Jay Chou ចាប់ផ្ដើមបង្ហាញរូបថតស្និទ្ធស្នាលជាមួយគូដណ្ដឹង

2014-11-18 21:22:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុត តារាចម្រៀងតៃវ៉ាន់ Jay Chou ដែលធ្លាប់តែលាក់បាំងអំពីជីវិតស្នេហារបស់ខ្លួន បានបង្ហាញរូបថតខ្លួនឯងជាមួយគូដណ្ដឹង Hannah Quinlivan ហើយ នៅលើបណ្ដាញសង្គម Weibo របស់ខ្លួនកាលពីម្សិលមិញ។

តារាល្បីដែលមានទេពកោសល្យសម្បូរបែបរូបនេះ បានបង្ហោះរូបភាពពីរសន្លឹកអំពីជីវិតឯកជនរបស់ខ្លួនជាមួយតារាម៉ូដែល Hannah ដែលរូបថតទាំងនេះហាក់បង្ហាញថាអ្នកទាំងពីរកំពុងជិះកង់លេងជាមួយគ្នាក្នុងសួនឧទ្យានមួយ។ Jay Chou បានសរសេរថា "ម្សិលមិញ បន្ទាប់ពីបញ្ចប់ការប្រគំតន្ត្រី ខ្ញុំបានទទួលការជូនពរជាច្រើនពីនាក់គាំទ្រ។ ខ្ញុំក៏រីករាយណាស់ដែរនៅពេលបានឃើញអ្នកគាំទ្រខ្លះមកទស្សនាការប្រគំតន្ត្រីនេះទាំងគ្រួសារ។ ខ្ញុំសង្ឃឹមថាខ្ញុំអាចចែករំលែកភាពរីករាយជាមួយអ្នកទាំងអស់គ្នានៅពេលនេះ"។

Jay បានសម្ដែងក្នុងការប្រគំតន្ត្រីចំនួន ២នៅ ទីក្រុងកូឡាឡាំពួរ ប្រទេសម៉ាឡេស៊ី កាលពីចុងសប្ដាហ៍មុន។ នៅថ្ងៃទី២៧ ខែធ្នូ គេនឹងទៅសម្ដែងនៅប្រទេសសិង្ហបុរី។

Jay Chou វ័យ ៣៥ឆ្នាំ និងមិត្តស្រី Hannah វ័យ ២១ឆ្នាំ បានទាក់ទងគ្នាតាំងពីឆ្នាំ២០១១ ប៉ុន្តែអ្នកទាំងពីរមិនដែលបង្ហាញមុខជាសាធារណជាមួយគ្នាឡើយ។ កាលពីខែមិថុនា Jay បាននិយាយថាគេនឹងរៀបការមុនឈានចូលអាយុ ៣៦ឆ្នាំ គឺនៅខែមករា ឆ្នាំក្រោយ ប៉ុន្តែមិនបានបញ្ចេញឈ្មោះកូនក្រមុំនោះទេ ៕

អានអត្ថបទ៖Jay Chou កំណត់ពេលរៀបការជាមួយមិត្តស្រីជាថ្មី