉ាវនេះ សមត្ថកិច្ចជប៉ុនបានចាប់ខ្លួនបុគ្គលពីរនាក់ ដែលប៉ុនប៉ងប្រើប្រាស់គណនីដែលបាន Hack ហើយជឿជាក់ថាពួកគេអាចជាប់ទាក់ទងនឹងក្រុមឧក្រិដ្ឋជនចិន ដែលលួចអត្តសញ្ញាណលើអ៊ីនធឺណិត៕

ចុចអាន៖

ប្រភព៖ The Verge ប្រែសម្រួល៖ សុខហេង