លីគកម្ពុជា៖ ស្វាយរៀងនៅឈរកំពូលតារាងដដែល ខណៈភ្នំពេញក្រោនគួរឱ្យចាប់អារម្មណ៍

2019-07-15 02:40:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតលីគកំពូលកម្ពុជាបានបញ្ចប់ការប្រកួតសប្ដាហ៍ទី១៥ហើយ កាលពីល្ងាចមិញនេះ ដោយក្នុងនោះក្រុមខ្លាំងៗទទួលបានលទ្ធផលល្អ ហើយតារាងចំណាត់ថ្នាក់ក៏មិនប្រែប្រួលដែរ។

រូបភាព៖ ក្រោន

ក្រុមកំពូលតារាងស្វាយរៀង បានបន្ដកំណត់ត្រាមិនចាញ់របស់ខ្លួន ដោយយកឈ្នះលើក្រុមសូទីឡូអង្គរក្នុងលទ្ធផល ៦-១។ ការធ្វើបានយ៉ាងល្អនេះ គឺរក្សាតំណែងកំពូលតារាងដាច់ពិន្ទុក្រុមលេខ២ ណាហ្គាវើល បាន៥ពិន្ទុដដែល។ សម្រាប់គូដែលគេចាប់អារម្មណ៍ជាងគេនៅសប្ដាហ៍នេះ ក្រុមភ្នំពេញក្រោន ដែលទើបតែរុះរើក្រុម។ ពួកគេលេងបានល្អមែនទែនសម្រាប់ការប្រកួតសប្ដាហ៍ទី១៥ ដោយស៊ីក្រុមយុវជនបាទីបានដល់ទៅ ១២-១ ឯណោះ។ នេះជាការចាញ់ធ្ងន់បំផុតរបស់បាទី ត្បិតអីពួកគេនៅក្មេង ប៉ុន្តែកន្លងមកមិនមានក្រុមណាស៊ីគេបានច្រើនដូច្នេះទេ។

រូបភាព៖ CNCC

មួយគូទៀតដែលគួរឱ្យចាប់អារម្មណ៍ដែរនោះ គឺក្រុមខេត្តកំពង់ចាម ដែលធ្លាប់តែចាញ់គេទក់សាច់។ ការប្រកួតទល់ក្រុម Angkor Tiger ឃើញថាពួកគេលេងល្អបន្តិចហើយ ពោលគឺអាចទប់ក្រុមខ្លាំងក្នុងដីបានរហូតដល់ចុងម៉ោង ទើបធ្លាយគ្រាប់បាល់ច្រើនគ្រាប់។ ចប់ការប្រកួតនេះ Angkor Tiger ឈ្នះក្នុងលទ្ធផល ៤-០៕

អត្ថបទ៖ កុលាប