ក្រោយ Apple ចាយអស់ ១ ពាន់លានដុល្លារ iPhone ស៊េរី ២០២០ អាចនឹងមាន 5G ទាំងអស់

2019-07-29 02:45:49
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីខែមិថុនា អ្នកវិភាគល្បីឈ្មោះ Ming-Chi Kuo បាននិយាយថា Apple អាចនឹងប្រកាសចេញ iPhone ចំនួនបីម៉ូដែលនៅឆ្នាំ ២០២០ ដែលមានពីរម៉ូដែលអាចទ្រាំទ្រប្រព័ន្ធ 5G។

នៅពេលនេះ អ្នកវិភាគខាងលើបានចេញផ្សាយកំណត់ត្រាថ្មីនិយាយថា iPhone ឆ្នាំ ២០២០ ទាំងបីនឹងអាចទ្រាំទ្រប្រព័ន្ធ 5G បានទាំងអស់។ iPhone ឆ្នាំ ២០២០ ក៏រំពឹងថានឹងមានការផ្លាស់ប្ដូររូបរាងច្រើនផងដែរ បើប្រៀបនឹងបច្ចុប្បន្ន ដោយមានទំហំអេក្រង់ ៦,៧ អ៊ីញ ៥,៤ អ៊ីញ និង ៦,១ អ៊ីញ។

លោក Kuo និយាយថាការទិញយកជំនួញផលិត Modem របស់ Intel មានន័យថា Apple មានធនធានច្រើនបន្ថែមទៀតដើម្បីទ្រាំទ្រការបំពាក់ប្រព័ន្ធ 5G លើ iPhone ច្រើនម៉ូដែលបានលឿនជាងមុន។ 5G គឺជាមុខងារដែល iPhone ត្រូវមានមួយ ដោយសារនៅ ៦ ខែចុងក្រោយនៃឆ្នាំ ២០២០ រំពឹងថានឹងលេចវត្តមានស្មាតហ្វូន Android 5G តម្លៃ ៣៥០ ដុល្លារ ហើយ Apple ត្រូវតែធ្វើការប្រកួតប្រជែង។

iPhone ច្បាស់ជានឹងមានតម្លៃខ្ពស់ ហើយការបន្ថែមប្រព័ន្ធ 5G នឹងអាចជាចំណុចទាក់ទាញសំខាន់ឲ្យអតិថិជនពិចារណា។ iPhone ឆ្នាំ ២០២០ ក៏រំពឹងថានឹងប្រើអេក្រង់ OLED ទាំងបីម៉ូដែលតែម្ដង មិនដូច iPhone ឆ្នាំ ២០១៨ និង ២០១៩ ដែលមានមួយម៉ូដែលនៅប្រើអេក្រង់ LCD នៅឡើយ៕

ចុចអាន៖

ប្រភព៖ 9to5Mac ប្រែសម្រួល៖ សុខហេង