នៅ Apple ឡើងគ្រប់ផ្នែក ធ្លាក់ចុះតែ iPhone ប៉ុណ្ណោះ

2019-07-31 02:07:58
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានបង្ហាញចេញរបាយការណ៍ហិរញ្ញវត្ថុប្រចាំត្រីមាសទី ២ នៃឆ្នាំ ២០១៩ ដែលគិតចាប់ពីខែមេសា ដល់ ខែមិថុនា។

របាយការណ៍បានបង្ហាញថាចំណូលពីការលក់ iPhone មានចំនួន ២៥,៩៩ ពាន់លានដុល្លារ ធ្លាក់ចុះពីចំណូល ២៩,៤៧ ដុល្លារ រកបានកាលពីឆ្នាំ ២០១៨ ដែលធ្លាក់ចុះប្រមាណ ១២%។ គិតចាប់ពី ២០១២ មក នេះជាលើកដំបូងដែលចំណូលពី iPhone មិនដល់ ៥០% នៃចំណូលដែលក្រុមហ៊ុនរកបានសរុប។ នៅត្រីមាសទីពីរនេះចំណូលសរុបរបស់ Apple គឺ ៥៣,៨ ពាន់លានដុល្លារ។

ជំនួញដែលរកចំណូលឲ្យ Apple បានច្រើនបន្ទាប់ពី iPhone នោះគឺជំនួញផ្នែកផ្ដល់សេវាកម្ម ដែលរកបានសរុប ១១,៤៦ ពាន់លានដុល្លារ មានការកើនឡើងបើធៀបនឹងឆ្នាំមុនដែលរកបាន ១០,២ ពាន់លានដុល្លារ។ ផ្នែកនេះមានដូចជាសេវាកម្ម Apple Music, Apple News+, AppleCare, ApplePlay, App Store និង iCloud ជាដើម។

ក្រឡេកមើលការលក់របស់ iPad នៅតែធ្វើបានល្អ ដោយនៅត្រីមាសចុងក្រោយនេះវាអាចរកចំណូលឲ្យ Apple បាន ៥,០២ ពាន់លានដុល្លារ កើនឡើងពី ៤,៦៣ ពាន់លានដុល្លារនាឆ្នាំមុន។ ផ្នែក Wearables Home និង Accessories វិញអាចរកចំណូលបាន ៥,៥៣ ពាន់លានដុល្លារ ខណៈដែលឆ្នាំមុនរកបាន ៣,៧៣ ពាន់លានដុល្លារ។ ការលក់កុំព្យូទ័រ Mac ក៏កើនឡើងដែរ ពោលកើនពី ៥,២៥ ពាន់លានដុល្លារ ដល់ ៥,៨២ ពាន់លានដុល្លារ។

ចំណូល ៥៣,៨ ពាន់លានដុល្លារនៅត្រីមាសទី ២ នេះ ក្នុងនោះ Apple អាចទទួលបានប្រាក់ចំណេញ ១០,០៤ ពាន់លានដុល្លារ។ សម្រាប់ត្រីមាសទី ៣ ឆ្នាំ ២០១៩ ក្រុមហ៊ុនបានព្យាករណ៍ថាអាចរកចំណូលបានចន្លោះពី ៦១ ទៅ ៦៤ ពាន់លានដុល្លារ៕

ចុចអាន៖

ប្រភព៖ PhoneArena | 9to5Mac ប្រែសម្រួល៖ សុខហេង